ದಾವಣಗೆರೆ ಜಿಲ್ಲೆಯ, ಚನ್ನಗಿರಿ ತಾಲೂಕಿನ,ಸಂತೇಬೆನ್ನೂರು ಹೋಬಳಿ ಕೇಂದ್ರದಲ್ಲಿರು ಎಸ್ಜೆವಿಪಿ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಆಂಗ್ಲ ಭಾಷಾ ಉಪನ್ಯಾಸಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.
ಸಾಹಿತ್ಯದ ಓದು ಮತ್ತು ಕಾವ್ಯ ಕೃಷಿ ಇವರ ಪ್ರವೃತ್ತಿ. ಕಲೆ, ಸಂಗೀತ, ಸಂಸ್ಕೃತಿ, ಭಾಷಣ, ಚರ್ಚೆ ಇತ್ಯಾದಿಗಳು ಇವರ ಆಸಕ್ತಿಯ ವಿಷಯಗಳು.
ಇವರು ಸಂಕ್ರಮಣ ಸಾಹಿತ್ಯಸ್ಪರ್ಧೆ-೨೦೧೮ರ ಕಾವ್ಯ ವಿಭಾಗದಲ್ಲಿ ಬಹುಮಾನಿತರಾಗಿದ್ದಾರೆ.
- ಪ್ರಕೃತಿ - ಅಕ್ಟೋಬರ್ 11, 2022
- ತ್ರಿಶಂಕು - ಆಗಸ್ಟ್ 21, 2022
- ಬಿಟ್ಟು ಬಂದ ಊರು - ಮೇ 28, 2022
ಬಿಟ್ಟುಬಂದ ಊರಿಗೆ
ಮತ್ತೆ ಹೊರಟು
ಆಗ ಹಿಡಿಯುತ್ತಿದ್ದ
ಬಸ್ಸನ್ನು ಮತ್ತೆ ಹಿಡಿದಾಗ
ಅದೇ ಕಂಡಕ್ಟರ್
ಎದುರುಗೊಂಡು
ಯುಗಾದಿಯ ಚಂದಿರನ
ಕಂಡಂತೆ ಹಿಗ್ಗಿ
ಆಡಬೇಕಿದ್ದ
ಮಾತುಗಳನ್ನೆಲ್ಲಾ ಆಡಿ
ಸಮಾಧಾನಗೊಂಡ.
ಆ ಬಸ್ಸೂ ಸಂಭ್ರಮಿಸಿದಂತೆ
ಮಾಮೂಲಿಗಿಂತ
ವೇಗವಾಗಿ ಓಟಕಿತ್ತಿತು.
ದಾರಿಗುಂಟ
ಸಾಲುಮರಗಳು, ನಿಲ್ದಾಣಗಳು,
ಹಕ್ಕಿಪಿಕ್ಕಿಗಳು,
ದಿಢೀರನೆ ಅಡ್ಡಬರುವ
ನಾಯಿಗಳು, ಎಮ್ಮೆಗಳು,
ಮುಂಗಸಿಗಳು, ಬೆಕ್ಕುಗಳು,
ನನ್ನಂತೆ
ಕಣ್ಣು, ಕಿವಿ, ಮೂಗು, ಬಾಯಿ
ವಗೈರೆಗಳ ಹೊಂದಿರುವ
ಆಕೃತಿಗಳಲ್ಲಿ
ಪರಿಚಿತ ಭಾವವನರಸುತ್ತಾ
ಹೋಗುತ್ತಿದ್ದೆ.
ಆ ಊರು,
ಆ ಊರಿನಲ್ಲೊಂದು ಕೇರಿ,
ಆ ಕೇರಿಯಲ್ಲೊಂದು ಮನೆ,
ಆ ಮನೆಗೊಂದು ಮಹಡಿ,
ಮಹಡಿಯ ಮೇಲೊಂದು ಕೊಠಡಿ,
ಆ ಕೊಠಡಿ
ನಾನಿರುವಷ್ಟು ಕಾಲ
ನನ್ನ ಅರಮನೆ.
ಇಲ್ಲಿರುವಂತೆಯೇ
ಸೂರ್ಯ ಅಲ್ಲಿಯೂ
ಪೂರ್ವದಲ್ಲಿ ಹುಟ್ಟಿ
ಪಶ್ಚಿಮದಲ್ಲಿ ಮುಳುಗುತ್ತಾನೆ.
ಈ ಸೂರ್ಯ
ಉದಯಿಸುವ ಪರ್ವಕಾಲಕ್ಕೆ
ಆ ಸೂರ್ಯನೂ
ಸಾಕ್ಷಿಯಾಗಿದ್ದಾನೆ.
ಯಾವುದೋ ಕಾಲದಲ್ಲಿ
ಜನ ತಳವೂರಿ
ಊರಾಗಿದ್ದ,
ಬೆಳೆದು ಪಟ್ಟಣವಾಗಿದ್ದ
ಜಾಗದಲ್ಲಿ
ನಾನೂ ಊರಬೇಕಾಗಿದ್ದು
ಉದರ ನಿಮಿತ್ತ
ಮಾತ್ರ ಆಗಿರಲಾರದು.
ಇಲ್ಲಿಯಂಥ ಮನುಷ್ಯರು
ಅಲ್ಲಿಯೂ ಇರಲು
ಒಳ್ಳೆಯವರು ಕೆಟ್ಟವರೆಂದು
ವಿಂಗಡಿಸಬೇಕಿಲ್ಲ.
ಒಳ್ಳೆಯವರಾರೋ ಕೆಟ್ಟವರಾರೋ
ಯಾರ ಹಣೆಯ ಮೇಲೆ
ಲೇಬಲ್ ಅಂಟಿಸಿರುವುದಿಲ್ಲ.
ಆ ಊರು, ಅಲ್ಲಿನ ಕೇರಿಗಳು,
ಗುಡಿಸಲುಗಳು, ಮನೆಗಳು, ಮಹಡಿಗಳು,
ಗಿಡಮರಬಳ್ಳಿ, ಕೆರೆಕೊಳ್ಳ,
ಮಣ್ಣು, ಮಸಣ,
ಮಂದಿರಮಸೀದಿಗಳು,
ಹರಸಿದ ಹೃದಯಗಳು,
ತಿದ್ದಿದ ಮನಸುಗಳು,
ಬಡಿಸಿದ ಕೈಗಳು,
ಸ್ಪಂದಿಸಿದ ಜೀವಗಳ
ನೆನಪಿನ ಬುತ್ತಿಯ
ಕಟ್ಟಿಕೊಂಡು ಬಂದಿರಲು
ಅದು ಅಕ್ಷಯಪಾತ್ರೆಯಾಗಿ
ನೆನಪಿನ ಸವಿಯನುಣಿಸುತ್ತಿರಲು
ಬಿಟ್ಟುಬಂದ ಊರು
ಬಿಟ್ಟುಕೊಡುವುದಿಲ್ಲ!
ಹೆಚ್ಚಿನ ಬರಹಗಳಿಗಾಗಿ
ಗಣೇಶನ ಕೈಯಲ್ಲಿಯ ಲಾಡು
ಮಹಾಸಾಗರವಾದಳು
ಹರಿಹರಪುರ ಗ್ರಾಮವೂ, ಲೊವೆಂಥಾಲ್ ಎಂಬ ಪಾದ್ರಿಯೂ..