ಮಾತೆಂದರೆ ಏನು ಗೂಗಲ್ ..

• ಲೇಖಕರು
• ಇತ್ತೀಚಿನ ಬರಹಗಳು

ನೂತನ ದೋಶೆಟ್ಟಿ

ಮೂಲತಃ ಉತ್ತರಕನ್ನಡದ ಸಿದ್ಧಾಪುರದವರಾದ ನೂತನ ಎಂ. ದೋಶೆಟ್ಟಿ ಅವರು ಆಕಾಶವಾಣಿಯಲ್ಲಿ ಕಾರ್ಯಕ್ರಮ ನಿರ್ವಾಹಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇವರ ಏಳಕ್ಕೂ ಹೆಚ್ಚು ಕೃತಿ,ಕಾವ್ಯಗಳ ಸಂಕಲನಗಳು ಲೋಕಾರ್ಪಣೆಗೊಂಡಿದ್ದು, ಇವರ ಅನೇಕ ಬರಹಗಳು ನಾಡಿನ ಹಾಗೂ ಆಂಗ್ಲದ ಹೆಸರಾಂತ ಪತ್ರಿಕೆಗಳಲ್ಲಿ ಪ್ರಕಟಗೊಂಡಿವೆ.

ಇತ್ತೀಚಿನ ಬರಹಗಳು: ನೂತನ ದೋಶೆಟ್ಟಿ (ಎಲ್ಲವನ್ನು ಓದಿ)

• ವಿಂಗಡಿಸಿ ನೋಡು - ಅಕ್ಟೋಬರ್ 23, 2022
• ಆ ರಾತ್ರಿ - ಸೆಪ್ಟೆಂಬರ್ 15, 2021
• ಪ್ರಮಾಣ​ - ಸೆಪ್ಟೆಂಬರ್ 5, 2021

ಅಜ್ಜ ಮೂಗಿನ ಮೇಲೆ ಬೆರಳಿಟ್ಟು ಕೂತಿದ್ದಾನೆ,
ಮನೆಯಂಗಳದ ಮಾವಿನ ಮರ ಅವನ ಕನಸಿನಲ್ಲಿ….!

ನೂತನ ದೋಶೆಟ್ಟಿ ಅವರ ‘ಮಾತೆಂದರೆ ಏನು ಗೂಗಲ್’ ಕವಿತೆಯಿಂದ

ಜಗಮಗಿಸುವ ದೀಪಗಳು ನಗುತ್ತಿವೆ
ಹಾಗೆ ಅನ್ನಿಸುತ್ತಿರಬಹುದೆ?
ನದಿಗಳ ಕಣ್ಣೀರು ಕಾಣದಷ್ಟು
ದೂರದಲ್ಲಿವೆ ಅವು

ಮುಗಿಲೆತ್ತರದ ಸಿಮೆಂಟು ಗೋರಿಗಳಲ್ಲಿ
ಸುಖವೋ ಸುಖ
ಹಾಗೆ ಅನ್ನಿಸುತ್ತಿರಬಹುದೆ?
ಗುಬ್ಬಿಗಳು ಚದುರಿವೆ ಕಾಗೆಗಳು ಬೆದರಿವೆ
ಉಸಿರಾಡದ ಹಸುರಿಗೆ ಸೋಂಕು ರೋಗ

ತಣ್ಣನೆಯ ಗಾಳಿಯೆಂದರೆ ತಾನೆ
ಏರ್ ಕಂಡೀಷನ್ನಿಗೆ ಅನ್ನಿಸಿರಬಹುದೆ?
ಅಜ್ಜ ಮೂಗಿನ ಮೇಲೆ ಬೆರಳಿಟ್ಟು ಕೂತಿದ್ದಾನೆ
ಮನೆಯಂಗಳದ ಮಾವಿನ ಮರ ಅವನ ಕನಸಿನಲ್ಲಿ

ಅವನಿಗೆ ಕತೆ ಹೇಳಲೆ
ಬಾಯಿಪಾಠ ಮಾಡಿಸಲೇ
ಅಜ್ಜಿಗೆ ಅನ್ನಿಸಿರಬಹುದೆ?
ಮಾತೆಂದರೆ ಏನು ಗೂಗಲ್
ಮೊಮ್ಮಗು ಕೇಳುತ್ತದೆ.

ನಾನು ಹೀಗಿದ್ದೆನೆ
ಬದಲಾಗಿಬಿಟ್ಟೆನೆ
ಮಾತಿಗೆ ಅನ್ನಿಸಿರಬಹುದೆ?
ಮೈಂಡ್ ಯುವರ್ ಲ್ಯಾಂಗ್ವೇಜ್
ಹೆಂಡತಿ ಹೇಳುತ್ತಳೆ
ಯೂ ಬಿಚ್ ಎನ್ನುತ್ತಾನೆ ಗಂಡ.

ಪಬ್ಬು ಬಾರುಗಳಲ್ಲಿ
ಆ ಹುಡುಗಿಯ ಕುಲುಕಿಗೂ ಬೆಲೆ ಕಟ್ಟುತ್ತಾರೆ
ಹಾಗೆ ಅನ್ನಿಸುತ್ತಿರಬಹುದೆ?
ಮನೆಯಲ್ಲಿ ಸೂರೆ ಹೋಗುತ್ತಿರುವ ಸುಖ ಅಣಕಿಸುತ್ತಿದೆ.

ಮೌನ ದುಃಖಿಸುತ್ತಿದೆಯೊ
ನಗುತ್ತಿದೆಯೊ?
ಕಳೆದುಕೊಳ್ಳುವುದು ದುಃಖ
ಪಡೆಯುವುದು ಸಂತಸವೇ
ಏನು ಕಳೆದದ್ದು
ಯಾವುದು ಪಡೆದದ್ದು !!