ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲ್ಲೂಕಿನ ಬೇದೂರು,ಜಿತೇಂದ್ರ ಅವರ ಹುಟ್ಟೂರು.ವಿಜ್ಞಾನ ವಿಷಯದಲ್ಲಿ ಸ್ನಾತಕೋತ್ತರ ಪದವಿ, ಔಷಧೀಯ ಸಂಸ್ಥೆಯಲ್ಲಿ ಉದ್ಯೋಗ.ಸಾಹಿತ್ಯದಲ್ಲಿ ಆಸಕ್ತಿ.ಜಾಲತಾಣಗಳಲ್ಲಿ ಇವರ ಕವಿತೆಗಳು ಪ್ರಕಟವಾಗಿವೆ.
ಇತ್ತೀಚಿನ ಬರಹಗಳು: ಜಿತೇಂದ್ರ ಬೇದೂರು (ಎಲ್ಲವನ್ನು ಓದಿ)
ಟೊಂಗೆಗಾದರೂ ಕೇಳಿಸಿತ್ತೇ?
ತೊಟ್ಟು ಕಳಚಿದ ಸದ್ದು!?
ಈಗಷ್ಟೇ ಉದುರಿದ, ತನ್ನದೇ ಎಲೆಯ ನಿಟ್ಟುಸಿರು?.
ಅಥವಾ,
ಹೊಸ ಚಿಗುರಿನ ಸಂಭ್ರಮದಲ್ಲಿದ್ದ ಟೊಂಗೆಗೆ
ಗಾಳಿಯೊಂದು ನೆಪವೇ?
ಹೊತ್ತು ಸರಿಯಿತು..
ಸದ್ದಿಲ್ಲದೇ ಕರಗಿದ ಹುಲ್ಲಿನ ಮೇಲಿನ ಹನಿಯ
ಮನಸನ್ನು ಅರಿತವರಾರು?
ಕನಸುಗಳು ಇದ್ದಿರಬಹುದೇ ಆ ಹನಿಗೆ?
ಕರಗಿರಬಹುದೇ,ಜೊತೆಗೇ?
ಗಮನಿಸಿದ್ದನೇ ಸೂರ್ಯ,ಹೊಳೆವ ಹನಿಗಳನ್ನು?
ಅಥವಾ,
ಏರು ರವಿಗೆ ಕಾಯಕವೊಂದು ನೆಪವೇ?
ಹೊತ್ತು ಮುಳುಗಿತು..
ರೆಕ್ಕೆ ಬಲಿಯದ
ಪುಟ್ಟ ಚಿಟ್ಟೆಗಳ ಹಿಂಡು
ತಿಳಿದೋ, ತಿಳಿಯದೆಯೋ,
ಬೆಂಕಿಯ ಮೋಹಕ್ಕೆ ಬಿದ್ದು..
ಸುಟ್ಟ ರೆಕ್ಕೆಗಳ ಕಮಟು ವಾಸನೆ..
ಎದೆಯ ತುಂಬಾ!
ಹೊತ್ತು ಮೂಡಿತು ಮತ್ತೆ!
ಬಿದ್ದ ತರಗೆಲೆಯ ಮೇಲೆಲ್ಲಾ ಮಂಜು ಹನಿಗಳ ಸಾಲು,
ಇನ್ನೆಷ್ಟು ಹನಿಗಳ ಸರದಿಯೋ ಈಗ
ಜೊತೆಗೆ ಕರಗುವ ಕನಸುಗಳು ಎಷ್ಟೋ?
ಜಡ ಹರಿದ ಭ್ರಮೆಯಲ್ಲಿ
ಜಗಕೆ ಧಾವಂತ
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ