ಕೊಡಗು ಜಿಲ್ಲೆಯ ವಿರಾಜಪೇಟೆ ತಾಲ್ಲೂಕಿ ನವರಾದ ವತ್ಸಲಾ ಶ್ರೀಶ ಅವರು ವೃತ್ತಿಯಲ್ಲಿ ಸರಕಾರಿ ಪ್ರಾಥಮಿಕ ಶಾಲಾ ಶಿಕ್ಷಕಿ. ಹವ್ಯಾಸ ಕವನ, ಸಣ್ಣಕಥೆ,ಲೇಖನ,ಗಝಲ್,ಹಾಯ್ಕುಗಳು,ಛಂದೋಬದ್ಧ ರಚನೆಗಳು. "ವಿಶ್ರುತಾತ್ಮ" ಅಂಕಿತನಾಮದೊಂದಿಗೆ ಮುಕ್ತಕಗಳನ್ನು ಹಾಗೂ "ತಪಸ್ಯಾ" ಅಂಕಿತನಾಮದೊಂದಿಗೆ ಗಝಲ್‌ಗಳನ್ನು ರಚಿಸುತ್ತಾರೆ.
ಇತ್ತೀಚಿನ ಬರಹಗಳು: ವತ್ಸಲಾ ಶ್ರೀಶ (ಎಲ್ಲವನ್ನು ಓದಿ)
- ವಿಶ್ರುತಾತ್ಮನ ಮುಕ್ತಕಗಳು - ನವೆಂಬರ್ 17, 2020
ನಗುನಗುತ ಬಂದವರ ಮತಿಗೆಟ್ಟು ನಂಬುತಿರೆ
ಮಗು ಶಿರದ ಮೇಲ್ಖಡ್ಗ ತೂಗುತಿರುವಂತೆ
ಹಗುರಾಗಿ ಬಳಸದಿರು ನಿನ್ನ ಸದ್ಗುಣಗಳನು
ಜಗವಿದುವೆ ಮಾಯೆಯೋ ವಿಶ್ರುತಾತ್ಮ||
ಹವನ ಮಾಡಿದರೇನು ತಪದಿ ಕುಳಿತಿರಲೇನು
ಬುವಿಯ ನಿಜ ದೇವ ತಾನೆನ್ನುತಿರಲೇನು
ಕವಿಯಲರಿಷಡ್ವರ್ಗ ಬಣ್ಣಗೆಡುವುದು ಕಾವಿ
ಭವದ ಬದುಕೇ ಭ್ರಾಂತಿ ವಿಶ್ರುತಾತ್ಮ||
ನೋಯಿಸಲು ಜನರವರು ನೋಯಿಸದೆ ಸುಮ್ಮನಿರು
ಕಾಯುವವ ಉತ್ತರವ ನೀಡುವನು ತಾಳು
ಗಾಯದಲಿ ನೊಂದಾಗ ಮಾಗುವರು ಬದುಕಿನಲಿ
ನಾಯಕನು ಎಲ್ಲರಿಗು ವಿಶ್ರುತಾತ್ಮ||
ಮಾನಿನಿಯ ಮಾಯೆಯದು ಮತಿಗೆಡಿಸಿ ಕೊಲ್ಲುವುದು
ಕಾನನದಿ ಕಣ್ಕಟ್ಟಿ ಬಿಟ್ಟಂತೆ ಬಾಳು
ಹಾನಿಗೊಳೆ ಚಾರಿತ್ರ್ಯ ಜಗ ನಗಲು ನಿನ್ನೆಡೆಗೆ
ಬೋನಿನಲಿ ಸಿಕ್ಕಂತೆ ವಿಶ್ರುತಾತ್ಮ||
ಬಂದುಹೋಗುವ ನೂರು ಬಂಧಗಳು ನಿಜವಲ್ಲ
ಚಂದ ನುಡಿಯುವ ಮಾತು ಕೇಳಲಿಂಪಂತೆ
ನಿಂದಿಸದೆ ಬದುಕ ಬಂದಂದದೋಳ್ ಸ್ವೀಕರಿಸೆ
ಕುಂದು ಕಾಣದು ಇಹದಿ ವಿಶ್ರುತಾತ್ಮ||
ಅಂದದಲಿ ಮಾತಾಡಿ ತಾಯಿ ತಂಗಿಯರೆಂದು
ಚಂದದಿಂದಲಿ ಪಕ್ಕ ನಿಲ್ಲುವರು ಜನರು
ಕುಂದಿರುವ ಮನದಲ್ಲಿ ಇರುವುದಿನ್ನೊಂದು ಮುಖ
ಮುಂದೆ ನೀ ತುಸು ತಾಳು ವಿಶ್ರುತಾತ್ಮ||
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ