ತ್ರಿಶಂಕು

• ಲೇಖಕರು
• ಇತ್ತೀಚಿನ ಬರಹಗಳು

ರೇವಣಸಿದ್ದಪ್ಪ ಜಿ.ಆರ್.

ದಾವಣಗೆರೆ ಜಿಲ್ಲೆಯ, ಹೊನ್ನಾಳಿ ತಾಲೂಕಿನ, ತಿಮ್ಲಾಪುರ ಗ್ರಾಮದವರಾದ ಇವರು ಎಂ.ಎ.(ಇಂಗ್ಲಿಷ್).,ಬಿ.ಇಡಿ. ಪದವೀಧರರು.

ದಾವಣಗೆರೆ ಜಿಲ್ಲೆಯ, ಚನ್ನಗಿರಿ ತಾಲೂಕಿನ,ಸಂತೇಬೆನ್ನೂರು ಹೋಬಳಿ ಕೇಂದ್ರದಲ್ಲಿರು ಎಸ್ಜೆವಿಪಿ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಆಂಗ್ಲ ಭಾಷಾ ಉಪನ್ಯಾಸಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಸಾಹಿತ್ಯದ ಓದು ಮತ್ತು ಕಾವ್ಯ ಕೃಷಿ ಇವರ ಪ್ರವೃತ್ತಿ. ಕಲೆ, ಸಂಗೀತ, ಸಂಸ್ಕೃತಿ, ಭಾಷಣ, ಚರ್ಚೆ ಇತ್ಯಾದಿಗಳು ಇವರ​ ಆಸಕ್ತಿಯ ವಿಷಯಗಳು.

ಇವರು ಸಂಕ್ರಮಣ ಸಾಹಿತ್ಯಸ್ಪರ್ಧೆ-೨೦೧೮ರ ಕಾವ್ಯ ವಿಭಾಗದಲ್ಲಿ ಬಹುಮಾನಿತರಾಗಿದ್ದಾರೆ.

ಇತ್ತೀಚಿನ ಬರಹಗಳು: ರೇವಣಸಿದ್ದಪ್ಪ ಜಿ.ಆರ್. (ಎಲ್ಲವನ್ನು ಓದಿ)

• ಪ್ರಕೃತಿ - ಅಕ್ಟೋಬರ್ 11, 2022
• ತ್ರಿಶಂಕು - ಆಗಸ್ಟ್ 21, 2022
• ಬಿಟ್ಟು ಬಂದ ಊರು - ಮೇ 28, 2022

ಕಲ್ಲಾಗಿದ್ದರೆ,
ಶಿಲ್ಪಿಯ ಚಾಣಕ್ಕೆ ಸಿಲುಕಿ
ಶಿಲ್ಪವಾಗಿ ರಸಿಕ ಕಂಗಳಿಗೆ
ಹಬ್ಬವಾಗಬಹುದಿತ್ತು;
ಯಾರದೋ ಮನೆಯ ಬುನಾದಿಯಲಿ
ಎದೆಯೊಡ್ಡಿ ನಿಲ್ಲಬಹುದಿತ್ತು.

ಮಣ್ಣಾಗಿದ್ದರೆ,
ಫಸಲಿಗೆ ಫಲವತ್ತತೆಯ ನೀಡಬಹುದಿತ್ತು;
ಭವದ ಬದುಕು ಮುಗಿಸಿ ಬಂದವರ
ಎರಕದಿಂದಾಲಿಂಗನ ಪಡೆಯಬಹುದಿತ್ತು.

ವಾಯುವಾಗಿದ್ದರೆ,
ಸುಳಿಗಾಳಿಯಾಗಿ ಸುತ್ತಿ
ನೊಂದವರ ಬೆಂದವರ ಒಡಲಿಗೆ
ತಂಪೆರೆಯಬಹುದಿತ್ತು;
ಪ್ರಾಣಿಕೋಟಿಗೆ ಪ್ರಾಣವಾಯುವ ನೀಡಿ
ಕೃತಾರ್ಥನಾಗಬಹುದಿತ್ತು.

ಮೇಘವಾಗಿದ್ದರೋ ಕರಗಿ
ದಾಹದಿ ತುಡಿಯುವ ಧಾತ್ರಿಯ
ತಣಿಸಬಹುದಿತ್ತು;
ನೇಗಿಲಯೋಗಿಯ ಬೆವರಿಗೆ
ತಕ್ಕಫಲ ನೀಡಬಹುದಿತ್ತು.

ಮನುಜನಾಗಿ
ಭವ ಸಂಕಷ್ಟದೊಳು ಸಿಲುಕಿ
ನಿರ್ದಯೆ, ನಿಷ್ಕರುಣೆ,ನಿಷ್ಕಾರಣಗಳ
ಜಗದಿ ಬೇರೂರದೆ,
ಮಾನವೀಯ ಔನತ್ಯಕ್ಕೆ
ಚಿಗುರಲೂ ಆಗದೆ
ತ್ರಿಶಂಕುವಾಗಿರುವೆ.