ಬುದ್ಧ,ಬಸವ,ಅಂಬೇಡ್ಕರ್,ಗಾಂಧಿ ಮತ್ತು ನಾವು

• ಲೇಖಕರು
• ಇತ್ತೀಚಿನ ಬರಹಗಳು

ರೇವಣಸಿದ್ದಪ್ಪ ಜಿ.ಆರ್.

ದಾವಣಗೆರೆ ಜಿಲ್ಲೆಯ, ಹೊನ್ನಾಳಿ ತಾಲೂಕಿನ, ತಿಮ್ಲಾಪುರ ಗ್ರಾಮದವರಾದ ಇವರು ಎಂ.ಎ.(ಇಂಗ್ಲಿಷ್).,ಬಿ.ಇಡಿ. ಪದವೀಧರರು.

ದಾವಣಗೆರೆ ಜಿಲ್ಲೆಯ, ಚನ್ನಗಿರಿ ತಾಲೂಕಿನ,ಸಂತೇಬೆನ್ನೂರು ಹೋಬಳಿ ಕೇಂದ್ರದಲ್ಲಿರು ಎಸ್ಜೆವಿಪಿ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಆಂಗ್ಲ ಭಾಷಾ ಉಪನ್ಯಾಸಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಸಾಹಿತ್ಯದ ಓದು ಮತ್ತು ಕಾವ್ಯ ಕೃಷಿ ಇವರ ಪ್ರವೃತ್ತಿ. ಕಲೆ, ಸಂಗೀತ, ಸಂಸ್ಕೃತಿ, ಭಾಷಣ, ಚರ್ಚೆ ಇತ್ಯಾದಿಗಳು ಇವರ​ ಆಸಕ್ತಿಯ ವಿಷಯಗಳು.

ಇವರು ಸಂಕ್ರಮಣ ಸಾಹಿತ್ಯಸ್ಪರ್ಧೆ-೨೦೧೮ರ ಕಾವ್ಯ ವಿಭಾಗದಲ್ಲಿ ಬಹುಮಾನಿತರಾಗಿದ್ದಾರೆ.

ಇತ್ತೀಚಿನ ಬರಹಗಳು: ರೇವಣಸಿದ್ದಪ್ಪ ಜಿ.ಆರ್. (ಎಲ್ಲವನ್ನು ಓದಿ)

• ಪ್ರಕೃತಿ - ಅಕ್ಟೋಬರ್ 11, 2022
• ತ್ರಿಶಂಕು - ಆಗಸ್ಟ್ 21, 2022
• ಬಿಟ್ಟು ಬಂದ ಊರು - ಮೇ 28, 2022

ಬುದ್ಧ, ಅಂಬೇಡ್ಕರ್
ಮಹಾ ಪರಿನಿರ್ವಾಣ
ಹೊಂದಿದರು;
ಬಸವ ಲಿಂಗೈಕ್ಯರಾದರು;
ಗಾಂಧಿ ಹುತಾತ್ಮರಾದರು.
ಸುಮ್ಮನೆ
ಅವರು ಹೋದರೆನಲು
ಅವರು ಬದುಕಿದ್ದ
ಗಾಢ ಗಾಂಭೀರ್ಯ
ತೆಳುವಾಗಿ
ತೋರುತ್ತದೆ!

ನಮಗೆ ನಾವೇ
ಬುದ್ಧ, ಬಸವ, ಅಂಬೇಡ್ಕರ್
ಗಾಂಧಿ
ಆಗದೆ ಹೋದರೆ,
ಮಹಾತ್ಮರೆಂದು
ಅವರ ಪಟಗಳ
ನೇತುಹಾಕಿ
ಕೈಮುಗಿದು
ಕೈತೊಳೆದುಕೊಂಡರೆ,
ಸಹಜೀವಿಗಳೊಳಗಿನ
ಪರಮಾತ್ಮನಿಗೆ
ನಮ್ಮ ಕಣ್ಣು
ಕುರುಡಾಗುತ್ತದೆ!

ಬುದ್ಧ, ಬಸವ,ಅಂಬೇಡ್ಕರ್,
ಗಾಂಧಿ
ನಮಗೆ ದಕ್ಕಿದ್ದೆಷ್ಟು?
ಅವರ ಓದು, ಅರಿವು,
ಬಾಳ ಹರಹು
ನಮ್ಮ ಹೊಕ್ಕಿದ್ದೆಷ್ಟು?
ಅವರ ಅಪಾರ ಕರುಣೆಯ
ಕಡಲು
ನಮಗೆ ರಕ್ತಗತ
ಆಗಿದ್ದೆಷ್ಟು?

ನಮ್ಮ ನಮ್ಮ
ಮೂಗಿನ ನೇರಕ್ಕೆ
ನಮ್ಮ ಬುದ್ಧ,
ನಮ್ಮ ಬಸವ,
ನಮ್ಮ ಅಂಬೇಡ್ಕರ್,
ನಮ್ಮ ಗಾಂಧಿ
ನಮ್ಮವರಾಗುತ್ತಾರೆ!

ನಮ್ಮ ನಮ್ಮ
ಬುದ್ಧರು, ಬಸವರು, ಅಂಬೇಡ್ಕರ್ಗಳು,
ಗಾಂಧಿಗಳು
ತಮ್ಮ ತಮ್ಮಲ್ಲಿ
ಘರ್ಷಣೆಗಿಳಿದಾಗ
ಬುದ್ಧ,
ಬಸವ,
ಅಂಬೇಡ್ಕರ್,
ಗಾಂಧಿ,
ನಿಜಕ್ಕೂ
ಹೋಗುತ್ತಾರೆ!