ಎಳೆಗಾಯಿ

• ಲೇಖಕರು
• ಇತ್ತೀಚಿನ ಬರಹಗಳು

ರೇವಣಸಿದ್ದಪ್ಪ ಜಿ.ಆರ್.

ದಾವಣಗೆರೆ ಜಿಲ್ಲೆಯ, ಹೊನ್ನಾಳಿ ತಾಲೂಕಿನ, ತಿಮ್ಲಾಪುರ ಗ್ರಾಮದವರಾದ ಇವರು ಎಂ.ಎ.(ಇಂಗ್ಲಿಷ್).,ಬಿ.ಇಡಿ. ಪದವೀಧರರು.

ದಾವಣಗೆರೆ ಜಿಲ್ಲೆಯ, ಚನ್ನಗಿರಿ ತಾಲೂಕಿನ,ಸಂತೇಬೆನ್ನೂರು ಹೋಬಳಿ ಕೇಂದ್ರದಲ್ಲಿರು ಎಸ್ಜೆವಿಪಿ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಆಂಗ್ಲ ಭಾಷಾ ಉಪನ್ಯಾಸಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಸಾಹಿತ್ಯದ ಓದು ಮತ್ತು ಕಾವ್ಯ ಕೃಷಿ ಇವರ ಪ್ರವೃತ್ತಿ. ಕಲೆ, ಸಂಗೀತ, ಸಂಸ್ಕೃತಿ, ಭಾಷಣ, ಚರ್ಚೆ ಇತ್ಯಾದಿಗಳು ಇವರ​ ಆಸಕ್ತಿಯ ವಿಷಯಗಳು.

ಇವರು ಸಂಕ್ರಮಣ ಸಾಹಿತ್ಯಸ್ಪರ್ಧೆ-೨೦೧೮ರ ಕಾವ್ಯ ವಿಭಾಗದಲ್ಲಿ ಬಹುಮಾನಿತರಾಗಿದ್ದಾರೆ.

ಇತ್ತೀಚಿನ ಬರಹಗಳು: ರೇವಣಸಿದ್ದಪ್ಪ ಜಿ.ಆರ್. (ಎಲ್ಲವನ್ನು ಓದಿ)

• ಪ್ರಕೃತಿ - ಅಕ್ಟೋಬರ್ 11, 2022
• ತ್ರಿಶಂಕು - ಆಗಸ್ಟ್ 21, 2022
• ಬಿಟ್ಟು ಬಂದ ಊರು - ಮೇ 28, 2022

ಎಳೆಗಾಯಿ
ಬಿರುಗಾಳಿಗೆ ಸಿಲುಕಿ
ನೆಲಕ್ಕುರುಳುವೊಲು
ಈ ಕಂದ
ಕಾಲನ ಕೈವಶವಾದರೆ
ನೀ ಕಂಗೆಟ್ಟು
ಕಂಬನಿಗರೆಯಬೇಡ ತಾಯೀ…

ಹುಣ್ಣಿಮೆಯ ಬೆಳದಿಂಗಳಲ್ಲಿ
ಬೆಳಕಾಗಿ ಹೊಳೆಯುತ್ತೇನೆ.
ಅಮಾವಾಸ್ಯೆಯ ಕಾರಿರುಳಲ್ಲಿ
ಕರಗಿ ಮುಗುಮ್ಮಾಗಿರುತ್ತೇನೆ.
ಮುಂಜಾನೆ ಮುಸ್ಸಂಜೆಯ
ಬಂಗಾರ ಕಿರಣಗಳಲ್ಲಿ
ರಂಗಾಗಿ ಮೆರೆಯುತ್ತೇನೆ.
ಸುಯ್ಯನೆ ಸುಳಿಯುವ
ವಾಯುವಿನಲ್ಲಿ ಆವಿಯಾಗಿ
ಹಾಯಾಗಿ ವಿಹರಿಸುತ್ತೇನೆ.
ದೇವರಿಗೆ ಬೆಳಗುವ
ಕರ್ಪೂರದಾರತಿಯಲ್ಲಿ
ತಣ್ಣಗೆ ಉರಿದು
ಮುದನೀಡುತ್ತೇನೆ.
ಜುಳುಜುಳು ಹರಿಯುವ
ಝರಿಯಲ್ಲಿ ಬೆರೆತು
ನಿನದಿಸುತ್ತೇನೆ.
ಉತ್ಸಾಹದಿ ಉಬ್ಬಿ ಉಲಿಯುವ
ಹಕ್ಕಿಗಳ ಕೊರಳ ಸೇರಿ
ಕಬ್ಬವ ಹಾಡುತ್ತೇನೆ.
ಬನದ ಹಸುರಿನಲ್ಲಿ
ಹರಿತ್ತುವಾಗಿ
ಕಂಗಳಿಗೆ ಹಬ್ಬವಾಗುತ್ತೇನೆ.
ಮಣ್ಣ ಕಣಕಣದಿ ಕಲೆತು
ಹೊಸತು ಚೇತನವಾಗಿ
ಚಿಗುರುತ್ತೇನೆ.

ಎಳೆಗಾಯಿ
ಬಿರುಗಾಳಿಗೆ ಸಿಲುಕಿ
ನೆಲಕ್ಕುರುಳುವೊಲು
ಈ ಕಂದ
ಕಾಲನ ಕೈವಶವಾದರೆ
ನೀ ಕಂಗೆಟ್ಟು
ಕಂಬನಿಗರೆಯಬೇಡ ತಾಯೀ…
ಇನ್ನೊಮ್ಮೆ ನಿನ್ನ ಮಗುವಾಗಿ
ಹುಟ್ಟಿ ಬರುತ್ತೇನೆ.