ತಪ್ಪು ಮಾಡಬೇಕಿಲ್ಲ

• ಲೇಖಕರು
• ಇತ್ತೀಚಿನ ಬರಹಗಳು

ನೂತನ ದೋಶೆಟ್ಟಿ

ಮೂಲತಃ ಉತ್ತರಕನ್ನಡದ ಸಿದ್ಧಾಪುರದವರಾದ ನೂತನ ಎಂ. ದೋಶೆಟ್ಟಿ ಅವರು ಆಕಾಶವಾಣಿಯಲ್ಲಿ ಕಾರ್ಯಕ್ರಮ ನಿರ್ವಾಹಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇವರ ಏಳಕ್ಕೂ ಹೆಚ್ಚು ಕೃತಿ,ಕಾವ್ಯಗಳ ಸಂಕಲನಗಳು ಲೋಕಾರ್ಪಣೆಗೊಂಡಿದ್ದು, ಇವರ ಅನೇಕ ಬರಹಗಳು ನಾಡಿನ ಹಾಗೂ ಆಂಗ್ಲದ ಹೆಸರಾಂತ ಪತ್ರಿಕೆಗಳಲ್ಲಿ ಪ್ರಕಟಗೊಂಡಿವೆ.

ಇತ್ತೀಚಿನ ಬರಹಗಳು: ನೂತನ ದೋಶೆಟ್ಟಿ (ಎಲ್ಲವನ್ನು ಓದಿ)

• ವಿಂಗಡಿಸಿ ನೋಡು - ಅಕ್ಟೋಬರ್ 23, 2022
• ಆ ರಾತ್ರಿ - ಸೆಪ್ಟೆಂಬರ್ 15, 2021
• ಪ್ರಮಾಣ​ - ಸೆಪ್ಟೆಂಬರ್ 5, 2021

ತಪ್ಪು ಮಾಡಲೇಬೇಕೆಂದಿಲ್ಲ
ಇರದ ತಪ್ಪಿಗೆ ಒಪ್ಪಿಗೆ ಪತ್ರದ
ಅಡಿಯಲ್ಲಿ ರುಜುವಾತು
ಮಾಡಲು ಸಿದ್ಧವಿದ್ದುಬಿಡು
ಹಲವರ ಕಾವಲಿನಲ್ಲಿ

ಅಚ್ಚ ಬಿಳುಪಿನ ನಿನ್ನ ಬಟ್ಟೆಗೆ
ಅಂಟಿ ಬಿಡುತ್ತವೆ ಕಪ್ಪು ಕಲೆಗಳು
ತೊಳೆದು ಹರವುತ್ತಿರಬೇಕು
ಆಗಾಗ ಬಿಸಿಲಿಗೆ ಝಳಝಳವಾಗಲು

ಒಣಗಿದ ಗರಿಗರಿ ಉಡುಪಲ್ಲಿ
ತೂರಬೇಕು ಕೈ ಕಾಲು ದೇಹ
ಮನಸ್ಸು
ಕಣ್ಣು ಕಿವಿ ಬಾಯಿಗಳ ಜೊತೆಯಾಗಿಸಿ

ಒಂಟಿ ಆದರ್ಶದ ನಂಟನ್ನು
ಗಂಟು ಕಟ್ಟಿ ಅಟ್ಟಕ್ಕೇರಿಸಿಬಿಡು
ಗುಂಪಿನ ಗುದಿಮುರಿಗೆ ತಪ್ಪೀತು

ಬಿಟ್ಟೂ ಬಿಡದ ಅನಾಥಪ್ರಜ್ಞೆಯ ನರಳಿಕೆ
ಒಳಗೂ…ಹೊರಗೂ…
ವರ್ಷದ ದೀಪಾವಳಿ ಹಬ್ಬಕ್ಕೆ
ಗುಡಿಸಿ ಸಾರಿಸಿ ಬಿಡು
ರಂಗೋಲಿ ತಾನಾಗಿ ಮೂಡೀತು

ಪಗಡೆ ದಾಳಗಳಿರದ ಆಟವಿದು
ಹಾರು ಎಗರು ಕಣ್ಣಾ ಮುಚ್ಚಾಲೆ ಕಕ್ಕಾಬಿಕ್ಕಿ

ಓದು- ವಿದ್ಯೆಯ ಸುರುವಿಬಿಡು
ಅಂಗಳದಲ್ಲಿ
ಹುಳು- ಕಡ್ಡಿ ಬೇರೆಯಾಗಲಿ
ಆಗಾಗ ಕೈಯಾಡಿಸುವುದ ಮರೆಯಬೇಡ

ನಡೆಯುವುದೆಲ್ಲ ಈಗ ಕುರ್ಚಿಯುದ್ಧ
ದೂರವಿದ್ದು ಬಿಡು ಕಚ್ಚಿ ಹಿಡಿಯದಂತೆ
ಕೈಚಾಚಿದರೆ ಕುಣಿಕೆ ಕೊರಳ ಸೇರೀತು!
ಕತ್ತಿಗಳು ಬುದ್ಧಿಯೊಳಗೆ ಮಸೆತು ಸಿದ್ಧವಾಗಿವೆ
ಕಣ್ಣಿರದ ಬೆನ್ನ ಹಿಂದಿನ ಪ್ರಹಾರಕ್ಕೆ

ಕಾಲದೊಳಗೆ ಹೂತ ನಂಟು- ನೆಂಟ ಬಗೆಯ ಬೇಡ
ಲೇಪಿಸಿಕೊ ಹಗುರ ನಗುವೊಂದ
ಮಾತನ್ನು ಹೊಲಿದು ಬಿಡು ಮೌನದಿಂದ
ನಾನು-ನೀನುಗಳ
ಬಿರುಸು ಬಾಣಗಳು ಗುರಿ ತಪ್ಪಿಯಾವು
ನೀನು- ನಿನ್ನ ಸಗ್ಗದ
ಐಸಿರಿಯ ನೋಟ ದಕ್ಕೀತು.