ಕರಾವಳಿಯ (ಕುಮಟಾ) ಮಗಳು ಮತ್ತು ಮಲೆನಾಡಿನ ಸೊಸೆ (ಶೃಂಗೇರಿ). ಸದ್ಯಕ್ಕೆ ಬೆಂಗಳೂರಿನಲ್ಲಿ ವಾಸ. ಸಾಹಿತ್ಯದ ಕಡೆ ಸೆಳೆತ ಜಾಸ್ತಿ. ಮನಸೊಳಗಣ ಸಾಲನ್ನು ಈಗಷ್ಟೇ ದಣಪೆ ದಾಟಿಸಲು ಶುರು ಮಾಡಿ ಲೇಖನ, ಕತೆ, ಕವಿತೆಗಳನ್ನು ರಚಿಸುವಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ.
ಇತ್ತೀಚಿನ ಬರಹಗಳು: ಶುಭಶ್ರೀ ಭಟ್ಟ (ಎಲ್ಲವನ್ನು ಓದಿ)
- ಮತ್ತೆ ಹುಟ್ಟುವುದಾದರೆ ಮೊದಲೇ ಹೇಳಿಬಿಡು - ಮೇ 26, 2021
- ಬೇಬಿ ಶ್ಯಾಮಿಲಿ ಮತ್ತು ಸಂಕ್ರಾಂತಿ ಕಾಳು - ಜನವರಿ 14, 2021
ಅದೊಂದು ಅಮಲಿನ ರಾತ್ರಿಯಲಿ
ಯಶೋಧರೆಯ ಕಡುನೀಲಿ ಮೋಹವ
ಸುಪ್ಪತ್ತಿಗೆಯ ಸುಖವ ತೊರೆದು
ಸದ್ದಿಲ್ಲದೆ ಎದ್ದುಹೋದ ಬಗೆಯನ್ನೊಮ್ಮೆ ಕಾಣಬೇಕಿದೆ|
ಜಗದಿರುಹನೇ ಮರೆತು
ಮಂದಸ್ಮಿತನಾಗಿ ಕೂತು
ಜ್ಞಾನಮುದ್ರೆಯಲಿ ಧ್ಯಾನಿಸುತಾ
ಬೋಧಿಯಡಿಯಲ್ಲಿ ಜಗಮಗಿಸಿದ ಬೆಳಕನ್ನೊಮ್ಮೆ ನೋಡಬೇಕಿದೆ|
ನೋವಿಗದ್ದಿದ ಬದುಕ
ಆಸೆಯಲ್ಲಡಗಿದ ದುಃಖವ
ಶಾಂತಿಮಂತ್ರವ ಪಠಿಸಿ
ಪೂರ್ಣಿಮೆಯಂತೆ ತಂಪಾಗಿಸಿದವನೊಮ್ಮೆ ಕಣ್ತುಂಬಿಕೊಳ್ಳಬೇಕಿದೆ|
ಏನೇ ಹೇಳು ನಿನ್ನಂತಾಗುವುದು ಸುಲಭವೇ ಅಲ್ಲ
ಅಪರಾತ್ರಿಯಲೆದ್ದರೂ ನಿದ್ದೆ ಕುಸಿಯುತ್ತದೆ
ಮೋಹ ಕಳಚುವ ಬಗ್ಗೆ ಯೋಚಿಸಿದಷ್ಟೂ ಸರಪಳಿಯಾಗುತ್ತದೆ
ಸಹನೆ ತಂದುಕೊಂಡಷ್ಟು ಕೆಂಡದ ಮಳೆ ಸುರಿಯುತ್ತದೆ|
ಮತ್ತೆ ಹುಟ್ಟುವುದಾದರೆ ಮೊದಲೇ ಹೇಳಿಬಿಡು
ತಿರುವಿನಲ್ಲಿ ಹಿಂತಿರುಗಿ ನೋಡುತ್ತಾ
ದಣಪೆಯಲ್ಲಿ ನಿಂತು ಇಣುಕುತ್ತಾ
ಬಾಗಿಲಿಗೆ ಮಿಡವಿಕ್ಕದೇ ಕಾಯುವೆ|
ಒಮ್ಮೊಮ್ಮೆ ಯಶೋಧರೆಯೂ
ಬುದ್ಧನಾಗಬಯಸುತ್ತಾಳೆ
ಹೆಚ್ಚಿನ ಬರಹಗಳಿಗಾಗಿ
ಗಣೇಶನ ಕೈಯಲ್ಲಿಯ ಲಾಡು
ಮಹಾಸಾಗರವಾದಳು
ಹರಿಹರಪುರ ಗ್ರಾಮವೂ, ಲೊವೆಂಥಾಲ್ ಎಂಬ ಪಾದ್ರಿಯೂ..