ಈಗೀಗ

• ಲೇಖಕರು
• ಇತ್ತೀಚಿನ ಬರಹಗಳು

ರೇವಣಸಿದ್ದಪ್ಪ ಜಿ.ಆರ್.

ದಾವಣಗೆರೆ ಜಿಲ್ಲೆಯ, ಹೊನ್ನಾಳಿ ತಾಲೂಕಿನ, ತಿಮ್ಲಾಪುರ ಗ್ರಾಮದವರಾದ ಇವರು ಎಂ.ಎ.(ಇಂಗ್ಲಿಷ್).,ಬಿ.ಇಡಿ. ಪದವೀಧರರು.

ದಾವಣಗೆರೆ ಜಿಲ್ಲೆಯ, ಚನ್ನಗಿರಿ ತಾಲೂಕಿನ,ಸಂತೇಬೆನ್ನೂರು ಹೋಬಳಿ ಕೇಂದ್ರದಲ್ಲಿರು ಎಸ್ಜೆವಿಪಿ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಆಂಗ್ಲ ಭಾಷಾ ಉಪನ್ಯಾಸಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಸಾಹಿತ್ಯದ ಓದು ಮತ್ತು ಕಾವ್ಯ ಕೃಷಿ ಇವರ ಪ್ರವೃತ್ತಿ. ಕಲೆ, ಸಂಗೀತ, ಸಂಸ್ಕೃತಿ, ಭಾಷಣ, ಚರ್ಚೆ ಇತ್ಯಾದಿಗಳು ಇವರ​ ಆಸಕ್ತಿಯ ವಿಷಯಗಳು.

ಇವರು ಸಂಕ್ರಮಣ ಸಾಹಿತ್ಯಸ್ಪರ್ಧೆ-೨೦೧೮ರ ಕಾವ್ಯ ವಿಭಾಗದಲ್ಲಿ ಬಹುಮಾನಿತರಾಗಿದ್ದಾರೆ.

ಇತ್ತೀಚಿನ ಬರಹಗಳು: ರೇವಣಸಿದ್ದಪ್ಪ ಜಿ.ಆರ್. (ಎಲ್ಲವನ್ನು ಓದಿ)

• ಪ್ರಕೃತಿ - ಅಕ್ಟೋಬರ್ 11, 2022
• ತ್ರಿಶಂಕು - ಆಗಸ್ಟ್ 21, 2022
• ಬಿಟ್ಟು ಬಂದ ಊರು - ಮೇ 28, 2022

ಈಗೀಗ
ಹೃದಯತುಂಬಿ
ಬರಮಾಡಿಕೊಳ್ಳುವುದು
ಅಸಹಜವಾಗಿದೆ!

ನಿನ್ನನ್ನೇ ಹುಡುಕಿಕೊಂಡು ಬಂದರೆ
ಅರಮನೆಯಂಥ ನಿನ್ನ
ಮನೆ ಸ್ವಾಗತಿಸುತ್ತದೆ.
ಮನೆಯೊಳಿರುವ
ಟೀವಿ,ಫ್ರಿಜ್, ಸೋಫಾ ಸೆಟ್,
ಪರದೆ, ಕಾಲುಹಾಸು, ಏಸಿ,
ಕಂಪ್ಯೂಟರ್,ವಾಷಿಂಗ್ ಮೆಶೀನ್,
ಕಾರು,ಸಾಕುನಾಯಿ
ನೋಡಿ ನಕ್ಕಂತಾಗುತ್ತದೆ.

ಭಾವನೆಗಳನ್ನು
ಬಿಂಬಿಸಬೇಕಾದ
ಮುಖಪರದೆಗೆ
ಗರಬಡಿದು
ಬ್ಲರ್ ಆಗಿ
ಕಾಣುತ್ತದೆ.

ನೋವು, ನಲಿವು,
ಕಾಮ, ಕ್ರೋಧ,
ಆಶ್ಚರ್ಯ, ಆತಂಕ,
ದ್ವೇಷ, ಅಸೂಯೆ,
ಪ್ರೇಮ, ವ್ಯಾಮೋಹ-
ಎಲ್ಲವನ್ನೂ
ಇಮೋಜಿಗಳಲ್ಲೇ
ಅಮೋಘವಾಗಿ
ಕಾಣಿಸುತ್ತೀಯ!

ಪ್ರೇಮವನ್ನೂ ಕಾಮವನ್ನೂ
ಇಮೋಜಿಗಳಿಗೇ ಬಿಟ್ಟು
ಭಾವಪ್ರಾಪ್ತಿ ಹೊಂದುವಂತಿದ್ದರೆ!

ವ್ಯಾಟ್ಸಾಪಿನಲ್ಲಿ ಚಾಟಿಸುವಾಗಿನ
ಆತ್ಮೀಯತೆ
ಎದುರಿಗೆ ಬಂದಾಗ
ಆಗುಂತಕನಾಗುತ್ತದೆ.
ಮುಖಪುಟದ ಸ್ನೇಹಕ್ಕೆ
ಯಾರ ಸಾವು
ಸೂತಕ ತರುತ್ತದೆ?

ಪ್ಲಾಸ್ಟಿಕಿನ ಹೂಬಳ್ಳಿಗಳ
ತೋರಣ ಮಾಡಿ
ಸುವಾಸನೆಯಲ್ಲಿ ತೇಲುವಂತೆ
ಸುಹಾಸವ ಬೀರುತ್ತೀಯ.
ಬರೀ ಹೂಬಳ್ಳಿಗಳೇ ಅಲ್ಲ,
ಸೆಕ್ಸ್ ಟಾಯ್ಗಳನು ಬಳಸಿ
ಪರಾಕಾಷ್ಠೆ ತಲುಪಬಹುದಲ್ಲ!