ಅಂತರ್ಮುಖಿ

• ಲೇಖಕರು
• ಇತ್ತೀಚಿನ ಬರಹಗಳು

ನಾ ದಿವಾಕರ

ಕೋಲಾರ ಜಿಲ್ಲೆಯ ಬಂಗಾರಪೇಟೆಯವರಾದ ನಾ. ದಿವಾಕರ ಕೆನರಾ ಬ್ಯಾಂಕಿನಲ್ಲಿ 35 ವರ್ಷದ ಸೇವೆಯ ಬಳಿಕ ಸ್ವಯಂ ನಿವೃತ್ತಿಯಾದವರು.
ಪ್ರವೃತ್ತಿಯಿಂದ ಲೇಖಕರು. ಅನೇಕ ಲೇಖನ ಬರಹ, ಅನುವಾದ ಮತ್ತು ಕವಿತೆಗಳನ್ನು ರಚಿಸಿದ್ದಾರೆ .
ದಿವಾಕರ್ ಅವರ ಇಪ್ಪತ್ತಕ್ಕೂ ಹೆಚ್ಚು ಪುಸ್ತಕಗಳು ಪ್ರಕಟವಾಗಿದ್ದು, ಪ್ರಥಮ ಕವನ ಸಂಕಲನ ಅಚ್ಚಿನಲ್ಲಿದೆ.

ಇತ್ತೀಚಿನ ಬರಹಗಳು: ನಾ ದಿವಾಕರ (ಎಲ್ಲವನ್ನು ಓದಿ)

• ಭಾರತದಲ್ಲಿ ಕಳೆದುಹೋಗುತ್ತಿರುವ ವೈಜ್ಞಾನಿಕ ಪ್ರಜ್ಞೆ - ಸೆಪ್ಟೆಂಬರ್ 3, 2022
• ನವ ಭಾರತ ಹಿಂಸೆಯ ತಾಣವಾಗುತ್ತಿದೆಯೇ ? - ಮೇ 1, 2022
• ಯುದ್ಧೋನ್ಮಾದದ ಅಲೆಯೂ ಪ್ರಜಾತಂತ್ರದ ಆಶಯಗಳೂ - ಮಾರ್ಚ್ 1, 2022

ಮಳೆಯಲಿ ಮಿಂದ ಕಂಬನಿ-
ಹನಿಯೊಳು ಶತಮಾನದ ವೇದನೆ
ಕೊಚ್ಚಿ ಹೋದರೇನು
ನಿಂತು‌ ನಿಲುಕದು ಪಯಣದ ಹಾದಿ ;
ಹಣೆಯ ಮೇಲಿನ ಹನಿಗೆ
ಕಣ್ ರೆಪ್ಪೆಯೇ ಸನಿಹದಾಸರೆ
ಬೆವರು-ಕಂಬನಿಗಳೇಕೆ ದೂರ
ಹಿಡಿ ಗಾತ್ರದ ಹೃದಯದಲಿ
ತುಡಿವ ನಾಡಿ,,,, ಮಿಡಿದುದೇ ಭಾಗ್ಯ ;

ಹಾಡುಹಕ್ಕಿಯ ಧ್ವನಿಗೆ
ತಾಳ ಮದ್ದಳೆಗಳ ಹಂಗಿರಲೇಕೆ
ಕಡಲನಪ್ಪುವ ನದಿ ಕಲರವಕೆ
ಜಲಚರಗಳ ಚಿಂತೆಯಿರಲಹುದೇ
ನಿಶ್ಶಬ್ಧತೆಯ ಕತ್ತಲ ಪಯಣದಲಿ
ಹೆಜ್ಜೆಗೆಟಕುವುದು ಏನಾದರೇನು
ಬದುಕು ನಿಗೂಢತೆಯ ಸಂತೆ
ಅನುಸಂಧಾನದ ಸರಕೆಲ್ಲವೂ
ಕ್ಷಣ ಮಾತ್ರದ ಕನಸುಗಳು ;

ಸಂಬಂಧಗಳ ಸರಪಳಿಯಲಿ
ಕೊಂಡಿಗಳದೇ ಹೆಣಭಾರ
ಬೆಸೆದ ಬೆರಳುಗಳ ನಡುವಿನ
ಸ್ವೇಧ ಕಣಗಳಿಗಾದರೂ
ತೊಗಲ ಹಂಗಿರಬಾರದೇ ?
ಬಾಂಧವ್ಯದ ಧಾರೆಯಲಿ
ಹರಿವುದು ಹೊಸೆದ ಬಂಧವೋ
ಬೆಸೆದ ಪ್ರೀತಿಯೋ,,, ಜಿಜ್ಞಾಸೆ
ಮುಳುಗಿ ತೇಲಿ ಮೇಲೆದ್ದಾಗ
ಎದುರಾದುದೆಲ್ಲವೂ ಮಿಥ್ಯೆ !