ಬಯಲ ಭಿಕ್ಕು

• ಲೇಖಕರು
• ಇತ್ತೀಚಿನ ಬರಹಗಳು

ಡಿ.ಎಮ್. ನದಾಫ್

ಹಲವಾರು ವರ್ಷಗಳಿಂದ ಕಾವ್ಯ ಕೃಷಿಯಲ್ಲಿ ತೊಡಗಿರುವ ಇವರು "ಪ್ರತೀಕಗಳಾಗುವದಿಲ್ಲ ಗೆಳೆಯ", "ಉದರದ ಸೊಲ್ಲು" ಕವನಸಂಕಲನ ಗಳನ್ನು "ಅಫಜಲಪುರ ದರ್ಶನ" ತಾಲೂಕಿನ ಇತಿಹಾಸ, ಸಾಹಿತ್ಯ, ಸಂಸ್ಕೃತಿಗಳ ಪರಿಚಯಾತ್ಮಕ ಕೃತಿಗಳನ್ನು ಪ್ರಕಟಿಸಿದ್ದಾರೆ. ಮಹಾಂತ ಜ್ಯೋತಿ, ಎರೆನಾಡು ಸಿರಿ, ಭೀಮರಥಿ, ಎಂಬ ಮೂರು ತಾಲೂಕು ಸಾಹಿತ್ಯ ಸಮ್ಮೇಳನ ಸ್ಮರಣ ಸಂಚಿಕೆಗಳನ್ನು ಸಂಪಾದಿಸಿದ್ದಾರೆ.
ಇವರು ಕನ್ನಡ ಸಾಹಿತ್ಯ ಪರಿಷತ್ತಿನ ಅಫಜಲಪುರ ತಾಲ್ಲೂಕು ಘಟಕದ ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಸಧ್ಯ ಕಲಬುರಗಿ ಜಿಲ್ಲೆ ಅಫಜಲಪುರದ ಮಹಾಂತೇಶ್ವರ ವಿದ್ಯಾವರ್ಧಕ ಸಂಘದ ಪ್ರೌಢಶಾಲೆಯಲ್ಲಿ ಅಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ.

ಇತ್ತೀಚಿನ ಬರಹಗಳು: ಡಿ.ಎಮ್. ನದಾಫ್ (ಎಲ್ಲವನ್ನು ಓದಿ)

• ಬಯಲ ಭಿಕ್ಕು - ಏಪ್ರಿಲ್ 6, 2021
• ಮೃಗಾಲಯ - ಆಗಸ್ಟ್ 4, 2020

 
ಬಿಸಿಲ ನಾಡಿಂದ ನೀ ಬರೆದೊಂದು ಪತ್ರ
ಬದಲಿಸಿತು ಕನ್ನಡ ಸಾಹಿತ್ಯ ರಂಗದ ಚಿತ್ರ!
"ಹಸಿವ ಹಾಸಿ ಬಿಸಿಲ ಹೊದ್ದವರಮೂಳೆ 
ಚಕ್ಕಳಗಳ ಮೇಲೆ ಬಂಗಲೆಗಳ ಕಟ್ಟಿದವರಎದೆಗೆಒದ್ದು
ಹೊಟ್ಟೆ ಬೆನ್ನಿಗಂಟಿದವರು ಬರಬೇಕು ಮೇಲೆದ್ದು"

 ನಿನ್ನ ಕನಸು ನಿನ್ನೆದುರೇ ನುಚ್ಚು ನೂರಾಯ್ತು
 ಲೂಟಿಕೋರರು ಲೀಡರಾದಾಗ,
 ಅರಸಂಬೇಡಕರರ ಆಶಯವೆಲ್ಲ
 ಅಕ್ಷರದಿ ನೀನು ಅಚ್ಚೊತ್ತ ಬಯಸಿದೆ,
 ಅರಿವಿನ ಪರಿಮಳ ಸೂಸುವ ಗಂಧದ
 ತೋಟವಾ ನೆಟ್ಟು ಬೆಳೆಸಿದೆ.

 ನಿನ್ನೊಡಲ ಕುಡಿಗಳೇ ನಿನ್ನೆದುರು
 ಗಂಧದ ತೋಟದೊಳಗಿನ
 ವಿಷಜಂತುಗಳಾದಾಗ
 ವಿಷಯಕೆಳೆಸುವ ಮೃಗವಾಗದೆ
 ವಿಷವನ್ನೆಲ್ಲ ಕುಡಿದು ವಿಷಕಂಠನಾದೆ

ಕೆಂಪು ದೀಪದ ಕೆಳಗೆ ಮೈಮಾರಿದರೇನು
ಮನುಜರಲ್ಲವೇ?
ಜಗದವರೆಲ್ಲ ಸೇರಿ ಪತಿತೆಯರೆಂದು
ಪಟ್ಟಗಟ್ಟಿದವರನು ಪ್ರೀತಿಯಿಂದ ಅಪ್ಪಿ
"ವೇಶ್ಯಾ ಸೋದರಿಯರು" ಎಂದೆ.
 ಅವರ ಕಣ್ಣೀರ ಕಥೆಯ ಕಾವ್ಯ ಬರೆದೆ.

 ಜಗವ ಸುತ್ತಿ ಸುಳಿದಾಗ ಸಿಕ್ಕಿದ್ದು ನಿನಗೆ
 "ವ್ಯೋಮಾ ವ್ಯೋಮ "
 ಕನ್ನಡ ಕಾವ್ಯ ಲೋಕಕ್ಕೆ ದಕ್ಕಿದ್ದು
 ಹೊಸ ಆಯಾಮ
 ಚದುರಿ ಚಿಂದಿಯಾಗಿ ಹೋದವು
 ದಂತಗೋಪುರದ ಕಾವ್ಯನಿಯಮ

 ನಿನ್ನೊಡಲೇ ಒಂದು ಕನ್ನೆ ನೆಲ
 ಹರಡಿದೆ ಎಲ್ಲೆಡೆ ಹೊಕ್ಕುಳ ಪರಿಮಳ
 ಬೆಳೆಸಿದೆ ಬೋಧಿವೃಕ್ಷದ ಹೂವುಗಳ
 ಕರುಣೆ ಶೀಲ ಪ್ರಜ್ಞೆಗಳ ಉಳಿಸಿದೆ
 ಬುದ್ಧ ಗುರುವಿನ ನೆರಳಿನಲ್ಲಿ
 ಬಯಲ ಭಿಕ್ಕುವಾದೆ! ಬಯಲ ಭಿಕ್ಕುವಾದೆ!