ಇವಳು ಮುಟ್ಟಾದ ದಿನ

• ಲೇಖಕರು
• ಇತ್ತೀಚಿನ ಬರಹಗಳು

ಪುನೀತ್ ಹಂದ್ರಾಳು

ಹಾಸನ ಜಿಲ್ಲೆಯ ಬೇಲೂರು ತಾಲ್ಲೂಕಿನ ಹಂದ್ರಾಳು ಎಂಬಲ್ಲಿಗೆ ಸೇರಿದ ಇವರು ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ಪದವೀಧರರಾಗಿದ್ದು ಖಾಸಗಿ ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಸಣ್ಣಕತೆ ಮತ್ತು ಕಾವ್ಯ ಇಷ್ಟದ ಪ್ರಕಾರಗಳು, ಕೆಲವು ಪತ್ರಿಕೆ ಮತ್ತು ದಿನಪತ್ರಿಕೆಗಳಲ್ಲಿ ಕಥೆ ಮತ್ತು ಕವಿತೆಗಳು ಪ್ರಕಟಗೊಂಡಿವೆ.

ಕರ್ಮವೀರ ಪತ್ರಿಕೆ ಆಯೋಜಿಸಿದ್ದ ೨೦೧೯ನೇ ಸಾಲಿನ "ರಾಜ್ಯಮಟ್ಟದ ರಾಜ್ಯೋತ್ಸವ ಕನ್ನಡ ಕಾವ್ಯಸ್ಪರ್ಧೆ"ಯಲ್ಲಿ ಪ್ರಥಮ ಬಹುಮಾನ, ಜನಮಿತ್ರ ದಿನಪತ್ರಿಕೆ ಆಯೋಜಿಸಿದ್ದ ೨೦೨೧ನೇ ಸಾಲಿನ "ಸಂಕ್ರಾಂತಿ ಸಂಭ್ರಮ ರಾಜ್ಯಮಟ್ಟದ ಕವನ ಸ್ಪರ್ಧೆ"ಯಲ್ಲಿ ಪ್ರಥಮ ಬಹುಮಾನ ಮತ್ತು ೨೦೨೦ನೇ ಸಾಲಿನ ಕಥಾಸ್ಪರ್ಧೆಯಲ್ಲಿ ಮೆಚ್ಚುಗೆ ಬಹುಮಾನ, ಗ್ರಾಮಾಂತರ ಬುದ್ಧಿಜೀವಿಗಳ ಬಳಗ ಆಯೋಜಿಸಿದ್ದ "ಕೆ ಎಸ್ ಎನ್ ನೆನಪಿನ ಕವನ ಸ್ಪರ್ಧೆ" ಹಾಗೂ ಪ್ರತಿಲಿಪಿ ಕನ್ನಡ ಆಯೋಜಿಸಿದ್ದ " ಕಬ್ಬ ಹಬ್ಬ ಕವನ ಸ್ಪರ್ಧೆ"ಗಳ​ಲ್ಲಿ ಪ್ರಥಮ ಬಹುಮಾನ ಸಂದಿದೆ.

ಇತ್ತೀಚಿನ ಬರಹಗಳು: ಪುನೀತ್ ಹಂದ್ರಾಳು (ಎಲ್ಲವನ್ನು ಓದಿ)

• ಇವಳು ಮುಟ್ಟಾದ ದಿನ - ಜುಲೈ 19, 2021

ಇವಳು ಮುಟ್ಟಾದ ದಿನ
ಮನೆಯ ತುಂಬೆಲ್ಲಾ ಹೊನಲು ಬೆಳಕಂತೆ
ಹರಡಿಕೊಂಡಿದ್ದ ಅಮ್ಮ,
ಪಾಯವಿಲ್ಲದ
ಹಜಾರದ ಮೂಲೆಯಲ್ಲಿ
ಕತ್ತಲೆಯ ಹೊದ್ದು
ಮಲಗಿದ್ದೇ ನೆನಪಾಗುತ್ತದೆ.

ಇವಳದೇ ಮುತ್ತಿನಕ್ಷತೆಯಲ್ಲಿ ನಿತ್ಯ ಪಟ್ಟಾಭಿಷಿಕ್ತನಾಗುವ
ನಾನು
ಇವಳು ಮುಟ್ಟಾದ ದಿನದ ರಾತ್ರಿ
ದಟ್ಟ ದರಿದ್ರನಾಗಿ, ದಿಕ್ಕು-ದೆಸೆಗಳು ತಪ್ಪಿ
ಬಿಸಿಲ ಬಯಲೊಳಗೆ ಬಟಾ ಬೆತ್ತಲಾದಂತೆ
ಕನಸು ಕಾಣುತ್ತೇನೆ.

ಹೊಟ್ಟೆಯ ನೋವೆಂದು ಇವಳು ಸಣ್ಣಗೆ ಮಿಸುಗಿದರೂ
ಹೊಕ್ಕಳ ಗಾಯದ ಮಾಸಿದ ಗುರುತೊಳಗೆ
ನೆತ್ತರ ನೆನಪೊಂದು ಮೆಲ್ಲಗೆ ಒತ್ತರಿಸಿ,
ಬಿಕ್ಕಳಿಸಿ ಅತ್ತಂತಾಗುತ್ತದೆ.
ಯಾರದೋ ಬಸಿರೊಳಗೆ ಹಿಡಿ ಉಸಿರಿಗೆ
ಬಡಬಡಿಸಿದಂತಾಗುತ್ತದೆ.

ಇವಳು ಮುಟ್ಟಾದ ದಿನ
ಕಾಲ ಕುಸಿದು ಕಾಲ್ಗಳಿಗೆ ತೊಡರುತ್ತದೆ.
ಸಮಗ್ರ ಪೌರುಷೇತಿಹಾಸಗಳ ಸಹಸ್ರ
ವರ್ಣಪುಟಗಳು ಕಪ್ಪು ಹಾಡು ಗುನುಗುತ್ತವೆ.

ಇವಳು ಮುಟ್ಟಾದ ದಿನ
ಆ ನಿಷಿದ್ಧ ಸಾಗರೋಲ್ಲಂಘನದ ಸೂತಕದ ನಡುವೆ
ಅಳುವ ಕಪಿಗಳ ಮುಂದೆ
ಉರಿವ ಬೆಂಕಿಯ ಮಿಂದೂ
ಮುಟ್ಟಾಗಿಯೇ ಉಳಿದವಳ
ಒಡಲಾಗ್ನಿಯ ಕರಿನೆರಳು
ಮೆಲ್ಲಗೆ ಎದೆಗಿಳಿಯುತ್ತದೆ.

ಅಸಲಿಗೆ ಇವಳು ಮುಟ್ಟಾಗುವ ದಿನ
ಮುಟ್ಟಾಗುವುದು ನಾನು;
ಇವಳ ಪ್ರೀತಿಗೆ ಹಬೆಯಾಡುವ ಚಹಾದ ಬಟ್ಟಲು;
ಜೊತೆಗೆ
ಬೆಳಕ ಹೆರಬೇಕಿದ್ದ ದೇವರಮನೆಯ ಆ
ಆರತಿ ದೀಪವೂ!