ಹಸಿ ಬಾಯಾರಿಕೆ..

• ಲೇಖಕರು
• ಇತ್ತೀಚಿನ ಬರಹಗಳು

ಶಶಿ ತರೀಕೆರೆ

ಇತ್ತೀಚಿನ ಬರಹಗಳು: ಶಶಿ ತರೀಕೆರೆ (ಎಲ್ಲವನ್ನು ಓದಿ)

• ಹಸಿ ಬಾಯಾರಿಕೆ.. - ಜೂನ್ 13, 2020

ನೀನೀಗ ಟಾಕೀಸು ಕಡೆಗಣಿಸಿ
ಬಿಸಿಲಿಗೆ ಬೆಚ್ಚಿದ ನದಿಯ
ನೀರು ಕುಡಿಯದೆ
ದಣಪೆಯನ್ನು ದಾಟಿ
ಊರ ತೊರೆದು ಹೋಗುತ್ತಿದ್ದಿಯ

ನೀ ಬೇರೆ ಊರು ಸೇರುವ ಮುನ್ನ
ನಿನ್ನ ಬಾಯಾರಿಕೆ
ಇನ್ಯಾವುದೋ ನದಿಯ ಸೆಳೆತಕ್ಕೆ ಸಿಕ್ಕು
ಇನ್ನೆಲ್ಲೋ ನಿನಗಾಗಿ ಜನಿಸುವುದು
ಒಂದು ಬಿಕ್ಕಳಿಕೆಯಾಗಿ, ಅಥವಾ
ಉಪ್ಪು ಬೆರೆಸಿಟ್ಟ ಒಣ ಮೀನಾಗಿ

ಮತ್ತೆ ಹಿಂದಿರುಗಿ ನೋಡು
ನದಿ ನಿನ್ನನೇ ತುಂಬಿ ಕರೆಯುತಿದೆ
ಟಾಕೀಸಿನ ಹೊಸ ಪೋಸ್ಟರ್
ನಿನ್ನ ಗಮನಕ್ಕೆ ಕಾಯುತಿದೆ
ಒಮ್ಮೆ ಆದರೂ ಕಣ್ಣು ಹಾಯಿಸಿ ಹೋಗು

ನದಿಯ ಆಳಕ್ಕೆ ಬಾಯಾರಿಕೆ ಇಲ್ಲಿಯೇ
ಬಿಟ್ಟು ಹೋಗು
ಬಸ್ಸಿನಲ್ಲಿ ಹೀಗೆ ನಿದ್ದೆ ಹೋದಾಗ
ನಿನ್ನ ತುಟಿ ಕಂಪಿಸಿ
ಕೊರಳು ಉಬ್ಬುವಾಗ ಈ ಊರು
ಆತಂಕದಲ್ಲಿ ಅತ್ತಿಂದಿತ್ತ ಹೊಯ್ದಾಡುತ್ತದೆ
ಥೇಟು ಆಯಿ ನಿನ್ನ ಕಳೆದುಕೊಂಡಂತೆ

ನಿನ್ನ ಇಡೀ ಲಗೇಜಿನ ನಿಗಾ
ಬೇರೊಂದು ಊರು ವಹಿಸಲಿ
ಈ ದಟ್ಟ ದಣಪೆ
ಹಾಲಿನ ಜಿಡ್ಡು ಪಾತ್ರೆಯಂತಹ ನಿನ್ನ ಮೈ
ಬೆಚ್ಚಗಿಡುತ್ತದೆ ವಾಪಾಸು ಬಾ
ಎಲ್ಲ ಒಮ್ಮೆ ನೋಡಿ ಹೋಗು

ನಿನ್ನ ಹಸಿ ಬಾಯಾರಿಕೆ
ಈ ನದಿಯಲ್ಲಿಯೇ ಬಿಟ್ಟು ಹೋಗು