ಅರಹು

• ಲೇಖಕರು
• ಇತ್ತೀಚಿನ ಬರಹಗಳು

ರವಿಶಂಕರ ಪಾಟೀಲ್

ರವಿಶಂಕರ ಪಾಟೀಲ ವೃತ್ತಿಯಿಂದ ಸರ್ಕಾರಿ ಪ್ರೌಢಶಾಲಾ ದೈಹಿಕ ಶಿಕ್ಷಣ ಶಿಕ್ಷಕರು. ಬೆಳಗಾವಿ ಜಿಲ್ಲೆ ಅಥಣಿ ತಾಲೂಕು ದರೂರ ಗ್ರಾಮದವರು. ಕಥೆ, ಕವನ ಇವರ ಇಷ್ಟದ ಸಾಹಿತ್ಯ ಪ್ರಕಾರಗಳು. 2012ರಲ್ಲಿ “ದೃಷ್ಟಿಕೋನ” ಎಂಬ ಕಥಾ ಸಂಕಲನವನ್ನು ಪ್ರಕಟಿಸಿರುವ ರವಿಶಂಕರ ಪಾಟೀಲ ‘ನದೀಮುಖ’ ಎಂಬ ಕಥೆಗೆ ಬುಕ್‍ಬ್ರಹ್ಮ ಜುಲೈ 2020ರಲ್ಲಿ ಆಯೋಜಿಸಿದ್ದ ‘ಜನ ಮೆಚ್ಚಿದ ಕಥೆ’ ಸ್ಪರ್ಧೆಯಲ್ಲಿ ಪ್ರಥಮ ಬಹುಮಾನ ಪಡೆದಿದ್ದಾರೆ.

ಇತ್ತೀಚಿನ ಬರಹಗಳು: ರವಿಶಂಕರ ಪಾಟೀಲ್ (ಎಲ್ಲವನ್ನು ಓದಿ)

• ಅರಹು - ಅಕ್ಟೋಬರ್ 5, 2020

ಸರಿತಪ್ಪುಗಳ ಸಮಮಾಡಿಕೊಂಡು ಮತಿ ಮರ್ಮಗಳ ಮೊದಲುಗೊಂಡು
ಮರ್ಮಾಂಗಗಳ ಮಡಿಮಾಡಿ
ಎದುರುನಿಂತ ಹಗಲುಗಳ ರಾತ್ರಿಮಾಡಿ
ಎದೆ ಢವ ಢವಗಳ ಪ್ರೇಮವಾಗಿಸಿ
ಎಲ್ಲವನು ಮಾತಾಗಿಸಿ
ಕೃತಿಯಾಗಿಸಿ
ಮೈಮರೆತು ಮೆರೆವ ದಿಟಸೂತ್ರದಲಿ ತನ್ನ ತಾ ಅರಿವ ಘಳಿಗೆ

ಹಗಲುಗಳ ಹತ್ಯೆಗೈದು
ರಾತ್ರಿಗಳ ಜತನಮಾಡಿ ಬದುಕಿದ ಬದುಕದು ಬದುಕಲ್ಲ

ಮಾರಿದರೆ ಮಾನವನು ಬೆತ್ತಲು ಮಾಧುರ್ಯ
ಮೋಹಿಸಿದವಳ ಮರೆತಂತೆ ಹೆತ್ತವಳನೇ ಹೆತ್ತಂತೆ
ರಕುತ ಮಾಂಸಖಂಡಗಳ ಹಗಲೆಲ್ಲ ಹೊತ್ತಂತೆ
ಮತ್ತು ಭಾವಭಂಗುರ

ಮೊದಮೊದಲು ಹೀಗಿರಲಿಲ್ಲ
ಹಸಿವಾದರೆ ಅನ್ನ
ತೃಷೆಯಾದರೆ ನೀರು
ಮಲಗಿದರೆ ನಿದ್ರೆ
ಮತ್ತೆ ಈಗ
ಎಲ್ಲದಕೂ ಸಂಶಯ
ಎಲ್ಲದಕೂ ಚಿತ್ತ
ಉಂಡರೂ ಚಿತ್ತ
ಮಲಗಿದರೂ ಮತಿ
ನೀರ ಕುಡಿದರೂ ಚಿತ್ತ

ಹಗಲ ಹನ್ನೆರಡು ಗಂಟೆಗೊಮ್ಮೆ ಸಾವು
ರಾತ್ರಿ ಎರಡು ಗಂಟೆಗೊಮ್ಮೆ ಸಾವು
ತರ್ಕ ವಿರೂಪ ಮಾಧುರ್ಯ ಮೋಹ ಸ್ಖಲನ ಶಿಶ್ನ
ಭಿತ್ತಿ ಹತ್ತಿಪ್ಪತ್ತರ ಚಿತ್ತ

ಮಲಗಿದರೆ ನಿದ್ರೆ
ಬದುಕ ಬರೆಯಲು ಮೂಡುವ ಸಾಲುಗಳಿಗೆ ಶೂನ್ಯಲೇಪ
ಬರೆಯದಿರ್ದಡೆ ಅದು ಬರಿಯ ಭ್ರಮನೆ ಇಲ್ಲ ಕನಸು
ಕನಸೂ ಸುಳ್ಳು ಭ್ರಮೆಯೂ ಸುಳ್ಳು
ಶೂನ್ಯವೊಂದು ನಿಲ್ಲುವುದು
ಶೂನ್ಯ ಅದು ಶೂನ್ಯವಷ್ಟೇ ಅದನ್ನೂ ಸಂಪಾದಿಸಬೇಕು

ಎಂದಾದರೂ ಒಮ್ಮೆ ಸಿಕ್ಕಾಳು ಆ ಪ್ರಿಯತಮೆ
ಅವಳೆಲ್ಲಿ? ಅವಳ ನೆನಹೆಲ್ಲಿ?
ಅವಳೂ ಈಗೀಗ ಚಿತ್ತಕ್ಕೆ ಹಾರಿಹೋಗುವಳು
ಅವಳೀಗ ಮತಿಗೇಡಿಯ ಹಾಗೆ ಸೂಕ್ಷ್ಮಮತಿ
ಯಾಗಿ ತಲೆಯ ತಿನ್ನುವಳು
ಅವಳ ಕುರಿತು ಚಿಂತಿಸುವುದೂ ಒಂದು ತರ್ಕವೇ

ಪ್ರೇಮವೂ ಈಗ ಕಾಮಿಡಿ ಚಲನ ಚಿತ್ರದಂತೆ
ಶುದ್ಧ ಪರಿಶುದ್ಧ ಭಾವ ಸಂಪೂರ್ಣ
ಮೋಹ ಸಂಕೀರ್ಣ ಭವ ಸಂಪೂರ್ಣ ಎಂದೆಲ್ಲಾ ಹೇಳುತ್ತಾರೆ
ತರ್ಕ
ಆಕೆಯ ಮೋಹದ ಮುಂದೆ ಶೂನ್ಯವಾಗಿಬಿಡುತ್ತದೆ ಒಮ್ಮೊಮ್ಮೆ
ಸೂಕ್ಷ್ಮವಾಗಿಬಿಡುತ್ತದೆ ಇನ್ನೊಮ್ಮ್ಮೆ
ಕ್ರಿಯೆ ತರ್ಕ ದರ್ದು ದೋಷ ರೋಷ
ಎಂದು ಏನೆಲ್ಲಾ ಆಗಿಬಿಡುತ್ತಾಳೆ ಆಕೆ
ಎಲ್ಲಾ ಹೀಗೇ ಇರಲೆಂದು ಇಷ್ಟಕ್ಕೂ ಬಯಸಕೂಡದು

ಚಿತ್ತ ತರ್ಕ ತಂಬೆಲರು ತೋರಣ ಮರಣ ಶಾಸನ ಸಂವಿಧಾನ
ಸರಿ ಸಂಪೂರ್ಣ ಸಿರಿಧಾನ್ಯ ಹೊಟ್ಟೆನೋವು ತಲೆನೋವು
ಕಣ್ಣ ಉರಿ ತಲೆತಿರುಗು
ಏನೆಲ್ಲ ಆಗಬಲ್ಲದು ಪ್ರೇಮ
ಆಕೆಯ ಮೋಹವೆಂದರೆ ಅದು ಹಾಗೇ

ಮತ್ತೆ ಮತ್ತೆ ಬದಲಾಗುವ ಕಾಲಕ್ಕೆ
ಕಾಲದ ನೋವಿಗೆ ಅವಳಲ್ಲ ಕಾರಣ
ಕಾಲವೇ ಕಾರಣ
ಮಗದೊಮ್ಮೆ ನಕ್ಕ ಬುದ್ಧ ಈಕೆಯ ತರ್ಕದಿಂದಲೆ ಇರಬೇಕು
ತರ್ಕ ವಿತರ್ಕ
ಎಲ್ಲವೂ ಕಾಲಮಯ ಅಕಾರಣಮಯವೂ
ಹಾಗೆಂದರೆ ಹಾಗೆ
ಆಕೆಯೊಬ್ಬಳು ಎಲ್ಲದಕೂ ಕಾರಣವಾಗಬಲ್ಲಳು
ರಾತ್ರಿಯೊಂದು ಹಸಿದ ಹೆಬ್ಬುಲಿ ಹಗಲು ಸತ್ತ ಶವ
ತರ್ಕ ವಿತರ್ಕ ಸಂಪೂರ್ಣ ಸ್ಖಲನ ಗಂಭೀರ ಚಿತ್ತ
ಮತಿಗೇಡಿಯೂ ಮತಿವಂತ ಆಕೆಯ
ತರ್ಕದ ಮುಂದೆ ಮೋಹದ ಮುಂದೆ