ಮೃಗಾಲಯ

• ಲೇಖಕರು
• ಇತ್ತೀಚಿನ ಬರಹಗಳು

ಡಿ.ಎಮ್. ನದಾಫ್

ಹಲವಾರು ವರ್ಷಗಳಿಂದ ಕಾವ್ಯ ಕೃಷಿಯಲ್ಲಿ ತೊಡಗಿರುವ ಇವರು "ಪ್ರತೀಕಗಳಾಗುವದಿಲ್ಲ ಗೆಳೆಯ", "ಉದರದ ಸೊಲ್ಲು" ಕವನಸಂಕಲನ ಗಳನ್ನು "ಅಫಜಲಪುರ ದರ್ಶನ" ತಾಲೂಕಿನ ಇತಿಹಾಸ, ಸಾಹಿತ್ಯ, ಸಂಸ್ಕೃತಿಗಳ ಪರಿಚಯಾತ್ಮಕ ಕೃತಿಗಳನ್ನು ಪ್ರಕಟಿಸಿದ್ದಾರೆ. ಮಹಾಂತ ಜ್ಯೋತಿ, ಎರೆನಾಡು ಸಿರಿ, ಭೀಮರಥಿ, ಎಂಬ ಮೂರು ತಾಲೂಕು ಸಾಹಿತ್ಯ ಸಮ್ಮೇಳನ ಸ್ಮರಣ ಸಂಚಿಕೆಗಳನ್ನು ಸಂಪಾದಿಸಿದ್ದಾರೆ.
ಇವರು ಕನ್ನಡ ಸಾಹಿತ್ಯ ಪರಿಷತ್ತಿನ ಅಫಜಲಪುರ ತಾಲ್ಲೂಕು ಘಟಕದ ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಸಧ್ಯ ಕಲಬುರಗಿ ಜಿಲ್ಲೆ ಅಫಜಲಪುರದ ಮಹಾಂತೇಶ್ವರ ವಿದ್ಯಾವರ್ಧಕ ಸಂಘದ ಪ್ರೌಢಶಾಲೆಯಲ್ಲಿ ಅಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಇತ್ತೀಚಿನ ಬರಹಗಳು: ಡಿ.ಎಮ್. ನದಾಫ್ (ಎಲ್ಲವನ್ನು ಓದಿ)

• ಬಯಲ ಭಿಕ್ಕು - ಏಪ್ರಿಲ್ 6, 2021
• ಮೃಗಾಲಯ - ಆಗಸ್ಟ್ 4, 2020

ಈ ಮೃಗಾಲಯದ ರತ್ನಪಕ್ಷಿಯನ್ನು ನೋಡಿ
ಏನು ಕಿಲಕಿಲವೇ!
ಒಂದಿನಿತಾದರೂ ಇಣುಕು ನನ್ನೆದೆಯೊಳಗೆ
ಕಂಡೀತು ನಿನಗೆ ದಾವಾನಲವೇ!

ನಿರಿಗೆಯೆತ್ತಿ ಕಾಲು ತಾಗಸಬೇಡವೇ ನೆಲಕ್ಕೆ
ನನ್ನೆದೆಯೇ ನಿನ್ನ ಪಾದದ ನೆಲವಾಗಿ
ನಿನ್ನ ಹೆಜ್ಜೆಯ ಹೂ ಹೊರಲು ಸಿದ್ಧ
ನನ್ನ ಜೀವಹಂಸ ಹಾರಿಬಿಡಲೇ ಹೊರಕ್ಕೆ

ಕಣ್ಣು ಚಂಚಲಿಸಬೇಡವೇ ನಲ್ಲೇ
ಎದುರಿಗಿದೆ ಹುಲ್ಲೆ!
ಅದಕಿಂತ ನಿನ್ನ ಸ್ವಭಾವ
ಚಲ್ಲು-ಚಲ್ಲೇ!

ಇದು ಮೃಗಾಲಯವೇ ಮುಗುದೆ
ಬಳಿಯೇ ಇರುವೆನೇ ಭ್ರಮರೇ
ಅರೆಗಳಿಗೆಯಿತ್ತ ಹೊರಳಿಸೇ ಅಕ್ಷಿಪಟಲ
ನನ್ನೆದೆಯೊಳಗಿದೆ ಪ್ರೀತಿ ಬಾನಗಲ

ವಿಜಯಪುರದ ವೈಭವದಗೋಳಗುಮ್ಮಟ
ಮೈಸೂರು ಬೀದಿಗಳ ವಿಶಾಲತೆ
ಅರಮನೆಯ ಕೃತಕ ಬೆಳಕೆಲ್ಲ
ಮರೆತು ಇರು ಇಲ್ಲೇ ನನ್ನ ಪ್ರೀತಿಯ ಹುಲ್ಲೆ.

ನಾನು ಕೊಡಲಾರದ ಗುಟುಕು ಕೊಡುತ್ತದೆ
ಈ ರತ್ನ ಪಕ್ಷಿ ನಿನಗೆ,
ನಾನಿಡಲಾಗದ ಕಾವಲಿಡುತ್ತದೆ
ಈ ಜಿರಾಫೆ, ನೊಡದರ ಕುತ್ತಿಗೆ

ನೀನಿಲ್ಲಿಯೇ ಇರೆ ನನ್ನ “ಪರಿ”
ಪ್ರಾಣಿಗಳೆಂದು ಕರೆಸಿಕೊಳ್ಳುವ “ಫರಿಸ್ತೆ”ಗಳೊಂದಿಗೆ
ನಾನಿರುವೆನಲ್ಲಿ ಮನುಷ್ಯರೆಂಬ”ಸೈತಾನ”ರೊಂದಿಗೆ