ಜಿ. ವೆಂಕಟಸುಬ್ಬಯ್ಯ

• ಲೇಖಕರು
• ಇತ್ತೀಚಿನ ಬರಹಗಳು

ಶಂಕರನಾರಾಯಣ ಉಪಾಧ್ಯಾಯ

ಕವಿ, ವಿದ್ವಾಂಸ, ರಂಗಕರ್ಮಿ, ಕೊರ್ಗಿ ಶಂಕರನಾರಾಯಣ ಉಪಾಧ್ಯಾಯರು ನಮ್ಮ ನಡುವಿನ ಒಬ್ಬ ಬಹುಮುಖ ಪ್ರತಿಭೆ.
ಬಿಎಸ್ಎನ್ಎಲ್ ನಲ್ಲಿ ಉದ್ಯೋಗ ನಿರ್ವಹಿಸಿ ನಿವೃತ್ತರಾದ ಶ್ರೀ ಉಪಾಧ್ಯಾಯರು ಪ್ರಸ್ತುತ ಕರ್ನಾಟಕ ನಾಟಕ ಅಕಾಡೆಮಿಯ ಸದಸ್ಯರೂ ಹೌದು.
ಇವರ ತಂದೆ ದಿ. ಸೂರ್ಯನಾರಾಯಣ ಉಪಾಧ್ಯಾಯರು ಪ್ರಸಿದ್ಧ ಪ್ರಸಂಗಕರ್ತರು. ಅಣ್ಣ ವೆಂಕಟರಮಣ ಉಪಾಧ್ಯಾಯರು ಕೂಡ ಪ್ರಸಿದ್ಧ ಯಕ್ಷಗಾನ ಅರ್ಥಧಾರಿಗಳು. ಹೀಗೆ ಕಲೆ ಕೊರ್ಗಿಯವರ ರಕ್ತದಲ್ಲೇ ಇದೆ ಎನ್ನಬಹುದು.
ಶ್ರೀ ಉಪಾಧ್ಯಾಯರು 'ಜೀವಿ' ಅವರಿಗೆ ನೂರು ತುಂಬಿದ ಸಂದರ್ಭದಲ್ಲಿ ಅವರ ಸಂದರ್ಶನ ನಡೆಸಿ ಪುಸ್ತಕವನ್ನು ಪ್ರಕಟಿಸಿದ್ದರು.

ಇತ್ತೀಚಿನ ಬರಹಗಳು: ಶಂಕರನಾರಾಯಣ ಉಪಾಧ್ಯಾಯ (ಎಲ್ಲವನ್ನು ಓದಿ)

• ಜಿ. ವೆಂಕಟಸುಬ್ಬಯ್ಯ - ಏಪ್ರಿಲ್ 19, 2021

ಆಲೆಮನೆ ಕೊಪ್ಪರಿಗೆಯಲ್ಲಿ ಉಕ್ಕುಕ್ಕುತಿಹ
ಸೊದೆಯ ಕಬ್ಬಿನಹಾಲು ನಿಮ್ಮ ನಗುವು
ತಿರುತಿರುವಿ ಮರಮರಳಿ ನೊರೆ ಚೆಲ್ಲಿ ಹಬೆ ಹರಡಿ
ಮಧುಗಂಧ ಪಸರಿಸುವ ನಿಮ್ಮ ನಗುವು

ನಿರ್ಮೇಘದಾಕಾಶದಲ್ಲಿ ನಿರ್ಮಲವಾಗಿ
ಸುಪ್ರಸನ್ನತೆಯಲ್ಲಿ ತೇಲಿ ಸಾಗಿ
ಲೋಕಾವಲೋಕನದಿ ತಂಪುಮಳೆಗರೆವಂಥ
ರಾಕಾಶಶಾಂಕನೊಲು ನಿಮ್ಮ ನಗುವು

ಏನು ಭಾಷಾಚರ್ಚೆ, ಏನು ಕಾವ್ಯಾಸ್ವಾದ
ಏನು ಶಾಸ್ತ್ರಾರ್ಥ ವಾಙ್ಮಯವಿಹಾರ
ಏನು ಲೋಕಾಭಿರಾಮದ ಹರಟೆ ನಗುತಮಟೆ
ನಿಮ್ಮ ಒಡನಾಡಿತನ ಮರೆಯಲುಂಟೇ

ಜೀವನದ ಪಡಿಚಣದ ಸ್ವಾರಸ್ಯವನು ಹೀರಿ
ಸಂವೃದ್ಧರಾಗಿ ಧೀರಾಸಿಕ್ಯದಿ
ಹೊಸಚಿಗುರ ಬೆಳೆಸುತ್ತ ನುಡಿದೋಟದಲಿ ನಡೆದ
ನಿಮ್ಮ ನೇಹದ ನೋಟ ಮರೆಯಲುಂಟೇ

ಧೀವರರ ಜೊತೆಗಿದ್ದು ಧೀವರರೆ ತಾವಾಗಿ
ಕನ್ನಡ ನಿಘಂಟುವನ್ನಿತ್ತ ತವಸಿ
ಮೊಗದಿ ಗಂಟಿಕ್ಕದಿಹ ನೂರೆಂಟರಾಯುಸಿನ
ಕನ್ನಡದ ನುಡಿಗಂಟು ಧನ್ಯ ‘ಜೀವಿ’