ಹೊಳೆದ ಬೇರೊಂದು ಲೋಕ….

• ಲೇಖಕರು
• ಇತ್ತೀಚಿನ ಬರಹಗಳು

ಡಾ. ಕೆ.ಪಿ. ನಟರಾಜ

ಕನ್ನಡ ಉಪನ್ಯಾಸಕರಾಗಿರುವ ಡಾಕ್ಟರ್ ಕೆ ಪಿ ನಟರಾಜ್ ಅವರು ತಮ್ಮ ಆಳವಾದ ವಿಮರ್ಶೆಗಳಿಂದ, ಸ್ಪಷ್ಟ, ತೀಕ್ಷ್ಣ ಕವಿತೆ,ಬರಹ, ನಿಲುವುಗಳಿಂದಾಗಿ ತಮ್ಮದೇ ಛಾಪು ಮೂಡಿಸಿದವರು. ಕನ್ನಡ ವಿಶ್ವವಿದ್ಯಾಲಯ ಹಂಪಿಯಿಂದ 'ಕುವೆಂಪು ಚಿಂತನೆಯ ಅಧ್ಯಾತ್ಮ' ಕುರಿತ ಮಹಾಪ್ರಬಂಧಕ್ಕಾಗಿ ಡಿ.ಲಿಟ್‌. ಪದವಿ ಪಡೆದಿದ್ದಾರೆ. ಅವರ ’ಓ ಕಪ್ಪು ಹುಡುಗಾ’, ’ಮತ್ತೆ ನನ್ನ ಆಕಾಶ’, ’ಶಿವೆ ಶಿವೆ’ ಎಂಬ ಕವನ ಸಂಕಲನಗಳು ಪ್ರಕಟವಾಗಿವೆ.’ಪ್ರತಿಮಾ ಮೋಹ’ ಇವರ ವಿಮರ್ಶಾ ಸಂಕಲನ. ’ಮಧುರ ಚೆನ್ನ’ ಸಂಪಾದಿತ ಕೃತಿ.

ಇತ್ತೀಚಿನ ಬರಹಗಳು: ಡಾ. ಕೆ.ಪಿ. ನಟರಾಜ (ಎಲ್ಲವನ್ನು ಓದಿ)

• ಕವಿಯೊಬ್ಬ.. - ಅಕ್ಟೋಬರ್ 23, 2022
• ನನಗೆ ಬೇಕು ನನ್ನ ಪಾಡಿಗಿರುವ ಸ್ವಾತಂತ್ರ್ಯ .. - ಮೇ 28, 2022
• ಶೆಲ್ಲಿಯ ಒಂದು ಕವಿತೆಯ ಅನುವಾದ - ಸೆಪ್ಟೆಂಬರ್ 27, 2020

“ಬದುಕು – ಸಾವು ಎಂಬುದಿಲ್ಲ. ಅನುಭವದ ಪ್ರವಾಹದಲ್ಲಿ ಪ್ರಪಂಚ ಪೂರ್ಣವಾದ ವಸ್ತು. ಆದರೆ ಮನುಜನ ಮನಸ್ಸು ಪ್ರಪಂಚದ ಈ ಚಮತ್ಕಾರವನ್ನು ಸಾವು – ಬದುಕು ಎಂದು ವಿಭಾಗಿಸುತ್ತದೆ “
*ಮಸನೊಬು ಫುಕುವೊಕಾ

ಸಿಟ್ಟಲ್ಲಿ ಸೆಡವಲ್ಲಿ,
ಸುಡುವ
ಹೊಟ್ಟೆ ಕಿಚ್ಚುಗಳಲ್ಲಿ
ಇಷ್ಟಾನಿಷ್ಟಗಳಲ್ಲಿ
ಉರಿವ ಕೋಪ
ತಾಪ ಗಳಲ್ಲಿ
ಮುಖ ಭಂಜನೆಯಲ್ಲಿ
ಬದುಕು
ಸಿಕ್ಕುಸಿಕ್ಕಾಗಿರುವಾಗ
ಯಾಕೋ
ಕತ್ತೆತ್ತಿ ನೋಡಲಾಹಾ
ಚಂದ್ರಲೋಕ!!

ಮುಂದೊಮ್ಮೆ
ಅದು ನಮ್ಮ
ತಂಗುದಾಣವಲ್ಲವೆ
ಎಂಬ ತಿಳಿವೊಂದು
ಹೊಳೆ ಹೊಳೆದು
ನೆಮ್ಮದಿಯ ನಿಲುವೊಂದು
ನೆಲೆಗೆ ಬಂದು..

ಎಂಥ ಚಂದದ ಚಂದ್ರ
ಜಗದ ತಿಂಗಳ ಲಾಂದ್ರ
ಸುತ್ತಲೂ ಆವರಿಸಿ
ಜಗದ್ವಿಸ್ತರ!!

ನೆಲವೆ ನಮ್ಮ
ಸ್ಥಿರ ನೆಲೆಯಲ್ಲ
ಆಗಸವೂ ನಮ್ಮದೇ
ಇಲ್ಲಿಂದ ಮುಂದೆ
ಅಲ್ಲಿಗೋಟ!

ಹಗಲು ರಾತ್ರಿಗಳ
ಮಾಯೆ ಮುಚ್ಚುಗೆಯಲ್ಲಿ
ನಾವೆಲ್ಲ ವಿಶ್ವಮಾಂತ್ರಿಕನ
ಕೈಯ ಮಾಟ

ಎಂಥ ಮಿಂಚಿನ ತಿಳಿವು!
…
ಮುಖದ ಗಂಟುಗಳನ್ನ
ಬಿಡಿಸಿತಾಹಾ!

ಸುಡುವ
ಭೂಮಿಯ ಮೇಲೆ
ಬಿರುಮಳೆಗಳುದುರಿ
ದಟ್ಟ ವ್ರುಕ್ಶಾರಣ್ಯಗಳ
ಹಸಿರು ಗರಿಗೆದರಿ
ಬೆಟ್ಟಗಳ ನೆಲೆಯಿಂದ
ತುಂಬುನದಿಗಳು ಹರಿದು
ಧ್ರುವದಿಂದ ಧ್ರುವದತ್ತ
ಬಯಲ ಗಾಳಿಗಳು
ಮೊರೆದು ..

ಯಾಕೊ ಕತ್ತೆತ್ತಿ
ನೋಡಲಾಹಾ
ಚಂದ್ರಲೋಕ!

ಇಲ್ಲಿಗೂ ಅಲ್ಲಿಗೂ
ಸೇತುಗಟ್ಟಲಿ ಪಯಣ
ಮ್ರುತ್ಯುವಿನ ಮುರಿತಕ್ಕೆ
ದಕ್ಕದಿರಲೋ ಗೆಲುವು

ಇಲ್ಲಿಂದ ಅಲ್ಲಿಗೆ
ಅಲ್ಲಿಂದ ಇಲ್ಲಿಗೆ
ಸಾಗಿರಲಿ
ಹರಿಗಡಿಯದೀ
ಪಯಣವು!!