ಗೇಯತೆಯುಳ್ಳ ಕವಿತೆಗಳು,ಷಟ್ಪದಿಗಳನ್ನು ಬರೆಯುವುದರಲ್ಲಿ ಆಸಕ್ತಿ.ಈಗಿತ್ತಲಾಗಿ ಗಝಲ್, ರುಬಾಯಿ ಮುಂತಾದ ಕಾವ್ಯ ಪ್ರಕಾರಗಳನ್ನೂ ಕಲಿತು ಬರೆಯುವ ಪ್ರಯತ್ನ ಮಾಡುತ್ತಿದ್ದಾರೆ.
- ಎರಡು ಗಜ಼ಲ್ ಗಳು… - ಅಕ್ಟೋಬರ್ 24, 2020
ಹಗಲು ಬೆಳಕ ಸುರಿಸಿ ಸೋತು ರಾತ್ರೆಯಲ್ಲಿ ಕಳೆದಿದೆ
ಕಿಸೆಯಲಿದ್ದ ಖುಷಿಯ ಕೀಲಿ ಜಾತ್ರೆಯಲ್ಲಿ ಕಳೆದಿದೆ
ನಶೆಯ ಶೀಶೆಯಲ್ಲಿ ಸುಖವ ಹುಡುಕುತಿಹುದು ಈಜಗ
ಭಾವ ಬೆಸೆವ ಬಂಧವೆಲ್ಲ ಮಧುಪಾತ್ರೆಯಲ್ಲಿ ಕಳೆದಿದೆ
ಒಲಿಯದಿಲ್ಲಿ ಮೃತ ಸಂಜೀವಿನಿ ಸಾವ ಗೆಲುವ ಮೋಹಕೆ
ಕೊನೆಯ ಉಸಿರು ವೈದ್ಯನಿತ್ತ ಮಾತ್ರೆಯಲ್ಲಿ ಕಳೆದಿದೆ
ಹಳತನಳಿಸಿ ಹೊಸತು ಬರೆವ ಖಯಾಲಿಯೀಗ ಎಲ್ಲೆಡೆ
ಭವಿಷ್ಯ ಬರೆದ ಪಾತ್ರವೆಲ್ಲ ಚರಿತ್ರೆಯಲ್ಲಿ ಕಳೆದಿದೆ
ಗುರಿಯ ಮರೆತು ಅಲೆಯುತಿರುವ ಮಂದಿಯೆನಿತು “ದೀಪು”
ಗಮ್ಯ ಮರೆತ ಬಾಳಚಕ್ರ ಶವ ಯಾತ್ರೆಯಲ್ಲಿ ಕಳೆದಿದೆ
✒ ✒ ✒
ಗಜ಼ಲ್
ನಿನ್ನಯ ತುಟಿಗಳ ಅಂಚಲಿ ಜಾರುವ
ಮುತ್ತಿನ ಮಣಿಗಳ ಎಣಿಸಿರುವೆ
ಚೆಲುವಿನ ಕಂಗಳು ಸೂಸುತ ಸೆಳೆಯುವ
ಮತ್ತಿನ ಹನಿಗಳ ಎಣಿಸಿರುವೆ
ಅಲೆವುದು ಸರಿಯೇ ಕನಸಿನ ಬೀದಿಯ
ಒಪ್ಪಿಗೆ ನೀನು ಪಡೆಯದೆಯೇ?
ಸುಳ್ಳೆನೆ ಸಾಕ್ಷಿಗೆ ಹೇಳದೆ ಊರಿದ
ಹೆಜ್ಜೆ ಗುರುತುಗಳ ಎಣಿಸಿರುವೆ
ಮೊನಚಿನ ನೋಟವು ತಾಕಿತೇನೊ
ಹೃದಯ ವೇದನೆಯು ಅತಿಮಧುರ
ಲೆಕ್ಕವು ತಪ್ಪದ ಹಾಗೆ ಮತ್ತೊಮ್ಮೆ
ನಾಟಿದ ಶರಗಳ ಎಣಿಸಿರುವೆ
ಇರುಳಲು ಮಿನುಗುವ ನಿನ್ನಯ ಮೊಗದ
ಮೆರುಗಿಗೆ ಉಪಮೆಯು ಬೇರಿಲ್ಲ
ಸೂರ್ಯ ಚಂದ್ರರ ಜೊತೆ ಆಗಸದ
ಎಲ್ಲ ತಾರೆಗಳ ಎಣಿಸಿರುವೆ
ಕಾಯಿಸಿ ಕಾಡುವದಿಷ್ಟ ನಿನಗೆಂದು
ಅರಿತು ಕಾಯುತಿಹ ‘ದೀಪು’
ವರ್ಷ ಮಾಸ ದಿನ ಗಂಟೆ ನಿಮಿಷದೊಳ
ಪ್ರತಿ ಕ್ಷಣಗಳ ಎಣಿಸಿರುವೆ
★★★
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ