ಕಾಯುವ ಗಳಿಗೆ

• ಲೇಖಕರು
• ಇತ್ತೀಚಿನ ಬರಹಗಳು

ಡಾ. ಪ್ರೀತಿ ಕೆ.ಎ.

ಹುಟ್ಟೂರು ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರು. ಪ್ರಸ್ತುತ ಬೆಂಗಳೂರಿನಲ್ಲಿ ವಾಸ. ಅರ್ಥಶಾಸ್ತ್ರದಲ್ಲಿ ಡಾಕ್ಟರೇಟ್ ಪದವೀಧರೆ. ಕರ್ನಾಟಕ ಆರ್ಥಿಕತೆಯ ಬಗ್ಗೆ ಪುಸ್ತಕ ಹಾಗೂ ಹಲವಾರು ಸಂಶೋಧನಾ ಪ್ರಬಂಧಗಳು ಪ್ರಕಟಗೊಂಡಿವೆ. ನಾನಾ ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ಸೆಮಿನಾರುಗಳಲ್ಲಿ ಭಾಗವಹಿಸಿ ಪ್ರಬಂಧ ಮಂಡಿಸಿರುತ್ತಾರೆ. ವೃತ್ತಿಯಿಂದಉಪನ್ಯಾಸಕಿಯಾದರೂ ಸಾಹಿತ್ಯ ಕ್ಷೇತ್ರದೆಡೆಗೆ ಹೆಚ್ಚಿನಒಲವು. ಓದು ಮತ್ತು ಬರವಣಿಗೆ ಮೆಚ್ಚಿನ ಹವ್ಯಾಸಗಳು. ಕೆಲವು ಕವಿತೆಗಳು ಹಾಗೂ ಲೇಖನಗಳು ಪ್ರಕಟಗೊಂಡಿವೆ.

ಇತ್ತೀಚಿನ ಬರಹಗಳು: ಡಾ. ಪ್ರೀತಿ ಕೆ.ಎ. (ಎಲ್ಲವನ್ನು ಓದಿ)

• ಅವರಿಬ್ಬರೂ ಪ್ರೇಮಿಗಳಲ್ಲ - ನವೆಂಬರ್ 20, 2022
• ಸಿಕ್ಕು - ಮೇ 28, 2022
• ಅಮ್ಮ ನೆನಪಾಗುತ್ತಾಳೆ - ಮೇ 8, 2022

ಬೆಳ್ಳಂಬೆಳಗು ಕಣ್ಣು ತೆರೆದಾಗ ಇಲ್ಲಿ
ಎಲ್ಲವೂ ಅದಲು ಬದಲು
ಇದ್ದಕ್ಕಿದ್ದಂತೆಯೇ ಎಲ್ಲವೂ ತಟಸ್ಥ
ಬೀಸಿದ ಹೊಸ ಗಾಳಿಗೆ ಕಾಲನೇ ಸ್ತಬ್ಧ

ಪುಟ್ಟ ಪುಟ್ಟ ಹೆಜ್ಜೆಗಳನ್ನಿಡುತ್ತಾ
ಈಗಷ್ಟೇ ನಡೆಯಲು ಶುರು ಮಾಡಿದ್ದ
ಪಾರ್ಕಿನ ಉಯ್ಯಾಲೆಯಲ್ಲಿ
ನಗುನಗುತ್ತಾ ಆಡುತ್ತಿದ್ದ
ಎಳೆಯ ಕಂದಮ್ಮಗಳು
ಇದೀಗ ಉಸಿರೂ ಹೊರಹೋಗದ
ಗೂಡುಗಳೊಳಗೆ ಬಂಧಿ

ನಿನ್ನೆ ಮೊನ್ನೆಯವರೆಗೆ
ಎಲ್ಲೆಂದರಲ್ಲಿ ಹೇಗೆಂದರೆ ಹಾಗೆ
ಹಾರಾಡುತ್ತಿದ್ದ ಹಕ್ಕಿ ಮರಿಗಳು
ಅಪ್ಪಂದಿರ ಲ್ಯಾಪುಟಾಪಿನೊಳಗೋ
ಅಮ್ಮಂದಿರ ಮೊಬೈಲುಗಳಲ್ಲೋ
ಕಣ್ಣು ಕೀಲಿಸದೆ ಕೂರುವ ಅನಿವಾರ್ಯತೆ

ಇದುವರೆಗೂ ಕಾಣದ
ನಾಳೆಗಳ ಬಗ್ಗೆ
ರಂಗುರಂಗಿನ ಕನಸು
ಕಾಣುತ್ತಿದ್ದ ಹುಡುಗಿಗೆ
ಅದು ಬರೆಯ ಕನಸಾಗಿಯೇ
ಉಳಿವ ಭೀತಿ

ಮದುವೆ ನಿಶ್ಚಯವಾಗಿದ್ದ ಹುಡುಗನಿಗೆ
ಅರೆ ಕ್ಷಣ ಕಣ್ಣು ಮುಚ್ಚಿದ್ದರೂ
ಬರುತ್ತಿದ್ದ ತನ್ನವಳ ಚಿತ್ರ ಮಸುಕಾಗಿ
ಅರೆ ನಿದ್ರೆಯಲ್ಲೂ
ನಾಳೆಯೋ ನಾಳಿದ್ದೋ ಬರಬಹುದಾದ
ಪಿಂಕು ಸ್ಲಿಪ್ಪಿನದ್ದೇ ಕನವರಿಕೆ

ನಿದ್ದೆಗೆಟ್ಟು ದುಡಿದು
ಇಷ್ಟಿಷ್ಟೇ ಕಳೆದು ಕೂಡಿ
ಅದರ ಹತ್ತರಷ್ಟು ಸಾಲ ಮಾಡಿ
ಮನೆ, ಕಾರು ಕೊಂಡು
ಇನ್ನೇನು ಬದುಕು ಹಸನಾಯಿತೆಂದು
ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದ
ಜೋಡಿ ಹಕ್ಕಿಗಳು ಅತಂತ್ರ

ಇದುವರೆಗೂ ಬೇಗ ಕರೆಸಿಕೊಳ್ಳೋ
ಭಗವಂತನೇ ಎಂದು ಇನ್ನಿಲ್ಲದಂತೆ
ಬೇಡುತ್ತಿದ್ದ ವೃದ್ಧ ಜೀವಗಳದು
ಯಮನಲ್ಲಿ ಒಂದೇ ಕೋರಿಕೆ
ಬರುವುದಿದ್ದರೆ ಈ ಕೊರೊನವೆಂಬ ಭಾನಗಡಿ
ಮುಗಿದ ಮೇಲೆ ಬಾ

ಎಲ್ಲರೂ ಕಾಯುತ್ತಿದ್ದಾರೆ
ಆ ಒಂದು ಗಳಿಗೆಗೆ
ಬದುಕು ಮತ್ತೆಂದು
ಬರುವುದೋ ಹಳಿಗೆ