ಚದುರಿದ ಗೂಡಿನಲಿ…

• ಲೇಖಕರು
• ಇತ್ತೀಚಿನ ಬರಹಗಳು

ನಾ ದಿವಾಕರ

ಕೋಲಾರ ಜಿಲ್ಲೆಯ ಬಂಗಾರಪೇಟೆಯವರಾದ ನಾ. ದಿವಾಕರ ಕೆನರಾ ಬ್ಯಾಂಕಿನಲ್ಲಿ 35 ವರ್ಷದ ಸೇವೆಯ ಬಳಿಕ ಸ್ವಯಂ ನಿವೃತ್ತಿಯಾದವರು.
ಪ್ರವೃತ್ತಿಯಿಂದ ಲೇಖಕರು. ಅನೇಕ ಲೇಖನ ಬರಹ, ಅನುವಾದ ಮತ್ತು ಕವಿತೆಗಳನ್ನು ರಚಿಸಿದ್ದಾರೆ .
ದಿವಾಕರ್ ಅವರ ಇಪ್ಪತ್ತಕ್ಕೂ ಹೆಚ್ಚು ಪುಸ್ತಕಗಳು ಪ್ರಕಟವಾಗಿದ್ದು, ಪ್ರಥಮ ಕವನ ಸಂಕಲನ ಅಚ್ಚಿನಲ್ಲಿದೆ.

ಇತ್ತೀಚಿನ ಬರಹಗಳು: ನಾ ದಿವಾಕರ (ಎಲ್ಲವನ್ನು ಓದಿ)

• ಭಾರತದಲ್ಲಿ ಕಳೆದುಹೋಗುತ್ತಿರುವ ವೈಜ್ಞಾನಿಕ ಪ್ರಜ್ಞೆ - ಸೆಪ್ಟೆಂಬರ್ 3, 2022
• ನವ ಭಾರತ ಹಿಂಸೆಯ ತಾಣವಾಗುತ್ತಿದೆಯೇ ? - ಮೇ 1, 2022
• ಯುದ್ಧೋನ್ಮಾದದ ಅಲೆಯೂ ಪ್ರಜಾತಂತ್ರದ ಆಶಯಗಳೂ - ಮಾರ್ಚ್ 1, 2022

ಜೀವ ಭಾವದ ನಡುವೆ
ಎನಿತು ಅಂತರ
ಎದೆಯ ಭಾಷೆಯ ಸಿಕ್ಕು
ಮನದ ಮಾತುಗಳ ಬಿಕ್ಕು
ಒಡಲ ನೆಲೆಗಳಲವಿತು
ದಿಕ್ಕುಗಳೆಣಿಸುವಾಗ
ಚಿತ್ತ ಚಿತ್ತಾರದ ರಂಗು
ಕಣ್ಣೆವೆಗಳ ಬಿಂಬದಲಿ ;

ತುಳಿದ ಹಾದಿಯ ನೋವು
ಸವೆದ ಘಳಿಗೆಗಳ ಬೇವು
ಏರುದನಿಗಳಲೆಗಳಲಿ
ತಳಸೇರಿದ ಚೀತ್ಕಾರ
ಶಿಥಿಲ ಸೇತುಗಳ ದಾಟಿ
ಹರಿಗೋಲನರಸುವ ತವಕ
ತೆರೆಯಂಚಿನ ಗೂಡಿನಲಿ
ಮರಿ ಹಕ್ಕಿಯ ಪುಳಕ ;

ಮೌನ ವೃಕ್ಷದ ಎಲೆಗೆ
ಬೀಸುಗಾಳಿಯ ಬಯಕೆ
ಬೇರಲಡಗಿದ ಸದ್ದು
ಒಡಲಾಳದಲಿ ಲೀನ
ನೆಲದ ಮೇಲಿನ ಇಬ್ಬನಿಗೆ
ಹಸಿರ ಹೊದಿಕೆಯ ಆಸೆ
ಮುರಿದ ಬಳ್ಳಿಯ ನೊಸಲು
ತರಗೆಲೆಗಳ ಪಾಲು ;

ಪೊರೆದ ಸೂರಿನ ನೆರಳು
ಮರಳುಗಾಡಿನ ಕಂಪು
ಮಿಡಿದ ಹೆಜ್ಜೆಗಳ ನಾದ
ಸವೆದ ಪಾದಗಳ ಬಿರುಕು
ಅಟ್ಟ ಸೇರಿದ ಜೋಲಿ
ಉಟ್ಟ ಅರಿವೆಯ ಹೊಳಪು
ಸುಟ್ಟ ಕರುಳಿನ ಮಾತು
ಮಸಣ ಮೌನಕೆ ಶರಣು !