ಡಾ. ಕಿರಣ ಪೇಟಕರ, ವೃತ್ತಿಯಿಂದ ಪ್ಲಾಸ್ಟಿಕ್ ಸರ್ಜನ್. ಮೂಲತಃ ಹಾನಗಲ್ಲಿನವರು; ಈಗ ಬೆಂಗಳೂರಿನ ಇಲೆಕ್ಟ್ರಾನಿಕ್ ಸಿಟಿಯಲ್ಲಿ ವಾಸವಾಗಿದ್ದಾರೆ. ವೈದ್ಯಕೀಯ ಮತ್ತು ವೈಚಾರಿಕ ಸಾಹಿತ್ಯವನ್ನು ಕನ್ನಡ ಮತ್ತು ಇಂಗ್ಲೀಷಿನಲ್ಲಿ ಬರೆಯುವ ಹವ್ಯಾಸವುಳ್ಳ ಇವರ ಬರಹಗಳು ಪತ್ರಿಕೆಗಳಲ್ಲಿ ಮತ್ತು ಬ್ಲಾಗುಗಳಲ್ಲಿ ಪ್ರಕಟವಾಗಿವೆ. ಜನಸಾಮಾನ್ಯರು ಹಾಡಲು ಬರುವಂಥ ಕವನಗಳನ್ನು ರಚಿಸುವ ಆಸಕ್ತಿಯುಳ್ಳ ಇವರ ಕೆಲ ರಚನೆಗಳು ರಾಗ ತಳೆದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವುದುಂಟು.
ಇತ್ತೀಚಿನ ಬರಹಗಳು: ಡಾ. ಕಿರಣ ಪೇಟಕರ (ಎಲ್ಲವನ್ನು ಓದಿ)
- ಕೊರೊನಾ-ಮೃತಾತ್ಮನಮನ - ಆಗಸ್ಟ್ 15, 2021
ಸೂಕ್ಷ್ಮಾತಿಸೂಕ್ಷ್ಮ ಬಿಂದುವಲಿ ಭವಿಸಿ
ಬ್ರಹ್ಮಾಂಕುರ ಕಾಲಾಂತರ ನಿರಂತರ ಚಲಿಸಿ
ಲಘುದೇಹವನು ಪಡೆದು ಕಡೆಗೊಮ್ಮೆ ತೊಡೆದು
ಪರಮಾತ್ಮಗಮ್ಯ ಸಕಲ ಜೀವಾತ್ಮಗಳಿಗೆ
ನಮೋನ್ನಮಃ ಕೋಟಿ ನಮೋನ್ನಮಃ
ಮಹಾಪ್ರಾಣದಿಂ ಪ್ರಾಣವಂ ಗಳಿಸಿ
ಇಹಪರ-ಪ್ರಜ್ಞೆ ಅಹಂಜ್ಞಾನವಂ ಬೆಳೆಸಿ
ಅಲ್ಪ-ಕಲ್ಪಗಳರಿವ ಪ್ರಾಣಿರೂಪದೆ ತೋರಿ
ಪ್ರಾಣವಾಯುವಿನಲಿ ಲೀನ ಪುಣ್ಯ ಪ್ರಾಣಗಳಿಗೆ
ನಮೋನ್ನಮಃ ಕೋಟಿ ನಮೋನ್ನಮಃ
ಅನಂತ ಬ್ರಹ್ಮಾಂಡದ ಆದಿ ಪಿಂಡದಿ ಮೂಡಿ
ಕಾಲಾಕಾಶದ ಪರದೆಯ ಭವ್ಯ ಭವದೊಳು
ಮುಂಡರುಂಡಧರ ಪಾತ್ರವನಾಡಿ ವೇಷ ಕಳಚಿದ
ಆದ್ಯಂತಗಳೆರಡೂ ಮಿಳಿತ ಅಂಡಾಂಡಗಳಿಗೆ
ನಮೋನ್ನಮಃ ಕೋಟಿ ನಮೋನ್ನಮಃ
ಜೀವಜೀವದ ಸರಣಿ-ಜೀವಕೋಟಿಯೊಳು
ಹಿರಿಜೀವ ದೊರೆತು ಹಿರಿಮೆಯಲಿ ಜೀವಿಪರೆ
ಜೀವಿಜೀವಿಗಳ ನಡುವಣಾಜೈವಿಕ ಕ್ಲೇಶದಲಿ
ಜೀವನ ಮುಗಿಸಿದ ಅವಿನಾಶಿ ಜೀವಗಳಿಗೆ
ನಮೋನ್ನಮಃ ಕೋಟಿ ನಮೋನ್ನಮಃ
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ