ಗಜ಼ಲ್

• ಲೇಖಕರು
• ಇತ್ತೀಚಿನ ಬರಹಗಳು

ಡಾ. ಗೋವಿಂದ್ ಹೆಗಡೆ

ವೃತ್ತಿಯಲ್ಲಿ ವೈದ್ಯರಾಗಿ, ಕಾವ್ಯ,ಸಾಹಿತ್ಯಗಳಲ್ಲಿಅಪಾರ ಆಸಕ್ತಿ ಹೊಂದಿರುವ ಗೋವಿಂದ ಹೆಗಡೆ, ಕಥೆ, ಕವಿತೆ, ಅಂಕಣ ಬರಹ, ಲೇಖನ,ಅನುವಾದ ಇತ್ಯಾದಿ ಪ್ರಕಾರಗಳಲ್ಲಿ ವ್ಯವಸಾಯ ಮಾಡಿದ್ದಾರೆ. ಮೈಸೂರು ದಸರಾ ಕವಿಗೋಷ್ಠಿ, ಧಾರವಾಡ ಸಾಹಿತ್ಯ ಉತ್ಸವಗಳಲ್ಲಿತಮ್ಮ ಕವಿತೆಗಳನ್ನುಪ್ರಸ್ತುತಪಡಿಸಿದ್ದಾರೆ. ಪ್ರಾಚಾರ್ಯ ಎಚ್ಚೆಸ್ಕೆಜನ್ಮಶತಮಾನೋತ್ಸವ*'ಎಚ್ಚೆಸ್ಕೆ ಬೆಳಕು'* ಕಾರ್ಯಕ್ರಮದಲ್ಲಿ *ಕವಿಗೋಷ್ಠಿಯ ಅಧ್ಯಕ್ಷತೆ* ವಹಿಸಿದ ಗೌರವ ಇವರದು. ಕನ್ನಡ ಪುಸ್ತಕ ಪ್ರಾಧಿಕಾರದ ಯುವ ಬರಹಗಾರ ಪ್ರಶಸ್ತಿ ಪುರಸ್ಕೃತರು. 'ಕನಸು ಕೋಳಿಯ ಕತ್ತು' ಮತ್ತು 'ಪೇಟೆ ಬೀದಿಯ ತೇರು' ಎಂಬ ಎರಡು ಕವನ ಸಂಕಲನಗಳನ್ನು ಪ್ರಕಟಿಸಿದ್ದಾರೆ. ಇವರ ಬರಹಗಳು ಅನೇಕ ಪತ್ರಿಕೆಗಳಲ್ಲಿ ಹಾಗೂ ಆಕಾಶವಾಣಿ ಕೇಂದ್ರಗಳಿಂದ ಪ್ರಕಟ ಹಾಗೂ ಪ್ರಸಾರವಾಗಿವೆ.

ಇತ್ತೀಚಿನ ಬರಹಗಳು: ಡಾ. ಗೋವಿಂದ್ ಹೆಗಡೆ (ಎಲ್ಲವನ್ನು ಓದಿ)

• ಗಜಲ್ - ಫೆಬ್ರುವರಿ 27, 2024
• ಗಜಲ್ - ಜನವರಿ 19, 2023
• ಬನ್ನಿ,ಮತ್ತೆ ಬನ್ನಿ-ರೂಮಿ ಕವಿತೆಗಳು - ಸೆಪ್ಟೆಂಬರ್ 17, 2022

ಒಳಗಿದ್ದವ ಹೊರಗಿದ್ದವನ ನಡುವೆ ಕಿಟಕಿಯಿಟ್ಟವರೇ ತಿರುಮಲೇಶರೆಂದರೆ
ಕವಿತೆಯ ಸಾಧ್ಯತೆಗಳಲ್ಲಿ ಪ್ರತಿದೈವವ ಕಂಡವರೇ ತಿರುಮಲೇಶರೆಂದರೆ

ಬೀದಿ ಬೆಳಕುಗಳು ಬರುವ ತನಕ ಕವಿ ಮತ್ತು ಕವಿತೆಯ ಸದ್ಯತೆಯ ಬಗೆದವರು
ಈ ದಾರಿಯಲಿ ನಮಗಿಂತ ಮೊದಲೆ ಧೇನಿಸಿದವರೇ ತಿರುಮಲೇಶರೆಂದರೆ

ಅಲ್ಲಿಂದ ಬಂದವ ಮತ್ತೆ ಕಳೆದುಹೋದವನ ನಡುವಿನ ಗೆರೆ-ಗಡಿ ಎಲ್ಲಿ
ಒಳಹೊರಗುಗಳಲ್ಲಿ ಅರ್ಥದ ಅಗ್ನಿದಿವ್ಯ ಹಾದವರೇ ತಿರುಮಲೇಶರೆಂದರೆ

ಮೋಡದ ಹೊರ ಅಂಚುಗಳಿಂದ ಬಿದ್ದು ಒಂಟಿ ಇರುವೆಯ ಮುಖಾಮುಖಿ
ಮುಖವಾಡಗಳ ಕಳಚು,ಕೊನೆಯ ಅವಕಾಶವೆಂದವರೇ ತಿರುಮಲೇಶರೆಂದರೆ

ಅಮೂರ್ತತೆಯಲ್ಲಿ ದೊರೆತ ಕವಿತೆಗಳು ವೇಷಧಾರಿ ಕಾಲದ ಕೈಗನ್ನಡಿ ಹೌದೇ
ಮನಸ್ಸಿಗೆ ಬಂದುದು ಅಕ್ಷರಕ್ಕೆ ಬರುವುದೇ,ತಪಿಸಿದವರೇ ತಿರುಮಲೇಶರೆಂದರೆ

ವಿನಾಕಾರಣದ ಸಂತೆಯಲ್ಲಿ ಕಾವ್ಯಕಾರಣದ ಶ್ರುತಿ ಹಿಡಿದು ಕುಣೀ ಕವಿತೆ ಕುಣೀ
ಆಳ ನಿರಾಳಗಳಲ್ಲಿ ವಾಗರ್ಥ ವಿಲಾಸದ ಮಾರ್ಗ ನಡೆದವರೇ ತಿರುಮಲೇಶರೆಂದರೆ

ಮೈಲಿಗಲ್ಲುಗಳ ಮೌನ ನಿಶ್ಚಲತೆಯಲ್ಲಿ ಮುಂದಿನ ಯುದ್ಧದ ಚಿತ್ರಗಳು ‘ಜಂಗಮ’
ಕಳವಳ ಸಮುದ್ರದಲ್ಲಿ ಆಗತ ಕವಿತೆಗಳ ವಿಳಾಸವಿಟ್ಟವರೇ ತಿರುಮಲೇಶರೆಂದರೆ

ಇದೊಂದು ವಿಶಿಷ್ಟ ಗಜ಼ಲ್.
ಇದರಲ್ಲಿ ಹಿರಿಯ ಕವಿ, ಲೇಖಕ ಡಾ ಕೆ ವಿ ತಿರುಮಲೇಶ್ ಅವರ ಮೂವತ್ತೈದಕ್ಕೂ ಹೆಚ್ಚು ಕವಿತೆಗಳ ಮತ್ತು ಕೆಲವು ಕೃತಿಗಳ ಹೆಸರುಗಳನ್ನು ಅಳವಡಿಸಲಾಗಿದೆ.

ಡಾ. ಗೋವಿಂದ ಹೆಗಡೆ