ಅಂಥಿಂಥ ಉರಿಯಲ್ಲ

• ಲೇಖಕರು
• ಇತ್ತೀಚಿನ ಬರಹಗಳು

'ಶಮ್ಮಿ'

'ಶಮ್ಮಿ ' ಎಂಬ ಕಾವ್ಯನಾಮ ದೊಂದಿಗೆ ಬರೆವ ಮಹಿಮಾ ಅವರುಶಿವಮೊಗ್ಗ ಜಿಲ್ಲೆಯಯವರು. ಸೊರಬ ತಾಲ್ಲೂಕಿನ ಅವಲಗೋಡು ಗ್ರಾಮದಲ್ಲಿ ಜನನ. ಕನ್ನಡ ಸಾಹಿತ್ಯ, ಸಂಸ್ಕೃತ ವಾಗ್ಮಯ,ಹಿಂದಿಯ ಸಾಹಿತ್ಯಇಷ್ಟದ ವಿಷಯಗಳು. ಸದ್ಯ ಗಂಡ ಮಗನೊಂದಿಗೆ ಬೆಂಗಳೂರಿನಲ್ಲಿ ವಾಸ... ಮಹಿಮಾ ಅವರು ತುಂಬಾ ವಿಭಿನ್ನವಾಗಿ, ದಿಟ್ಟವಾಗಿ ಸ್ತ್ರೀ ಸಂವೇದನೆಯನ್ನು ದಾಖಲಿಸುವ, ಆಪ್ತ ಚಿಂತನೆಗಳ ಕವಿತೆಗಳನ್ನು ಬರೆಯುವುದರಲ್ಲಿ ಎತ್ತಿದ ಕೈ..

ಇತ್ತೀಚಿನ ಬರಹಗಳು: 'ಶಮ್ಮಿ' (ಎಲ್ಲವನ್ನು ಓದಿ)

• ಅಸಂಗತ - ಜನವರಿ 30, 2022
• ಅಂಥಿಂಥ ಉರಿಯಲ್ಲ - ಜುಲೈ 19, 2020

ಅಂತಿಂಥ ಉರಿಯಲ್ಲ
ಮೂಲದಿಂದ ಅನಾಹತದವರೆಗೂ
ಒಂದೇ ಸಮನೆ ಚಾಚಿ
ಬೆಂಕಿ ತನ್ನ ಬೆರಳದಳ
ಸಹಸ್ರಾರಕ್ಕೆ ಹತ್ತಿದ ದಾವಾನಲ

ಪಕ್ಕದಲ್ಲಿ ಕೂತವ ನೊಸಲುಗಣ್ಣ
ಮುಚ್ಚಿ ತುಸುವೇ ನಗುತ್ತಾನೆ
ನೀಲ ಕಂಠ ನೀವಿ ಕುಚೋದ್ಯ ನುಂಗುತ್ತಾನೆ
ಬಳ್ಳಿಬೇರುಗಳ ಜಟೆಯಲಿ
ರಭಸದಲ್ಲಿ ಬಿದ್ದು ಅವಸರದಿ ಬುವಿ
ಇಳಿಜಾರಿಗೆ ಓಡುವ ಹೆಣ್ಣ
ಕಣ್ಣಿನಲ್ಲಿ ಪ್ರೀತಿಸುವುದ ಎಂದು ಕಲಿತ ಈ ಮುಕ್ಕಣ್ಣ?

ನಾರು ಮಡಿ, ಶೀತಲ ಜಲಸ್ನಾನ
ಮತ್ತದರಲೇ ಅಡಿಗೆ…
ಬೇಯಿಸಿದ ಪಕ್ವಾನ್ನ ಗಣಗಳಿಗೆ
ಹಿಡಿಸುವುದಿಲ್ಲ
ಮೂಗು ದಿಟ್ಟಿಸುತ್ತ ಕೂತರೆ
ಕೈಲಾಸ ಉಣುವುದಿಲ್ಲ
ಚಕ್ರಗಳಿಗೆಲ್ಲ ಈಗ ಸಂಸಾರದ ಬಂಧನ
ಇಲ್ಲಿ ಆರು ತಿಂಗಳು ಶ್ರಾವಣ ವಸಂತ
ಉಳಿದಾರು ಬರೀ ಹಿಮ ,
ಮತ್ತವನೂ ಸಂತ

ಕಣ್ಣಲ್ಲೇ ಬೆಂಕಿ ಹೊತ್ತಿಸಿ
ಒಟ್ಟಿ ಸಿದ್ಧಿಗಳ ತಟ್ಟಂತ
ಅಡಿಗೆಯೇನೋ
ಮಾಡಿಬಿಡಬಹುದು
ಸಪ್ತನದಿಗಳ ಕರೆದು ಮಿಂದು
ಬೆಚ್ಚಗೆ ಉಯ್ಯಾಲೆಯೂ ಆಡಬಹುದು
ಮಕ್ಕಳಲಿ ಲೋಕವನು ಸುತ್ತಿ ಬರುವಂತೆ
ಸಲ್ಲಾಪ ಹೂಡ ಬಹುದು
ಕೊನೆಯಿರದ ಕನಸ ನನಸು
ಮಾಡಲೂ ಬಹುದು
ಕಾವ್ಯ ನೃತ್ಯಕೇಳಿಯ ಹಬ್ಬದಲಿ
ಮೈ ಮನಸ ಮರೆಸಬಹುದು…..

ಲೋಕಗಳ ಕರೆಯಲ್ಲಿ
ಕಿವಿಗೆ ಬೀಳುವ ಅರ್ತತೆಯ ನಾದದಲಿ
ಕತ್ತಲ ಲೋಕದಿಳಿಜಾರಿನಲಿ
ಜೀವಿಗಳ ಪ್ರಾರ್ಥನೆ ಸದಾ ರಿಂಗಣಿಸಿ
ಒಳಗೆ ಅಮ್ಮ ಸುಡುವಳು
ವೈತರಣಿ ಯ ಕೂಪದಲ್ಲಿ
ಬಿದ್ದ ಆತ್ಮಗಳ ಕೂಗು
ಕಲಕಿರಲು ಧ್ಯಾನಸ್ಥಿತಿ
ಜಗನ್ಮಾತೆ ಉರಿವಳು…

ಅಂಥಿಂಥ ಉರಿಯಲ್ಲ
ಇದು ತಾಯೊಡಲ ಉರಿ