ಬನ್ನಿ,ಮತ್ತೆ ಬನ್ನಿ-ರೂಮಿ ಕವಿತೆಗಳು

• ಲೇಖಕರು
• ಇತ್ತೀಚಿನ ಬರಹಗಳು

ಡಾ. ಗೋವಿಂದ್ ಹೆಗಡೆ

ವೃತ್ತಿಯಲ್ಲಿ ವೈದ್ಯರಾಗಿ, ಕಾವ್ಯ,ಸಾಹಿತ್ಯಗಳಲ್ಲಿಅಪಾರ ಆಸಕ್ತಿ ಹೊಂದಿರುವ ಗೋವಿಂದ ಹೆಗಡೆ, ಕಥೆ, ಕವಿತೆ, ಅಂಕಣ ಬರಹ, ಲೇಖನ,ಅನುವಾದ ಇತ್ಯಾದಿ ಪ್ರಕಾರಗಳಲ್ಲಿ ವ್ಯವಸಾಯ ಮಾಡಿದ್ದಾರೆ. ಮೈಸೂರು ದಸರಾ ಕವಿಗೋಷ್ಠಿ, ಧಾರವಾಡ ಸಾಹಿತ್ಯ ಉತ್ಸವಗಳಲ್ಲಿತಮ್ಮ ಕವಿತೆಗಳನ್ನುಪ್ರಸ್ತುತಪಡಿಸಿದ್ದಾರೆ. ಪ್ರಾಚಾರ್ಯ ಎಚ್ಚೆಸ್ಕೆಜನ್ಮಶತಮಾನೋತ್ಸವ*'ಎಚ್ಚೆಸ್ಕೆ ಬೆಳಕು'* ಕಾರ್ಯಕ್ರಮದಲ್ಲಿ *ಕವಿಗೋಷ್ಠಿಯ ಅಧ್ಯಕ್ಷತೆ* ವಹಿಸಿದ ಗೌರವ ಇವರದು. ಕನ್ನಡ ಪುಸ್ತಕ ಪ್ರಾಧಿಕಾರದ ಯುವ ಬರಹಗಾರ ಪ್ರಶಸ್ತಿ ಪುರಸ್ಕೃತರು. 'ಕನಸು ಕೋಳಿಯ ಕತ್ತು' ಮತ್ತು 'ಪೇಟೆ ಬೀದಿಯ ತೇರು' ಎಂಬ ಎರಡು ಕವನ ಸಂಕಲನಗಳನ್ನು ಪ್ರಕಟಿಸಿದ್ದಾರೆ. ಇವರ ಬರಹಗಳು ಅನೇಕ ಪತ್ರಿಕೆಗಳಲ್ಲಿ ಹಾಗೂ ಆಕಾಶವಾಣಿ ಕೇಂದ್ರಗಳಿಂದ ಪ್ರಕಟ ಹಾಗೂ ಪ್ರಸಾರವಾಗಿವೆ.

ಇತ್ತೀಚಿನ ಬರಹಗಳು: ಡಾ. ಗೋವಿಂದ್ ಹೆಗಡೆ (ಎಲ್ಲವನ್ನು ಓದಿ)

• ಗಜಲ್ - ಫೆಬ್ರುವರಿ 27, 2024
• ಗಜಲ್ - ಜನವರಿ 19, 2023
• ಬನ್ನಿ,ಮತ್ತೆ ಬನ್ನಿ-ರೂಮಿ ಕವಿತೆಗಳು - ಸೆಪ್ಟೆಂಬರ್ 17, 2022

ಅವರಿಂದ ಒಂದು ಹೆಜ್ಜೆ ದೂರ
ಇಡುವುದು
ನಿನ್ನ ಸನಿಹಕ್ಕೆ ಒಂದು ಹೆಜ್ಜೆ
ಎಂದಾದರೆ ನಡೆಯುತ್ತಲೇ ಇರುವೆ

ಇತರರು ಹೇಳಿದಂತೆ ಮಾಡುತ್ತಿದ್ದೆ
ಕುರುಡನಾಗಿದ್ದೆ
ಇತರರು ಕರೆದಾಗ ಬರುತ್ತಿದ್ದೆ
ಕಳೆದುಹೋಗಿದ್ದೆ
ಆಮೇಲೆ ನಾನು ಎಲ್ಲರನ್ನೂ ತೊರೆದೆ
ನನ್ನನ್ನು ಕೂಡ…
ಆಗ ಎಲ್ಲರೂ ಸಿಕ್ಕರು ನನಗೆ
ನಾನು ಕೂಡ

ಬನ್ನಿ, ಬನ್ನಿ,
ನೀವು ಯಾರೇ ಆಗಿದ್ದರೂ!

ಭರವಸೆಯನ್ನು ಬಿಡಬೇಡಿ,
ನೀವು ನಿಮ್ಮ ಶಪಥಗಳನ್ನು
ನೂರಾರು ಸಲ ಮುರಿದಿದ್ದರೂ ಕೂಡ.

ಬನ್ನಿ, ಮತ್ತೆ ಬನ್ನಿ!

ನಾನು ಯಾವ ಮತಕ್ಕೂ
ಸೇರಿದವನಲ್ಲ. ನನ್ನ ಮತ
ಪ್ರೇಮ. ಪ್ರತಿಯೊಂದು
ಹೃದಯವೂ ನನ್ನ ಮಂದಿರ

ನಾನು ಸತ್ತಿದ್ದೆ, ಆಮೇಲೆ ಸಜೀವ.
ಅಳುತ್ತ ಆಮೇಲೆ ನಗುತ್ತ.
ಪ್ರೇಮದ ಶಕ್ತಿ ನನ್ನೊಳಗೆ ಬಂದಿತು
ನಾನಾದೆ ಸಿಂಹದಂತೆ ಭೀಷಣ
ಸಂಜೆಯ ತಾರೆಯಂತೆ ಮೃದು

ಮೌನವಾಗಿರಿ,
ಏಕೆಂದರೆ
ಮೌನದ ಲೋಕ
ವಿಶಾಲ, ಸಮೃದ್ಧ

ನಾವು ಪ್ರೀತಿಸುವ ಚೆಲುವು
ನಮ್ಮ ಗೈಮೆಯೇ ಆಗಿರಲಿ
ಮೊಳಕಾಲೂರಿ ನೆಲವನ್ನು ಚುಂಬಿಸಲು
ಇವೆ ನೂರಾರು ದಾರಿ

ಕಲ್ಪಿಸಿಕೊಳ್ಳಿ, ಆದರೆ ಎಚ್ಚರವಿರಲಿ
ನಿಮ್ಮ ಎಲ್ಲ ನೋಟಗಳು
ಪ್ರಾರ್ಥನೆಯ ಒಂದು ರೂಪ.

ನಿನ್ನ ಬೆಳಕಿನಲ್ಲಿ ನಾನು ಪ್ರೇಮಿಸುವುದ ಕಲಿಯುವೆ
ನಿನ್ನ ಚೆಲುವಿನಲ್ಲಿ ಕವಿತೆ ಬರೆಯುವುದನ್ನು
ನೀನು ನನ್ನೆದೆಯೊಳಗೆ ನರ್ತಿಸುವೆ
ಯಾರೂ ನೋಡುವುದಿಲ್ಲ ಅಲ್ಲಿ ನಿನ್ನ
ನಾನು ಕೆಲವೊಮ್ಮೆ ನೋಡುವೆ ಮತ್ತು
ಆ ದೃಶ್ಯವೇ ಹೀಗೆ ಕಲೆಯಾಗುತ್ತದೆ.

ಕನ್ನಡಕ್ಕೆ- ಡಾ. ಗೋವಿಂದ ಹೆಗಡೆ.