ಸ್ವತಂತ್ರ ಸ್ವಾದ

• ಲೇಖಕರು
• ಇತ್ತೀಚಿನ ಬರಹಗಳು

ಮಹಾದೇವ ಕಾನತ್ತಿಲ

ಮಹಾದೇವ ಕಾನತ್ತಿಲ ಹುಟ್ಟಿದ್ದು, ಗಡಿನಾಡ ಜಿಲ್ಲೆ,ಕೇರಳದ ಕಾಸರಗೋಡು ಜಿಲ್ಲೆಯಲ್ಲಿ. ಮಂಗಳೂರು ವಿಶ್ವವಿದ್ಯಾನಿಲಯದಲ್ಲಿ, “ಮೆಟೀರಿಯಲ್ಸ್ ಸೈನ್ಸ್” ನಲ್ಲಿ ಸ್ನಾತಕೋತ್ತರ ಪದವಿ, ಐ.ಐ.ಟಿ. ಮದರಾಸು, ವಿನಿಂದ ಭೌತಶಾಸ್ತ್ರದಲ್ಲಿ ಡಾಕ್ಟರೇಟ್ ಪದವಿ ಪಡೆದು, ಕಳೆದ ಎರಡು ದಶಕಗಳಿಂದ, ಡಿ.ಆರ್.ಡಿ.ಒ. ಹೈದರಾಬಾದ್ ನಲ್ಲಿ, ವಿಜ್ಞಾನಿಯಾಗಿ ವೃತ್ತಿ. ಸಾಹಿತ್ಯ ಮತ್ತು ಸಂಗೀತ ಹೃದಯಕ್ಕೆ,ಹತ್ತಿರ.

ಇತ್ತೀಚಿನ ಬರಹಗಳು: ಮಹಾದೇವ ಕಾನತ್ತಿಲ (ಎಲ್ಲವನ್ನು ಓದಿ)

• ಪಾತ್ರದೊಳಗಿನ ಕಲೆಗಳು - ಅಕ್ಟೋಬರ್ 28, 2024
• ಸಿದ್ಧಾಂತಗಳು ಬೆಳಕನ್ನು ಬಂಧಿಸಬಲ್ಲವೇ? - ಸೆಪ್ಟೆಂಬರ್ 4, 2022
• ಪಾತರಗಿತ್ತಿ ಪರಿಣಾಮ! - ಆಗಸ್ಟ್ 21, 2022

ಆಫೀಸು ಕೆಲಸ ಮುಗಿಸಿ
ಮನೆಗೆ ಬಂದಾಗ ಬೀಗ
ಬಾಗಿಲು ಕಾದಿತ್ತು..
ಕೀಲಿ ತಿರುಗಿಸಿ ತೆರೆದೆ

ಹೆಗಲು ಭಾರದ ಚೀಲ
ಮೂಲೆಗೆಸೆದೆ..
ಕಿಸೆಯಲ್ಲಿದ್ದ ನೋಟು
ಐಡೆಂಟಿಟಿ ಕಾರ್ಡು
ಡ್ರೈವಿಂಗ್ ಲೈಸೆನ್ಸು
ಕಪಾಟೊಳಗೆ ಕಾಪಿಟ್ಟೆ
ನಾಳೆಗಾಗಿ..

ಬೆಳಗ್ಗೆ ಧರಿಸಿದ್ದ ಇಸ್ತ್ರಿ
ಮಡಿ ಮಡಿಕೆಯ ದಿರಿಸು
ಮುದುರಿದೆ..
ಕೆಲಸದ ಬೆವರು ಅಂಟಿದೆ
ಕಳಚಿ ತೊಳೆಚೀಲಕ್ಕೆ ತುಂಬಿದೆ..

ಷವರ್ ನ ಕೆಳಗೆ ನಿಂತರೆ
ಮೈ ಸವರುವ ತಂಪು ಹನಿಗಳು
ಮೈಸೂರು ಸ್ಯಾಂಡಲ್ ಸೋಪು ನೊರೆ ನೊರೆ ಸೇರಿ ಪೊರೆ ಕಳಚಿ
ಕೊಳಚೆ ಗುಂಡಿಯತ್ತ ಹರಿದವು.
ಬಿಸಿಲು ಹೀರಿ
ಗರಿಗರಿಯಾದ ಪಂಚೆಯುಟ್ಟೆ..

ಚಹಾ ಪಾತ್ರೆಗೆ ಕಣ್ಣಳತೆಯ
ನೀರು..
ಹದಮನಬಿಸಿಯಲ್ಲಿ ಕುದಿಸಿ
ಚಹಾ ಪುಡಿ ಐಡಿಯಾ ಬೆರೆಸಿ ಒಗರು
ಸಕ್ಕರೆ ಹಿತಮಿತ ಶಕ್ತಿ
ಬಿಳಿಗಣ್ಣ ಕೆಂಬಣ್ಣಕ್ಕೆ ಅಷ್ಟೇ ಹಾಲುಗನಸು

ಹಜಾರದ ಕುರ್ಚಿಯಲ್ಲಿ
ವರ್ತಮಾನದ ಹಬೆಯಾಡುವ
ಚಹಾ ಕಪ್ಪು ಕೈಯಲ್ಲಿ..
ಗುಟುಕು ಗಂಟಲಿಗಿಳಿಸಿ
ಅರೆಗಣ್ಣು ಮುಚ್ಚಿ
ಸ್ವತಂತ್ರ ಸ್ವಾದಕ್ಕೆ
ಅರ್ಪಣೆಯಾಗಿರುವೆ..