ಪ್ರಸ್ತುತ ನಾರ್ಥೆನ್ ಐರ್ಲೆಂಡ್ ನ ಬೆಲ್ ಫಾಸ್ಟ್ ನಗರದಲ್ಲಿ ನೆಲೆಸಿರುವ ಮೂಲತಃ ಉತ್ತರ ಕನ್ನಡದ ಮುಂಡಗೋಡದವರಾಗಿರುವ ಶ್ರೀಮತಿ ಅಮಿತಾ ರವಿಕಿರಣ್ ಅವರದ್ದು ಬಹು ಮುಖ ಪ್ರತಿಭೆ. ಬರಹ, ಸಾಹಿತ್ಯ, ಸಂಗೀತ, ಚಿತ್ರ ಕಲೆ, ಅಡುಗೆ ಇತ್ಯಾದಿ ಪ್ರಕಾರಗಳಲ್ಲಿ ತೊಡಗಿಸಿ ಕೊಂಡಿರುವ ಅಮಿತಾ ಅವರ ಅನೇಕ ಲೇಖನಗಳು, ಅಂಕಣ ಬರಹಗಳು ನಾಡಿನ ದಿನ ಪತ್ರಿಕೆಗಳಲ್ಲಿ ಪ್ರಕಟ ವಾಗಿವೆ.
ಇತ್ತೀಚಿನ ಬರಹಗಳು: ಅಮಿತಾ ರವಿಕಿರಣ್ (ಎಲ್ಲವನ್ನು ಓದಿ)
- ಕೇಳು - ಜನವರಿ 31, 2021
ನನಗೆ ಕನಸ ಮಾರಲು ಬರಬೇಡ, ನಿನಗೆ ಬಿಟ್ಟಿಯಾಗಿ ಕೊಡುವಷ್ಟು ರಾಶಿ ಕನಸಿವೆ ನನ್ನ ಹತ್ತಿರ.. ಬೇಕೆಂದರೆ ಹೇಳು ಕಳಿಸಿ ಕೊಡುವೆ||
ನನಗೆ ಒಲವ ಮಾರಲು ಬರಬೇಡ, ಒಲವ ಒರತೆಯಲೇ ಹಿತ್ತಲ ಮಲ್ಲಿಗೆ ಅರಳಿವೆ, ಬೇಕಿದ್ದರೆ ಹೇಳು
ದಂಡೆ ಹೆಣೆದು ಕಳಿಸುವೆ||
ನನಗೆ ಅನ್ನದ ಆಮಿಷ ಒಡ್ಡಬೇಡ, ಬದುಕಬುತ್ತಿ ಹದವಾಗಿ ಕಲಸಿ , ಹಸಿದವರಿಗೆ ಉಣಬಡಿಸಿದ್ದೇನೆ, ಬೇಕೆಂದರೆ ಹೇಳು
ಕೈತುತ್ತು ಕೊಡುವೆ||
ನನಗೆ ನೆರಳ ಕೊಡುವ ಮಾತಾಡಬೇಡ, ಹೊಂಗೆಯ ತಂಪಲ್ಲೆ ಗುಡಿಸಲ ಕಟ್ಟಿದ್ದೇನೆ, ನೆರಳ ಮಾತಾಡಿ ದಣಿವಾದರೆ ಹೇಳು ,
ಚಾಪೆ ಹಾಸಿ ಲಾಲಿಯೂ ಹಾಡುವೆ||
ನನಗೆ ನಗುವ ಹಂಚಲು ಬರಬೇಡ, ಬತ್ತದ ಚೈತನ್ಯವನು ಬಳುವಳಿಯಾಗಿ ಪಡೆದಿದ್ದೇನೆ,
ಬೇಕಾದರೆ ಹೇಳು ಕೊಡುವೆ ನಿನಗೂ ಒಂದಷ್ಟು ನಗುವ ಸಾಲ ಬಡ್ಡಿಯಿಲ್ಲದೆ||
ನನಗೆ ಬದುಕ ಪಾಠ ಹೇಳಿಕೊಡಲು ಬರಬೇಡ, ನಾನೇ ಕಲಿಯುತ್ತೇನೆ|
ಬದುಕು ಕಲಿಸುತ್ತದೆ, ಏಳುತ್ತೇನೆ, ಬೀಳುತ್ತೇನೆ ಮತ್ತೆ ಕಲಿಯುತ್ತೇನೆ, ಅವರವರ ಬದುಕು ,ಅವರವರ ಪಾತ್ರ
ಅವರಿಗೇ ಬಿಟ್ಟು ಬಿಡು,
ಬೆಳೆಯಲು ಬಿಡು, ಬೆಳಗಲು ಬಿಡು.
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ