ವಿಂಗಡಿಸಿ ನೋಡು

• ಲೇಖಕರು
• ಇತ್ತೀಚಿನ ಬರಹಗಳು

ನೂತನ ದೋಶೆಟ್ಟಿ

ಮೂಲತಃ ಉತ್ತರಕನ್ನಡದ ಸಿದ್ಧಾಪುರದವರಾದ ನೂತನ ಎಂ. ದೋಶೆಟ್ಟಿ ಅವರು ಆಕಾಶವಾಣಿಯಲ್ಲಿ ಕಾರ್ಯಕ್ರಮ ನಿರ್ವಾಹಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಇವರ ಏಳಕ್ಕೂ ಹೆಚ್ಚು ಕೃತಿ,ಕಾವ್ಯಗಳ ಸಂಕಲನಗಳು ಲೋಕಾರ್ಪಣೆಗೊಂಡಿದ್ದು, ಇವರ ಅನೇಕ ಬರಹಗಳು ನಾಡಿನ ಹಾಗೂ ಆಂಗ್ಲದ ಹೆಸರಾಂತ ಪತ್ರಿಕೆಗಳಲ್ಲಿ ಪ್ರಕಟಗೊಂಡಿವೆ.

ಇತ್ತೀಚಿನ ಬರಹಗಳು: ನೂತನ ದೋಶೆಟ್ಟಿ (ಎಲ್ಲವನ್ನು ಓದಿ)

• ವಿಂಗಡಿಸಿ ನೋಡು - ಅಕ್ಟೋಬರ್ 23, 2022
• ಆ ರಾತ್ರಿ - ಸೆಪ್ಟೆಂಬರ್ 15, 2021
• ಪ್ರಮಾಣ​ - ಸೆಪ್ಟೆಂಬರ್ 5, 2021

ಹೀಗೆ ಹೇಳುವವರು ಕಸ ಗುಡಿಸುವ ವರು
ಕೇಳಿರಬಹುದು ನೀವೂ.
ಹಸಿ ಬೇರೆ, ಒಣ ಬೇರೆ
ಮಾಡಿದರೆ
ನೆಲಕ್ಕೆ ಹಸಿರು
ಗಾಳಿಗೆ ಉಸಿರು
ಆರ್ಭಟವೇನಿದ್ದರೂ ಗಾಡಿ ತುಂಬುವವರೆಗೆ
ಊರ ಹೊರಗೆ ಚೆಲ್ಲುವವರೆಗೆ
****
ವಿಂಗಡಿಸದಿರಿ ಒಂದಾಗಿರಿ
ಹೇಳುವವರು ಉಳಿದ ಎಲ್ಲರೂ
ಅರಚಿ ಗಂಟಲು ಆರುವವರೆಗೆ
ಒಡೆದು ಹೋಳಾಗುವವರೆಗೆ
ವಿಂಗಡಿಸುವುದು ಮರ್ಮ
ಒಡೆಯುವುದು ಧರ್ಮ
ಕೆಡಹುವುದೇ ಕರ್ಮ

ಇದೀಗ ಧರ್ಮ-ಕರ್ಮಗಳಿಗೆ ಪಂದ್ಯವಂತೆ
ವಿಂಗಡಿಸಿ ಆಡಿಸುತ್ತ
ಮುರಿದು ಮುಕ್ಕಾಗಿಸುತ್ತ
ಕೆರಳಿಸಿ ಕನಲಿಸುತ್ತ
ಬೆಂದ ಬೇಳೆಯ ಹಿಚುಕಿ ನೋಡುತ್ತ
ತುಂಬುವ ಥೈಲಿಯ ಮೇಲೆ ಕೈಯಾಡಿಸುತ್ತ
ಗೆಲುವಲ್ಲದ ಸೋಲೊಲ್ಲದ
ವಿಕ್ಷಿಪ್ತ ಓಲಾಟವಂತೆ
*
ಕೆಡುಕನ್ನು ವಿಂಗಡಿಸಿ
ಒಳಿತನ್ನು ಕೂಡಿಸುವುದು
ಜಾಯಮಾನ

ತಿಳಿದಿರಲಿ ಕಸವೀಗ ಕೆಡುಕಲ್ಲ
ಆದರೂ ವಿಂಗಡಿಸಬೇಕು ಒಳಿತಿಗೆ
ಧರ್ಮ-ಕರ್ಮಗಳೆಂದೂ ಒಳಿತ ಸೋಗ ಮೀರಿಲ್ಲ
ಆದರೂ ಕೂಡಿಸಬೇಕು ಒಳಿತಿಗೆ

ವಿಂಗಡಿಸುವುದೂ ಧರ್ಮ
ಕೂಡಿಸುವುದೂ ಧರ್ಮ
ಬೇಕಾದವರಿಗೆ, ಬೇಕಾದಷ್ಟು, ಬೇಕಾದಂತೆ.