ಇಪ್ಪತ್ತೆರಡು ವರುಷಗಳಿಂದ ಹೈಸ್ಕೂಲು, ಕಾಲೇಜುಗಳಲ್ಲಿ ಸೇವೆ ಸಲ್ಲಿಸಿ ಈಗಸ್ವಂತ ಉದ್ಯೋಗ ಒಂದನ್ನು ಆರಂಭಿಸಿದ್ದಾರೆ. ಇತ್ತೀಚಿನವರೆಗೂ ಬೆಂಗಳೂರು ನಿವಾಸಿಯಾಗಿದ್ದು ಪ್ರಸ್ತುತ ಸಾಂಸ್ಕೃತಿಕ ನಗರಿ ಮೈಸೂರಲ್ಲಿ ನೆಲೆಸಿದ್ದಾರೆ.
- ಪತಿತ ಪಾವನದಾಟ ಸಾಕು - ಮೇ 30, 2021
- ನಿಮಗ್ನ… - ಡಿಸಂಬರ್ 31, 2020
ಹೂಮಾಲೆಯೊಂದು ಕಟ್ಟುತ್ತಿದ್ದೇನೆ
ಸಾವಧಾನತೆಯಿಂದ
ನಿಮಗ್ನಳಾಗಿ…
ಒಂದರ ಪಕ್ಕ ಇನ್ನೊಂದು
ಒಂದೇ ಸಮ ಬರುವಂತೆ
ಹೂವು ಇಟ್ಟು ಜೋಡಿಸಿ…
ಕುಸುಮ ಕೋಮಲ ಪಕಳೆ
ನೋವಾಗದಷ್ಟು ಸಡಿಲ
ಸಪೂರವಾದ ದಂಟುಮೈ
ಜಾರಿ ಬೀಳದಷ್ಟು ಬಿಗಿಯಾಗಿ…
ಅರಿವಿನ ದಾರದಿಂದ
ಸುತ್ತಿ ಸುಳಿದು ಮುತ್ತಿಕೊಳ್ಳುವ
ಗೋಜಲುಗಳ…
ಒಂದೊಂದಾಗಿ ಬಿಡಿಸಿಕೊಂಡು
ಕಂಡರೂ ಕಾಣದಂತೆ
ಸಂಯಮದ ಗಂಟು ಬಿಗಿದು…
ಮತ್ತೆ ಮುಂದಿನ ಹೂವು…
ಸಾವಧಾನತೆಯಿಂದ
ನಿಮಗ್ನಳಾಗಿ…
ಒಂದು ಸಲಕ್ಕೆ ಒಂದೇ ಹೂವು
ನೋಯದಂತೆ ಬೀಳದಂತೆ
ದಾರಗಳು ಸಿಕ್ಕಾಗದಂತೆ…
ಮಧ್ಯೆ ಬರುವ ನೂರೆಂಟು
ಚಿಂತೆಗಳ ನೆನಪುಗಳ ತಾಕಲಾಟಗಳ
ಬಿಡಿ ಹೂಗಳ ರಾಶಿಯನ್ನು…
ಒಂದೊಂದಾಗಿ ನಿಧಾನವಾಗಿ
ನಾಜೂಕಾಗಿ ನೇವರಿಸಿ
ದೂರ ಸರಿಸಿ … ಸರಿಸಿ…ಸರಿಸಿ…
ಒಂದು ಸಲಕ್ಕೆ ಒಂದೇ ಹೂವು
ಸಾವಧಾನತೆಯಿಂದ
ನಿಮಗ್ನಳಾಗಿ…
ಕೆಲವೇ ದಿನಗಳ ಹಿಂದೆ
ನಾವಾಡಿದ ಮಾತುಗಳು
ಓಡಾಟ ಸಲ್ಲಾಪ ನಗು ಅಳು…
ಹೂಗಳ ಮೃದುತ್ವ
ದಾರದ ಹರಿತ ಸ್ಪರ್ಶ
ಒಟ್ಟೊಟ್ಟಿಗೇ ಅನುಭವಿಸುತ್ತ….
ಮತ್ತೆ ಹೂಗಳನ್ನು ಒಂದೊಂದಾಗಿ
ಜೋಡಿಸುತ್ತ…ಗಮನಿಸುತ್ತ…
ಎಲ್ಲವನ್ನೂ ಸ್ವಾಗತಿಸುತ್ತೇನೆ…
ಬಂದು ಕೆಲಸಮಯ ಇದ್ದು
ತಮ್ಮಷ್ಟಕ್ಕೆ ಹಾದುಹೋಗುವ ಭಾವಪಯಣವನ್ನು
ನಿರಾಳತೆಯಿಂದ ಅನುಭವಿಸುತ್ತೇನೆ….
ಸಾವಧಾನತೆಯಿಂದ
ನಿಮಗ್ನಳಾಗಿ…
ಹೆಚ್ಚಿನ ಬರಹಗಳಿಗಾಗಿ
ರೆಕ್ಕೆ ಇದ್ದರೆ ಚೆನ್ನಾಗಿತ್ತು
ಇದು ಅದಲ್ಲ
ರಾಧೇಭಾವ