ಇದ್ದಂತಿದ್ದರೂ ಇಲ್ಲವಾದಾಗ….

• ಲೇಖಕರು
• ಇತ್ತೀಚಿನ ಬರಹಗಳು

ನಾ ದಿವಾಕರ

ಕೋಲಾರ ಜಿಲ್ಲೆಯ ಬಂಗಾರಪೇಟೆಯವರಾದ ನಾ. ದಿವಾಕರ ಕೆನರಾ ಬ್ಯಾಂಕಿನಲ್ಲಿ 35 ವರ್ಷದ ಸೇವೆಯ ಬಳಿಕ ಸ್ವಯಂ ನಿವೃತ್ತಿಯಾದವರು.
ಪ್ರವೃತ್ತಿಯಿಂದ ಲೇಖಕರು. ಅನೇಕ ಲೇಖನ ಬರಹ, ಅನುವಾದ ಮತ್ತು ಕವಿತೆಗಳನ್ನು ರಚಿಸಿದ್ದಾರೆ .
ದಿವಾಕರ್ ಅವರ ಇಪ್ಪತ್ತಕ್ಕೂ ಹೆಚ್ಚು ಪುಸ್ತಕಗಳು ಪ್ರಕಟವಾಗಿದ್ದು, ಪ್ರಥಮ ಕವನ ಸಂಕಲನ ಅಚ್ಚಿನಲ್ಲಿದೆ.

ಇತ್ತೀಚಿನ ಬರಹಗಳು: ನಾ ದಿವಾಕರ (ಎಲ್ಲವನ್ನು ಓದಿ)

• ಭಾರತದಲ್ಲಿ ಕಳೆದುಹೋಗುತ್ತಿರುವ ವೈಜ್ಞಾನಿಕ ಪ್ರಜ್ಞೆ - ಸೆಪ್ಟೆಂಬರ್ 3, 2022
• ನವ ಭಾರತ ಹಿಂಸೆಯ ತಾಣವಾಗುತ್ತಿದೆಯೇ ? - ಮೇ 1, 2022
• ಯುದ್ಧೋನ್ಮಾದದ ಅಲೆಯೂ ಪ್ರಜಾತಂತ್ರದ ಆಶಯಗಳೂ - ಮಾರ್ಚ್ 1, 2022

ದಿಬ್ಬದಾಚೆಗಿನ ಹೊಂಡದಲಿ
ತಿಳಿಗೊಳದ ಮಡು
ನಸುಕು ಮಬ್ಬೆಳಕಿನ ಕೆಂಪು
ಸುಡು ಬಿಸಿಲ ದೀವಟಿಗೆ
ಕದಡುವ ಸದ್ದಿನ ನಡುವೆ
ಬೂಟುಗಾಲಿನ ಸಪ್ಪಳ
ಬಿತ್ತಿದವನ ಪಿಸುಮಾತುಗಳು
ಹೆತ್ತವ್ವನೊಡಲಿನ ಕರೆಗೆ ;

ಸಾಲು ಕಾಲುವೆಗಳ ನಡುವೆ
ಪೀಳಿಗೆಗಳ ಬದುಕು
ನೊಗದ ಕುಲ ಮೊಗೆದ ಬಲ
ಕೆಸರಿಗಂಟಿದ ಬೆವರಿನಲಿ
ಜನ್ಮಕಂಟಿದ ಬವಣೆ
ಮಳೆ ಹನಿಗೆ ಇಳೆ ದನಿಗೆ
ಇಬ್ಬನಿಯ ಮೃದು ಸ್ಪರ್ಶ
ಹಟ್ಟಿಯೊಳಗಿನ ಒಲೆಯಲಿ
ಸುಟ್ಟ ರೊಟ್ಟಿಯ ಕಮಟು ;

ಉಂಡೆಸೆದ ಎಲೆಗಾಗಿ
ಹಸಿದ ಸಂಕುಲದ ಸಾಲು
ಬತ್ತಿದೆದೆಗವುಚಿದ ಕೂಸಿಗೆ
ಕಂಬನಿಯ ಗುಟುಕು
ತರಗೆಲೆಯ ಅಂಚಿನಲಿ
ಜೀವರಸದ ಸಾಲುಹನಿ
ಚಿರನಿದ್ರೆಯ ತಾಣದಲಿ
ಜೀವಕೋಶದ ಶೋಧ ;

ಹಸಿರ ಹೊದಿಕೆಯ ಮೇಲೆ
ಬಸಿದ ನೆತ್ತರ ಕಲೆ
ಕುಡಿ ಎಲೆಯ ಬೇರಿನಲಿ
ಕರಿಚುಕ್ಕೆಗಳ ಚಿತ್ತಾರ
ಬೆಳೆದ ಪೈರಿನ ರುಂಡ
ಒಣ ಟೊಂಗೆಗೆ ಮುಕುಟ
ಪೊಟರೆಯೊಳಗಿನ ಹಕ್ಕಿಗೆ
ರೆಕ್ಕೆ ಮೂಡುವ ತವಕ ;

ಬಿರಿದ ಕೆಸರೊಡಲಿನಲಿ
ನೊಗದ ಮೌನ ನಿರಶನ
ಹರಿವ ತೊರೆಗಳಂಚಿನಲಿ
ಎರೆಹುಳುಗಳ ಮೆರವಣಿಗೆ
ಇದ್ದು ಇಲ್ಲವಾಗುವ ನಿನ್ನೆ
ಇಲ್ಲದಂತೆಯೂ ಇರುವ ನಾಳೆ
ಸವೆದ ಚಕ್ರಗಳ ಹೆಜ್ಜೆಯಲಿ
ಬದುಕು ಕಟ್ಟುವ ಕನಸು !