ಒಂದು ಸ್ವಗತ

• ಲೇಖಕರು
• ಇತ್ತೀಚಿನ ಬರಹಗಳು

ಅಬ್ಳಿ ಹೆಗಡೆ

ಅಬ್ಳಿ ಹೆಗಡೆ ಲೇಖನಾಮದ ಸುಬ್ರಹ್ಮಣ್ಯ ಹೆಗಡೆ,ಉತ್ತರಕನ್ನಡ ಜಿಲ್ಲೆಯಹೊನ್ನಾವರದವರು. ವೃತ್ತಿಯಲ್ಲಿ ಅಡಿಕೆ ಕೃಷಿ, ಪ್ರವೃತ್ತಿಯಲ್ಲಿ ಸಾಹಿತ್ಯದ ಓದು,ಬರಹ.. ಇವರ ಎರಡು ಕಿರು ಕಾದಂಬರಿಗಳು ಪ್ರಕಟಣೆಯ ಹಂತದಲ್ಲಿವೆ. ಕವಿತೆ ಇವರ ಅಚ್ಚುಮೆಚ್ಚಿನ ಸಾಹಿತ್ಯ ಪ್ರಕಾರ. ಅನೇಕ ಕವನಗಳು ಅಂತರ್ಜಾಲ ಪತ್ರಿಕೆಗಳಲ್ಲಿ ಪ್ರಕಟವಾಗಿವೆ.

ಇತ್ತೀಚಿನ ಬರಹಗಳು: ಅಬ್ಳಿ ಹೆಗಡೆ (ಎಲ್ಲವನ್ನು ಓದಿ)

• ನನ್ನ ಈ…ಮನೆ - ಜುಲೈ 25, 2022
• ಬದುಕ ಮಧ್ಯ - ಆಗಸ್ಟ್ 22, 2021
• ಒಂದು ಸ್ವಗತ - ಜೂನ್ 30, 2021

ಯಾವಾಗಾದರೊಮ್ಮೆ
ಅಪರೂಪಕ್ಕೆ ನಾನು
ನನ್ನ ಕನ್ನಡಿಯಲ್ಲೇ..
……………………………..
ಮುಖ ನೋಡುವದುಂಟು.
ನೆರೆತು ಹಣ್ಣಾದ ಕೂದಲು,
ತಲೆ, ಗಡ್ಡ, ಕನ್ನಡಕ-
ದೊಳಗಿನ ಮಾಸಿದ ಕಣ್ಣು,
ಪೇಲವ ಮುಖದ ಸುಕ್ಕು,
ಅದರೊಳಗೊಂದು-
ಮಾಸಿದ ನಗು….-
ಎಲ್ಲ ಕಂಡಾಗ–
ನೆನ​ಪಾಗುವದು ಒಣಭೂಮಿ–
ಯಲ್ಲಿ ಸುರಿದ ಅಲ್ಪ, ಸ್ವಲ್ಪ
ಮಳೆಗೆ, ಸ್ವಲ್ಪವಾದರೂ
ಹಸಿರುಕ್ಕಿಸಲು ,
ಕಾಯುತ್ತಿರುವ ಮರ.
ನಿಲುಕದೆತ್ತರದಲ್ಲಿ ಚಿಗುರಿ-
ಹೂ ಬಿಟ್ಟು-ಸೀತೆ ದಂಡೆ
ಯಾಗಲು ಆತುರ-
ದಲ್ಲಿರುವ ಬಂದಳಿಕೆ.
ತೆವಳಿ, ಅಂಬೆಗಾಲಿಟ್ಟು,
ಪುಟ್ಟ ನುಣುಪು ಕೈಗಳಿಂದ,
ನುಣುಪುಗೋಡೆಯನ್ನೇ
ಆಸರೆಯಾಗಿಸಿ,
ನಿಲ್ಲಲು ತಿಣಕಾಡುವ ಪುಟ್ಟ-
ಪುಟಿಯುವ ಹೃದಯದ,
ಮುದ್ದು ಮುಖದ ಪುಟ್ಟಮಗು.
ನಾನೇನು ಕವಿಯಲ್ಲ.
ರಾಶಿ, ರಾಶಿ ಬರೆದು-
ಗುಡ್ಡೆಹಾಕಿ, ಕವಿಯೆಂದು-
ವಿಜೃಂಭಿಸುವ ಆಸೆ
ಕಿಂಚಿತ್ತೂ ಇಲ್ಲದ,
ಮನದ ಭಾವನೆಗಳನ್ನು
ಅಕ್ಷ​ರವಾಗಿಸಲು ,
ಹೆಣಗಾಡುವ ವಿದ್ಯಾರ್ಥಿ.
ಸತಿಗೊಬ್ಬ ಒಳ್ಳೆಯ ಪತಿ,
ಮಕ್ಕಳಿಗೆ ಒಳ್ಳೆಯ ಅಪ್ಪ,
ಮೊಮ್ಮಕ್ಕಳಿಗೊಬ್ಬ-
ಒಳ್ಳೆಯ ಅಜ್ಜನಾಗುವ
ಆಸೆ ಹೊತ್ತ ಶ್ರೀ ಸಾಮಾನ್ಯ.
ಈವರೆಗಿನ ಅಲ್ಪ,ಸ್ವಲ್ಪ-
ಗಳಿಕೆಯನ್ನೆಲ್ಲ ವ್ಯಯಿಸಿ,
ಒಳ್ಳೆಯ ಬೆಳೆಯನ್ನು-
ನಿರೀಕ್ಷಿಸುತ್ತಿರುವ ರೈತ.
ಕಳೆದ ಕೀಲಿಕೈ ಹುಡುಕುತ್ತ,
ಗೊತ್ತಿಲ್ಲದ ದಾರಿಯಲಿ,
ಗುರಿಯಿಲ್ಲದಲೆಯುವ-
ಅಲೆಮಾರಿ, ಪಥಿಕ…….!!!!