ಸಾಂಗತ್ಯ

• ಲೇಖಕರು
• ಇತ್ತೀಚಿನ ಬರಹಗಳು

ಡಾ. ಪ್ರೀತಿ ಕೆ.ಎ.

ಹುಟ್ಟೂರು ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರು. ಪ್ರಸ್ತುತ ಬೆಂಗಳೂರಿನಲ್ಲಿ ವಾಸ. ಅರ್ಥಶಾಸ್ತ್ರದಲ್ಲಿ ಡಾಕ್ಟರೇಟ್ ಪದವೀಧರೆ. ಕರ್ನಾಟಕ ಆರ್ಥಿಕತೆಯ ಬಗ್ಗೆ ಪುಸ್ತಕ ಹಾಗೂ ಹಲವಾರು ಸಂಶೋಧನಾ ಪ್ರಬಂಧಗಳು ಪ್ರಕಟಗೊಂಡಿವೆ. ನಾನಾ ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ಸೆಮಿನಾರುಗಳಲ್ಲಿ ಭಾಗವಹಿಸಿ ಪ್ರಬಂಧ ಮಂಡಿಸಿರುತ್ತಾರೆ. ವೃತ್ತಿಯಿಂದಉಪನ್ಯಾಸಕಿಯಾದರೂ ಸಾಹಿತ್ಯ ಕ್ಷೇತ್ರದೆಡೆಗೆ ಹೆಚ್ಚಿನಒಲವು. ಓದು ಮತ್ತು ಬರವಣಿಗೆ ಮೆಚ್ಚಿನ ಹವ್ಯಾಸಗಳು. ಕೆಲವು ಕವಿತೆಗಳು ಹಾಗೂ ಲೇಖನಗಳು ಪ್ರಕಟಗೊಂಡಿವೆ.

ಇತ್ತೀಚಿನ ಬರಹಗಳು: ಡಾ. ಪ್ರೀತಿ ಕೆ.ಎ. (ಎಲ್ಲವನ್ನು ಓದಿ)

• ಅವರಿಬ್ಬರೂ ಪ್ರೇಮಿಗಳಲ್ಲ - ನವೆಂಬರ್ 20, 2022
• ಸಿಕ್ಕು - ಮೇ 28, 2022
• ಅಮ್ಮ ನೆನಪಾಗುತ್ತಾಳೆ - ಮೇ 8, 2022

ದಶಕಗಳ ಹಿಂದೆಯೂ
ನಾನು ಇದೇ ರೀತಿ
ಸಿಂಗರಿಸಿಕೊಳ್ಳುತ್ತಿದ್ದೆ
ತೀಡಿದ ಹುಬ್ಬು
ಕಣ್ಣುಗಳಿಗೆ ಕಡುಗಪ್ಪು ಕಾಡಿಗೆ
ತುಟಿಗಳಿಗೆ ತಿಳಿ ಗುಲಾಬಿಯ ರಂಗು
ನೆರಿಗೆ ಚಿಮ್ಮುವ ಸೀರೆ
ಬಳೆಗಳ ನಿನಾದ
ಬಿಳಿ ಪಾದಕ್ಕೆ ನೀನಿತ್ತ ಬೆಳ್ಳಿ ಕಾಲ್ಗೆಜ್ಜೆ

ಒಪ್ಪಿಕೊಳ್ಳುತ್ತೇನೆ ಗೆಳೆಯಾ
ಈಗ ನಾನು ಮೊದಲಿನಂತಿಲ್ಲ
ಹುಬ್ಬುಗಳು ಚೂರು ಗಂಟಿಕ್ಕಿವೆ
ಕಣ್ಣುಗಳ ಸುತ್ತ ಮೂಡಿರುವ ಸುರುಳಿಯಾಕಾರದ
ಕಪ್ಪು ಆಕೃತಿಗಳನ್ನು ಮರೆಮಾಚಲು
ಕಾಡಿಗೆ ಸೋಲುತ್ತಿದೆ
ತುಟಿಗಳು ರಂಗು ಕಳೆದುಕೊಂಡಿವೆ
ಸೀರೆ ತುಸುವೇ ದಪ್ಪ ಸೊಂಟದಿಂದ
ಇಳಿಜಾರಿನಂತೆ ಕೆಳಗೆ ಬೀಳುತ್ತದೆ
ಕೈಗಳು ಸೊರಗಿವೆ
ಹಿಮ್ಮಡಿ ಒಡೆದಿದೆ

ಒಪ್ಪಿಕೊಳ್ಳುತ್ತೇನೆ ಗೆಳೆಯಾ
ಬದಲಾದದ್ದು ಬರಿಯ ನಾನಲ್ಲ
ನಿನ್ನೆಡೆಗಿನ ನನ್ನ ಪ್ರೀತಿಯೂ
ಇದೀಗ ನಾನು ನಿನ್ನ
ಬಿಸಿಯಪ್ಪುಗೆ ಇಲ್ಲದೆಯೂ
ಕರಗಬಲ್ಲೆ
ನೀನು ಬಳಿಯಿಲ್ಲದಿದ್ದರೂ
ನಿನ್ನಿರುವಿಕೆಯನ್ನು ಅನುಭವಿಸಬಲ್ಲೆ

ನೀನು ಮಾತಾಡುವ ಮೊದಲೇ
ನೀನಾಡುವ ಪದಗಳನ್ನು
ಗ್ರಹಿಸಬಲ್ಲೆ
ನಿನ್ನ ಮೌನದಲ್ಲೂ
ಸಾವಿರ ಅರ್ಥ ಹುಡುಕಬಲ್ಲೆ
ನೀನು ನನ್ನೊಡನೆ
ಹಂಚಿಕೊಳ್ಳದ ನೋವಿಗೂ
ಮಿಡುಕಬಲ್ಲೆ
ನಿನ್ನ ಪ್ರತಿಯೊಂದು ನಗುವಿನ
ಹಿಂದಿನ ಕಾರಣವನ್ನು
ನಾನಷ್ಟೇ ಬಲ್ಲೆ

ಈಗ ಹೇಳು ಗೆಳೆಯಾ
ಇವಿಷ್ಟು ಸಾಲದೇ
ನನ್ನ- ನಿನ್ನ ಸಾಂಗತ್ಯಕ್ಕೆ?
ಬೆಡಗು ಬಿನ್ನಾಣ ಇನ್ನೂ ಬೇಕೆ?