ಋಜುಮಾರ್ಗವನರಸಿ,,,,

• ಲೇಖಕರು
• ಇತ್ತೀಚಿನ ಬರಹಗಳು

ನಾ ದಿವಾಕರ

ಕೋಲಾರ ಜಿಲ್ಲೆಯ ಬಂಗಾರಪೇಟೆಯವರಾದ ನಾ. ದಿವಾಕರ ಕೆನರಾ ಬ್ಯಾಂಕಿನಲ್ಲಿ 35 ವರ್ಷದ ಸೇವೆಯ ಬಳಿಕ ಸ್ವಯಂ ನಿವೃತ್ತಿಯಾದವರು.
ಪ್ರವೃತ್ತಿಯಿಂದ ಲೇಖಕರು. ಅನೇಕ ಲೇಖನ ಬರಹ, ಅನುವಾದ ಮತ್ತು ಕವಿತೆಗಳನ್ನು ರಚಿಸಿದ್ದಾರೆ .
ದಿವಾಕರ್ ಅವರ ಇಪ್ಪತ್ತಕ್ಕೂ ಹೆಚ್ಚು ಪುಸ್ತಕಗಳು ಪ್ರಕಟವಾಗಿದ್ದು, ಪ್ರಥಮ ಕವನ ಸಂಕಲನ ಅಚ್ಚಿನಲ್ಲಿದೆ.

ಇತ್ತೀಚಿನ ಬರಹಗಳು: ನಾ ದಿವಾಕರ (ಎಲ್ಲವನ್ನು ಓದಿ)

• ಭಾರತದಲ್ಲಿ ಕಳೆದುಹೋಗುತ್ತಿರುವ ವೈಜ್ಞಾನಿಕ ಪ್ರಜ್ಞೆ - ಸೆಪ್ಟೆಂಬರ್ 3, 2022
• ನವ ಭಾರತ ಹಿಂಸೆಯ ತಾಣವಾಗುತ್ತಿದೆಯೇ ? - ಮೇ 1, 2022
• ಯುದ್ಧೋನ್ಮಾದದ ಅಲೆಯೂ ಪ್ರಜಾತಂತ್ರದ ಆಶಯಗಳೂ - ಮಾರ್ಚ್ 1, 2022

ಹೆಜ್ಜೆ ಗುರುತಿ‌ನ ಗರ್ಭದಲೂ
ನೆನಪುಗಳುಂಟು
ಕಹಿ-ಸಿಹಿ ನೇರ-ಮರೆಯ
ನೆರಳು-ಸರಳಿನಾಟದ ನಡುವೆ
ಸ್ಮೃತಿಯಿಂದುದುರಿ ಹೋದ
ಗಳಿಗೆಗಳು ಮರಳಿಸುತ್ತವೆ
ಎಡವಿದ ಆ ಕ್ಷಣಗಳನು
ಆತ್ಮ ಶೋಧನೆಗಾಗಿ ಸಾಕ್ಷ್ಯಗಳನರಸಿ ;

ವರ್ತಮಾನದ ಮುಸುಕು
ಅರ್ಧಸತ್ಯದ ಕೂಪ
ಭೂತದೊಳಗಿನ ಚುಕ್ಕೆಗಳ ಬಣ್ಣ
ಚಿತ್ತಾರ ರೇಖೆಗಳಲಿ ಲೀನ
ಗೆರೆ ಎಳೆವ ಮುನ್ನ
ಎದೆ ಬಾಗಿಲ ಬಡಿದು ಕಾಣು
ಹರಿವ ತೊರೆಗಳಲಿರಬಹುದು
ತಪ್ಪು ಒಪ್ಪುಗಳ ನಾವೆ ;

ತೊಟ್ಟೆಸೆವ ಉಡುಪುಗಳಂತೆ
ಭವ ಬಂಧನಗಳು
ಚಾಚುವ ಬಾಹುಗಳಲೇನುಂಟು
ಹಿಡಿದ ಬೆರಳುಗಳ ನಡುವೆ
ಸೋರಿದ ಬೆವರಹನಿಗಳೆನಿತೋ?
ಬಿರುನಡಿಗೆಯ ಹಾದಿಯಲಿ
ಬೇಲಿಯ ಹಂಗಿರಲೇಕೆ
ಪಾದದಡಿಯ ಕ್ಷೀಣ ದನಿಗೆ
ತರಂಗಗಳ ಹಂಗೇಕೆ ?

ತೊಗಲ ಅಣುಅಣುವಿನಲಿ
ಹೆಗಲಂಚಿನ ನಾಡಿಯಲಿ
ಲಾಲಿಯ ತುಣುಕುಗಳಿಹುದು
ರೆಪ್ಪೆಯಂಚಿನ ಹನಿಗಳಲಿ
ತೂಗಿದ ತೋಳುಗಳಲಿ
ತುಂಡರಿಸೆಸೆದ ನೆನಪುಗಳಿವೆ ;
ದಿಬ್ಬದ ಮೇಲಿನ ಹಣತೆಗೆ
ಬಿರುಗಾಳಿಯ ಹಂಗಿರಲಹುದೇ
ನಂದಿದ ಬತ್ತಿಯಲಿರಬಹುದು
ಸವೆದ ಹಾದಿಯ ಕಿರಣ !