ಎದುರುಮನೆ ಗೋಡೆ

• ಲೇಖಕರು
• ಇತ್ತೀಚಿನ ಬರಹಗಳು

ವಿಕ್ರಮ್ ಹತ್ವಾರ್

ಕುಂದಾಪುರ ಮೂಲದವರಾದ ವಿಕ್ರಮ್ ಹತ್ವಾರ್ ತಮ್ಮ ಮೊದಲ ಕಥಾ ಸಂಕಲನವಾದ 'ಝೀರೋ ಮತ್ತು ಒಂದು' ಕೃತಿಗೆ ಕೇಂದ್ರ ಸಾಹಿತ್ಯ ಅಕಾಡೆಮಿ-ಯುವ ಪುರಸ್ಕಾರ ಪಡೆದವರು.

ವೃತ್ತಿಯಲ್ಲಿ ಸಾಫ್ಟ್ ವೇರ್ ಎಂಜಿನಿಯರ್ ಆದ ಇವರು ಕವಿ ಮತ್ತು ಕತೆಗಾರ​. ಅಕ್ಷೀ...ಎಂದಿತು ವೃಕ್ಷ ( ಕವನ ಸಂಕಲನ ), ನೀ ಮಾಯೆಯೊಳಗೋ… ( ಸಾಹಿತ್ಯ-ಸಂಸ್ಕೃತಿ ಸ್ಪಂದನ ), ಹಮಾರಾ ಬಜಾಜ್ ( ಕಥಾ ಸಂಕಲನ ) ಇವರ ಇತರ ಪ್ರಕಟಿತ ಪುಸ್ತಕಗಳು.

ಇತ್ತೀಚಿನ ಬರಹಗಳು: ವಿಕ್ರಮ್ ಹತ್ವಾರ್ (ಎಲ್ಲವನ್ನು ಓದಿ)

• ಎದುರುಮನೆ ಗೋಡೆ - ಜನವರಿ 14, 2021

ನಮ್ಮ ಮನೆಯಲಿ ಸಂಜೆಯೆಂದರೆ
ಹಳದಿ ಬಣ್ಣದ ಹಳೆಯ ಸುಣ್ಣದ ಎದುರುಮನೆ ಗೋಡೆ
ಅದರ ಮೇಲೆ
ನೆರಳ ಬೀಸಿ ಲಲ್ಲೆಗರೆಯುವ ಸಂಪಿಗೆ ಮರದ ಚಿಗುರೆಲೆ

ಹೊಸ ಮನೆಯ ಕಟ್ಟಲು ಕೆಡವಬೇಕಿತ್ತು ಹಳೆ ಮನೆ
ಬಂದೇ ಬಂತು ಮುಹೂರ್ತ
ಬಂತು ಕಡು ಹಳದಿ ಬಣ್ಣದ ಜೆ.ಸಿ.ಬಿ
ಸೊಂಡಿಲ ಎತ್ತೆತ್ತಿ ಕೆಡವಿತು
ಮೇಲ್ಛಾವಣಿ ಮೊದಲು
ನಂತರ ಒಳಗಿಂದ ಒಂದೊಂದೇ ಗೋಡೆ
ಹಾವು ತೊರೆದ ಪೊರೆಯಂತೆ ನಿಂತಿದೆ ಹೊರಗೋಡೆ ಬಾಗಿಲು
ಅಂತರಂಗವೇ ಒಡೆದು ಚೂರಾದ ಹಾಗೆ
ಒಳಗೆ ಇಟ್ಟಿಗೆಯ ರಾಶಿ
ಒಂದನ್ನೊಂದು ಸಂತೈಸುತ್ತ ಒಂದರ ಮೇಲೊಂದು ನಿದ್ದೆ ಹೋಗಿವೆ

ಕೊನೆಗೊಂದು ಮೆದುವಾದ ಗುದ್ದು
ಕಡು ಹಳದಿಯಡಿಗೆ ತಿಳಿ ಹಳದಿ ಇಡಿಯಾಗಿ ಬಿತ್ತು
ನಿಂತ ಮನೆ ಅಂಗಾತ ಮಲಗಿ ನಿರಾಳವಾಗಿ
ಕಂಡುಕೊಂಡಿದೆ ಹಿಗ್ಗಿಕೊಂಡಿದೆ ತನ್ನೊಳಗಿನ ಆಕಾಶ
ಬಿಟ್ಟುಕೊಂಡಿದೆ ಬಿಸಿಲು ಮಳೆ ಬೆಳದಿಂಗಳನು
ಇಳಿಸಿಕೊಂಡಿದೆ ತನ್ನೊಡಲಿಗೆ ಹಿಡಿವಷ್ಟು ತಾರೆಗಳನು

ಬಾಗಿಲು ತೆರೆದರೆ ಈಗ
ರಾಚುವುದು ಬೆಳಕು ಕಣ್ಣಿಗೆ
ಬಾಚಿ ಹೋಗಿದೆ ದೋಚಿ ಹೋಗಿದೆ ಜೆ.ಸಿ.ಬಿ
ನಮ್ಮ ಮನೆಯ ಸಂಜೆಗಳನು
ಇನ್ನೆಂದೂ ಸಿಗದು….
ಇನ್ನೆಂದೂ ಸಿಗದು
ಸಂಪಿಗೆ ಮರದ ನೆರಳಿಗೆ
ಅಂಥ ತಿಳಿಯಾದ ಆಸರೆ