ನಾನು ಯಾರು ಮತ್ತು ಇನ್ನೊಂದು ಕವಿತೆ

• ಲೇಖಕರು
• ಇತ್ತೀಚಿನ ಬರಹಗಳು

ಚಿಂತಾಮಣಿ ಕೊಡ್ಲೆಕೆರೆ

ಡಾ.ಚಿಂತಾಮಣಿ ಕೊಡ್ಲೆಕೆರೆ ಕವಿ, ಕತೆಗಾರ, ಪ್ರಬಂಧಕಾರ ಮತ್ತು ವಿಮರ್ಶಕರಾಗಿ ಚಿರ ಪರಿಚಿತರು.
ಮೂಲತಃ ಉತ್ತರಕನ್ನಡದವರಾದ ಇವರು ಬೆಂಗಳೂರಿನಲ್ಲಿ ಕೂಡ ಶಿಕ್ಷಣ ಪಡೆದಿದ್ದಾರೆ. "ಕನ್ನಡ ಕಾವ್ಯದ ಪರಿಪ್ರೇಕ್ಷ್ಯದಲ್ಲಿ ಕಾವ್ಯ ಮತ್ತು ತಾತ್ತ್ವಿಕತೆಗಳ ಸಂಬಂಧ" ಕುರಿತು ಡಾ.ಕೆ.ವಿ.ನಾರಾಯಣರ ಮಾರ್ಗದರ್ಶನದಲ್ಲಿ ಸಿದ್ಧಪಡಿಸಿದ ಮಹಾಪ್ರಬಂಧಕ್ಕೆ ಹಂಪಿಯ ಕನ್ನಡ ವಿಶ್ವವಿದ್ಯಾಲಯದಿಂದ ಡಾಕ್ಟರೇಟ್ ದೊರಕಿದೆ.ಟಪಾಲುಬಸ್ಸು ಕೃತಿಗೆ (ಲಲಿತಪ್ರಬಂಧ) ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಪುಸ್ತಕ ಪುರಸ್ಕಾರ ಲಭಿಸಿದೆ. (೨೦೧೨).

ಇತ್ತೀಚಿನ ಬರಹಗಳು: ಚಿಂತಾಮಣಿ ಕೊಡ್ಲೆಕೆರೆ (ಎಲ್ಲವನ್ನು ಓದಿ)

• ಕೆಟ್ಟಿದ್ದು ಕಾಲವಲ್ಲ ಮತ್ತು ಒಡಲ ನುಡಿಗಳು - ಮಾರ್ಚ್ 25, 2023
• ಕಲಿಕೆಯ ಮಾಧ್ಯಮವಾಗಿ ಕನ್ನಡ - ನವೆಂಬರ್ 27, 2022
• ಮನೆಯೊಳಗೆ ಮನೆಯೊಡೆಯರಿಲ್ಲ - ಅಕ್ಟೋಬರ್ 23, 2022

ನಾನು ಯಾರು

ದೇಹ ನಾನಲ್ಲವೆಂದನು ಹುಡುಗ
ಮನಸೂ ನಾನಲ್ಲ
ಉಸಿರು? ಹೆಸರು? – ಅಲ್ಲವೆ ಅಲ್ಲ
ಏನೂ ಉಳಿಯಲಿಲ್ಲ!

ಆಹಾ! ಹಾಗೆ ಹೇಳಿದ್ಯಾರು?
ಹಿಡಿಯಿರಿ ಅವನನ್ನೇ!
ಕೋಹಂ ಕೋಹಂ ಎನ್ನುತ ನಾವು
ಹುಡುಕಿದ್ದವನನ್ನೇ!

ಕಳ್ಳನು ಕಳ್ಳನ ಹುಡುಕಲು ನಡೆದಿದೆ
ಇಡೀ ಬದುಕಿನೋಟ
ನಿಂತು ನೋಡಿದರೆ ಅರಿವಾಗುವುದು
ಮುಗಿಯಬಹುದು ಆಟ!

ಮನೆಯೊಡೆಯ

ಮನೆಯೊಡೆಯ ಕೆಲವೊಮ್ಮೆ ತಾರಸಿಯ ಮೇಲೆ
ಇನ್ನು ಕೆಲವೊಮ್ಮೆ
ಒಳಚರಂಡಿಯ ವ್ಯವಸ್ಥೆ
ಪರಿಶೀಲಿಸುತ್ತ
ಕೆಳಗೆ

ಬಹುಭಾಗ ಅವನಿರುವ ಮನೆಯ ಒಳಗೆ
ದುಡಿದು ಕಟ್ಟಿಸಿಕೊಂಡ ಮನೆಯ ಒಳಗೆ

ಗಾಡಿ ತೊಳೆಯುವ ಹೊತ್ತು
ಮನೆಯ ಮುಂದೆ

ತರಕಾರಿ ತಂದನವ, ಸಂಜೆ ಕಂಡೆ

ಉಳಿದಂತೆ ಅವನಿರುವ ತನ್ನ ಪಾಡಿಗೆ ತಾನು!
ತನ್ನ ಮನೆಯಲಿ ತಾನು!
ಈ ಭೂಮಿಗಿವ ಬಂದು ಉಪಯೋಗವೇನು?

ಮನೆಯಲ್ಲೆ ಅವನಿರುವ ಸದ್ದಿಲ್ಲದೆ
ಹೊತ್ತು ಸಾಗದೆ

ಏನೂ ತೋಚದೆ
ಏನೂ ಮಾಡದೆ

ಕೇಳುವೆ ನಾನು:

ಹೇ ಮನೆಯೊಡೆಯ

ಏನೂ ಮಾಡದೆ-
ಏನೂ ನೀಡದೆ-

ಹೀಗೆಯೇ ಒಂದು ದಿನ ಹೊರಡಬಹುದೆ!
ಇಲ್ಲೇ ಉಳಿಯಲಹುದೆ?

ಮನೆಯೊಡೆಯ ಕೇಳಿದರೆ ಏನು ಹೇಳುವೆ?

ಚಿತ್ರಕೃಪೆ: ಪಬ್ಲಿಕ್ ಡೊಮೇನ್ ಚಿತ್ರಗಳು