ಮೂಲತಃ ಉತ್ತರಕನ್ನಡದವರಾದ ಇವರು ಬೆಂಗಳೂರಿನಲ್ಲಿ ಕೂಡ ಶಿಕ್ಷಣ ಪಡೆದಿದ್ದಾರೆ. "ಕನ್ನಡ ಕಾವ್ಯದ ಪರಿಪ್ರೇಕ್ಷ್ಯದಲ್ಲಿ ಕಾವ್ಯ ಮತ್ತು ತಾತ್ತ್ವಿಕತೆಗಳ ಸಂಬಂಧ" ಕುರಿತು ಡಾ.ಕೆ.ವಿ.ನಾರಾಯಣರ ಮಾರ್ಗದರ್ಶನದಲ್ಲಿ ಸಿದ್ಧಪಡಿಸಿದ ಮಹಾಪ್ರಬಂಧಕ್ಕೆ ಹಂಪಿಯ ಕನ್ನಡ ವಿಶ್ವವಿದ್ಯಾಲಯದಿಂದ ಡಾಕ್ಟರೇಟ್ ದೊರಕಿದೆ.ಟಪಾಲುಬಸ್ಸು ಕೃತಿಗೆ (ಲಲಿತಪ್ರಬಂಧ) ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಪುಸ್ತಕ ಪುರಸ್ಕಾರ ಲಭಿಸಿದೆ. (೨೦೧೨).
- ಹುಣ್ಣಿಮೆ ರಾತ್ರಿ ದೇವರಾಡುವನು - ಜನವರಿ 1, 2025
- ಮರಿಹಕ್ಕಿ ಮರಳಿತು ಕಾಡಿಗೆ… - ಅಕ್ಟೋಬರ್ 29, 2024
- ಕೆಟ್ಟಿದ್ದು ಕಾಲವಲ್ಲ ಮತ್ತು ಒಡಲ ನುಡಿಗಳು - ಮಾರ್ಚ್ 25, 2023
೧. ಕೆಟ್ಟಿದ್ದು ಕಾಲವಲ್ಲ
ಕಾಲ ಕೆಟ್ಟಿತು ಎಂದು ಮರುಗುವುದು ಕೇಳಿದೆ
ಕೆಟ್ಟಿದ್ದು ಕಾಲವಲ್ಲ
ಕೆಟ್ಟಿದ್ದು ಏನೆಂದು ಎಲ್ಲರಿಗು ಗೊತ್ತಿದೆ
ಸುಳ್ಳೊಡನೆ ಸಖ್ಯ ಸಲ್ಲ
ಮಳೆಗಾಲ ಚಳಿಗಾಲ ಬೇಸಿಗೆಗಳಾವರ್ತ
ನಡೆಯುತಿದೆ ಎಂದಿನಂತೆ
ಸೂರ್ಯ ಹುಟ್ಟಿದ್ದಾನೆ ಏರಿ ಇಳಿದಿದ್ದಾನೆ
ಮತ್ತೆ ನಿಮಗೇನು ಚಿಂತೆ?
ಗಾಳಿ ಬೀಸುತಲಿದೆ ಹಿಂದಿನಂತೇ ಇಂದೂ
ಧೂಳು ಬೆರೆಸಿದೆವು ನಾವು
ಆಕಾಶ ನೋಡದೆ ವರುಷಗಳೆ ಕಳೆದವು
ರಸಹೀನವಾಯ್ತು ಬಾಳು
ಕಾಡುಮರಗಳ ಕಡಿದು ಬೋಳಾಗಿಸಿದೆವು
ನೆಲ ಕುಸಿಯೆ ತಡೆಯಬಹುದೆ?
ಕೈಯಾರೆ ವಿಷವಿತ್ತು ಜೀವನದಿಗಳಿಗೆ
ಸಿಹಿನೀರ ಕುಡಿಯಬಹುದೆ?
ತಿಂದು ತೇಗಿಯು ನಮಗೆ ತೀರಲಾರದ ಹಸಿವೆ!
ದೂರುವೆವು ಕಾಲವನ್ನು!
ಪೊಡವಿ ಸುಡುತಿದೆ ನೋಡಿ ನಮ್ಮನೂ ದಹಿಸಿ
ಉಳಿಯುವುದು ಸುಟ್ಟ ಮಣ್ಣು!
ಕಾಲ ಕೆಟ್ಟಿತು ಎಂದು ಗೊಣಗುವುದು ಒಣಮಾತು
ಕೆಟ್ಟಿದ್ದು ಕಾಲವಲ್ಲ
ಕೆಟ್ಟಿದ್ದು ನಾವೆಂದು ನಮ್ಮೊಳಗೇ ಗೊತ್ತಿದೆ
ಸತ್ಯ ನಮಗಿಷ್ಟವಿಲ್ಲ..
೨. ಒಡಲ ನುಡಿಗಳು
ನಮ್ಮ ದಾರಿಗಳೀಗ ಬೇರೆಯಾಗುತಿವೆ
ಮುಂದೊಮ್ಮೆ ಸಿಕ್ಕಬಹುದು!
ಆಡದೆ ಮಾತುಗಳು ಒಳಗುಳಿದು ಬಿಟ್ಟವು
ಸಿಕ್ಕಲ್ಲಿ ಹೇಳಬಹುದು!
ಮೂರು ದಿನ ಒಡನಿದ್ದು ಮನ ಬಿಚ್ಚಲಿಲ್ಲ
ಈಗಂತು ತಡವಾಯಿತು
ನಿಮ್ಮಂಥ ಜನ ಜೊತೆಗೆ ಸಿಕ್ಕಿದ್ದು ಭಾಗ್ಯ
ನನಗೀಗ ನೆನಪಾಯಿತು!
ದಾರಿಬದಿ ಮನೆಗಳಲಿ ಕೆಲವು ದಿನ ಮಾತ್ರ
ಆಮೇಲೆ ಹೊರಡಬೇಕು
ಅದು ನನಗೆ ಗೊತ್ತಿದೆ. ಆದರೂ ಹೀಗೆ..
ನನ್ನನು ಕ್ಷಮಿಸಬೇಕು
ಅರೆಗಳಿಗೆ ಉಳಿದಿದೆ ಹೊರಹೆಜ್ಜೆಯಿಡಲು
ಕಿವಿಮಾತು ಹೇಳಬಹುದು:
“ಒಡಲ ನುಡಿಗಳ ಆಡಿ – ತಡ ಮಾಡಬೇಡಿ
ಪಯಣವೇ ಮುಗಿಯಬಹುದು”
ಹೆಚ್ಚಿನ ಬರಹಗಳಿಗಾಗಿ
ಸಂಕ್ರಾಂತಿ
ಹುಣ್ಣಿಮೆ ರಾತ್ರಿ ದೇವರಾಡುವನು
ಮಹಾಸಾಗರವಾದಳು