ಪತಿತ ಪಾವನದಾಟ ಸಾಕು

• ಲೇಖಕರು
• ಇತ್ತೀಚಿನ ಬರಹಗಳು

ಸುಚಿತ್ರಾ ಹೆಗಡೆ

ಉತ್ತರ ಕನ್ನಡ ಜಿಲ್ಲೆಯ ಕುಮಟಾದ ಕತಗಾಲ ಹುಟ್ಟೂರು. ಕುಮಟಾದ ಬಾಳಿಗಾ ಕಾಲೇಜು, ಕರ್ನಾಟಕ ವಿಶ್ವವಿದ್ಯಾಲಯದಿಂದ ಆಂಗ್ಲ ಸಾಹಿತ್ಯದಲ್ಲಿ ಪದವಿ (ಪ್ರಥಮ ದರ್ಜೆ). ಕಮಲಾ ಬಾಳಿಗಾ ಕಾಲೇಜಿನಿಂದ ಬಿ ಎಡ್ ಪದವಿ ಹಾಗೆಯೇ ಕರ್ನಾಟಕ ಮುಕ್ತ ವಿಶ್ವವಿದ್ಯಾಲಯದಿಂದ ಆಂಗ್ಲ ಸಾಹಿತ್ಯದಲ್ಲಿ ಸ್ನಾತಕೋತ್ತರ ಪದವಿ. ಕನ್ನಡ ಸಾಹಿತ್ಯದಲ್ಲಿ ಅಪಾರ ಆಸಕ್ತಿ. ಹಲವು ಕವನಗಳು ನಾಡಿನ ವಿವಿಧ ವೆಬ್ ಮ್ಯಾಗಜೀನ್, ಪತ್ರಿಕೆ/ನಿಯತಕಾಲಿಕಗಳಲ್ಲಿ ಪ್ರಕಟಗೊಂಡಿವೆ.

ಇಪ್ಪತ್ತೆರಡು ವರುಷಗಳಿಂದ ಹೈಸ್ಕೂಲು, ಕಾಲೇಜುಗಳಲ್ಲಿ ಸೇವೆ ಸಲ್ಲಿಸಿ ಈಗಸ್ವಂತ ಉದ್ಯೋಗ ಒಂದನ್ನು ಆರಂಭಿಸಿದ್ದಾರೆ. ಇತ್ತೀಚಿನವರೆಗೂ ಬೆಂಗಳೂರು ನಿವಾಸಿಯಾಗಿದ್ದು ಪ್ರಸ್ತುತ ಸಾಂಸ್ಕೃತಿಕ ನಗರಿ ಮೈಸೂರಲ್ಲಿ ನೆಲೆಸಿದ್ದಾರೆ.

ಇತ್ತೀಚಿನ ಬರಹಗಳು: ಸುಚಿತ್ರಾ ಹೆಗಡೆ (ಎಲ್ಲವನ್ನು ಓದಿ)

• ಪತಿತ ಪಾವನದಾಟ ಸಾಕು - ಮೇ 30, 2021
• ನಿಮಗ್ನ… - ಡಿಸಂಬರ್ 31, 2020

ಯುಗಯುಗಗಳಿಂದ ಮಿಸುಕದೆ ಮಲಗಿ 
ನನ್ನೊಳಗೆ ನಾ ಬಿದ್ದು ಜಡವಾಗಿ
ಮುದ್ದೆಯಾಗಿದೆ ಮೈಮನ

ಚಳಿ ಬಿಸಿಲು ಮಳೆಯ ಮನವಿಗೆ
ಕಾಲನ ಪಾಚಿಯ ಮುಸುಕು ಸರಿದಿಲ್ಲ

ಯೋಗನಿದ್ರೆಯೋ ಮಾಯಾವಿದ್ಯೆಯೋ
ಶಾಪಗ್ರಸ್ತ ಮೈಮನಕೆ ದೀರ್ಘ ಮಂಪರು

ತಣ್ಣಗೆ ಸುಳಿವ ಗಾಳಿ ಕಿವಿಯಲಿ ಪಿಸುಗುಡುತ್ತದೆ
ಪ್ರಾಣವಾಯುವಲ್ಲ…ನಿನಗೆ ಬೇಕು ಚಲನೆ

ನಿನ್ನೊಳಗಿನ ಮರಗಟ್ಟಿದ ಅಂಗಾಂಗಗಳಿಗೆ
ಚುರುಗುಡುವ ಜೀವಂತಿಕೆಯ ಸಂವೇದನೆ

ನಿಶ್ಚಲ ದೇಹದಲಿ ನಿಜದರಿವಿನ ಆವಾಹನೆ
ಹೊರಗಿನ ರಾಮನಿಗೆ ಕಾಯುವ ಸಹನೆ
ಅದುಮಿಕೊಂಡಷ್ಟೂ ಭುಗಿಲೇಳುವ ವೇದನೆ

ಸಾಕು, ಎದ್ದೇಳು, ಮೈ ಕೊಡವಿ
ನಿನ್ನ ಕಾಲು ನಿನ್ನ ನೆಲ ನಿನ್ನ ಛಲ ನಿನ್ನ ಬಲ

ಕೊಡವಿಕೋ ತಡವಿಕೋ ನಿನ್ನಂತರಂಗವ
ಹೊಸ ಆತ್ಮಬಲದ ನೀರು ಚಿಮುಕಿಸು

ಹಳೆ(ಣೆ) ಬರಹವ ಅಳಿಸಿಬಿಡು
ಪತಿತ ಪಾವನದಾಟದ ಕಥೆಯ ನಾಯಕಿ
ಹುಟ್ಟದಿರಲಿ ಮತ್ತೆ ಮತ್ತೆ…