ಇದೇನು ನಾಟಕವಲ್ಲ

• ಲೇಖಕರು
• ಇತ್ತೀಚಿನ ಬರಹಗಳು

ಕು.ಸ.ಮಧುಸೂದನ ರಂಗೇನಹಳ್ಳಿ

ಚಿಕ್ಕಮಗಳೂರು ಜಿಲ್ಲೆಯ ತರೀಕೆರೆಯವರಾದ ಮಧುಸೂದನ ಅವರು ಕಾವ್ಯ,ಕತೆ,ಬರಹಗಳಲ್ಲಿ ಕೃಷಿ ಮಾಡಿದವರು. ಸಾಹಿತ್ಯ ಪತ್ರಿಕೆಯ ಸಂಪಾದಕರೂ ಆಗಿರುವ ಇವರಅಸಹಾಯಕ ಆತ್ಮಗಳು’ ಕಥಾ ಸಂಕಲನ ಹಾಗೂ, ’ದುರಿತ ಕಾಲದ ದನ” ಎಂಬ ಕವನ ಸಂಕಲನ ಬಿಡುಗಡೆಯಾಗಿವೆ.

ಇತ್ತೀಚಿನ ಬರಹಗಳು: ಕು.ಸ.ಮಧುಸೂದನ ರಂಗೇನಹಳ್ಳಿ (ಎಲ್ಲವನ್ನು ಓದಿ)

• ಕವಿತೆ ಹುಟ್ಟುವುದಕ್ಕೆ ಹೊತ್ತು ಗೊತ್ತಿಲ್ಲ - ಆಗಸ್ಟ್ 6, 2023
• ಇದೇನು ನಾಟಕವಲ್ಲ - ಜನವರಿ 30, 2022
• ಕು.ಸ.ಮಧುಸೂದನರ ಎರಡು ಕವಿತೆಗಳು - ಡಿಸಂಬರ್ 21, 2021

ನೀ ಬರುವ ಮುಂಚೆ
ಮುಖವಾಡಗಳ ರಾಶಿಯನ್ನೇ
ಹರಡಿಕೊಂಡಿದ್ದೆ
ಸುಳ್ಳುಗಳು ಸುಲಭವಾಗಿದ್ದವು
ಮೋಸಗಳು ಮಾಮೂಲಾಗಿದ್ದವು
ಕೊಟ್ಟ ಮಾತುಗಳು ಇಟ್ಟ ಆಣೆಗಳು ಅಳತೆ ಮೀರಿದ್ದವು
ಅವು ಕಷ್ಟದ ದಿನಗಳಾಗಿದ್ದವು
ಆತ್ಮದ ಮಾತಾಡುವುದೇ ಅಸಹ್ಯವೆನಿಸಿತ್ತು
ಎಲ್ಲ ಬಣ್ಣಗಳನ್ನೂ ಕಪ್ಪು ಬಣ್ಣದೊಳಗೆ ಬೆರೆಸಿ
ಬೇರೆ ಯಾವ ಬಣ್ಣವೂ ಇರದಂತೆ ಮಾಡಿದ್ದ ದಿನಗಳವು
ಮೂರೇ ದಿನಕ್ಕಾಗಲೀ
ನೀ ಬಂದ ಮೇಲೆ
ಅಷ್ಟೂ ಮುಖವಾಡಗಳ ಸುಟ್ಟು ಹಾಕಿದೆ
ಮೋಸದ ಮಾತುಗಳ ಮರೆತುಬಿಟ್ಟೆ
ಈಡೇರಿಸಲಾಗದ ಆಣೆಗಳ ಮಾಡುವುದ ನಿಲ್ಲಿಸಿ
ಕಡತಂದು ಕಾಮನ ಬಿಲ್ಲಿಂದ ಬಣ್ಣಗಳ ಓಕುಳಿಯಾಡಿದೆ
ಆತ್ಮಸಾಕ್ಷಿಯ ಎಚ್ಚರಿಸಿಕೊಂಡೆ
ನಿನ್ನ ಮುಂದೆ ಪರಿಪೂರ್ಣವಾಗಿ ತೆರೆದುಕೊಂಡು
ಹಳೆಯ ಪಾತಕಗಳಿಗೊಂದು ಕ್ಷಮೆ ಕೋರಿ
ಹೊಸ ಮನುಷ್ಯನಾಗಬೇಕೆಂದು ಬಯಸಿದೆ
ನನ್ನ ನಾನು ಕೊಂದುಕೊಂಡು
ನಿನ್ನ ಹೊಟ್ಟೆಯಲಿ ಹೊಸದಾಗಿ
ಹುಟ್ಟಿದ ಮಗುವಾಗ ಬೇಕೆಂದು ಹಂಬಲಿಸಿದೆ
ಕ್ರಿಸ್ತನ ಮುಂದೆ
ಪಾಪ ನಿವೇಧನೆ ಮಾಡಿಕೊಳ್ಳುವಂತೆ
ನಿನ್ನೆದುರು ಮಂಡಿಯೂರಿ ಕೂತಿದ್ದೆ
ಮುಚ್ಚಿದ ಕಣ್ಣು
ತೆರೆಯುವಷ್ಟರಲ್ಲಿ ಮತ್ತೆ
ಗಾಢಾಂಧಕಾರ
ನೀನೂ ಮಾಯವಾಗಿಬಿಟ್ಟೆ.
ಪಾಪಿಯೊಬ್ಬ ಬದಲಾಗುವಂತಿಲ್ಲ
ನಿನ್ನ ಪುಣ್ಯವಂತರ ಲೋಕದಲ್ಲಿ