ಸರ್ವಧರ್ಮ ಸಮನ್ವಯ

• ಲೇಖಕರು
• ಇತ್ತೀಚಿನ ಬರಹಗಳು

ನಿರಂಜನ ಕೆ ನಾಯಕ

ಇವರು ಮೂಲತಃ ಉತ್ತರ ಕನ್ನಡ ಜಿಲ್ಲೆಯವರು. ಪ್ರಸ್ತುತ ಸರಕಾರಿ ಪ್ರೌಢಶಾಲೆ ವಿಟ್ಲದಲ್ಲಿ ಆಂಗ್ಲ ಭಾಷಾ ಶಿಕ್ಷಕರಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಸಾಹಿತ್ಯವನ್ನು ಕಲಿತು, ಬೋಧಿಸುತ್ತಿರುವುದರಿಂದ ಸಾಹಿತ್ಯದಲ್ಲಿ ಸಹಜವಾಗಿ ಆಸಕ್ತಿಯಿದೆ . ರಾಜ್ಯಮಟ್ಟದ ಕವನ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಬಹುಮಾನ ಪಡೆದಿದ್ದಾರೆ.

ಇತ್ತೀಚಿನ ಬರಹಗಳು: ನಿರಂಜನ ಕೆ ನಾಯಕ (ಎಲ್ಲವನ್ನು ಓದಿ)

• ಪೊರೆವ ತಂದೆ - ಜುಲೈ 8, 2024
• ತರಗತಿ ಕೋಣೆ - ಡಿಸಂಬರ್ 31, 2023
• ಸರ್ವಧರ್ಮ ಸಮನ್ವಯ - ನವೆಂಬರ್ 4, 2023

ದಯೆಯ ಬೋಧಿಸದ ಧರ್ಮವಿರದು ಜಗದಿ
ಮೂಲ ಮಂತ್ರ ಒಂದೇ ಸೌಹಾರ್ದತೆ ನಿಜದಿ
ತಂತ್ರ ಮಂತ್ರಗಳ ನೆಪದಿ ಕಟ್ಟಿಹರು ಗಡಿಯ
ಕಲ್ಮಶಗಳ ಕಿತ್ತೊಗೆದು ಬೆಳಗಿ ಎದೆಯ ಗುಡಿಯ

ಜಗವ ಕುಟುಂಬವೆಂದ ಧೀಮಂತ ಮಣ್ಣಿದು
ಅಂಗುಲಿಮಾಲನ ಅಪ್ಪಿದ ಬುದ್ಧನ ನೆಲೆಯಿದು
ಆತ್ಮದಿ ಭೇದವ ಕಾಣದ ಜಿನನ ಬೀಡಿದು
ಎಲ್ಲರೂ ದೇವರ ಮಕ್ಕಳೆಂದ ನಾನಕರ ನಾಡಿದು

ಹೊಲಗೇರಿ ಶಿವಾಲಯಕೆ ನೆಲವೊಂದೆಂದ ವಚನ
ಕುಲವೆಂದು ಬಡಿದಾಡದಿರೆಂಬ ದಾಸ ಕೀರ್ತನ
ಸರ್ವಧರ್ಮವ ಸತ್ಯ ಸಮವೆಂದ ವಿವೇಕವಾಣಿ
ಬೆಳಗು ಅರಿವ ಜ್ಯೋತಿ ಆತ್ಮೋನ್ನತಿಯ ಏಣಿ

ಈ ಮಣ್ಣಲಿ ಬೆರೆತಿದೆ ಇಸ್ಲಾಂನ ಶ್ರೇಷ್ಠ ತತ್ವ
ಸೋದರತೆ ಹೆಚ್ಚಿಸಿದೆ ಈ ನೆಲದ ಸತ್ವ
ಪ್ರೀತಿಯ ಸಾರುವ ಶಿಲುಬೆಯ ಸಂದೇಶ
ನೀರೆರೆದಿದೆ ಮನುಜತ್ವಕೆ ಬಯಸಿ ಸರ್ವರ ಹಿತ

ಸುವಿಚಾರಗಳೆಲ್ಲ ನದಿಗಳು ಬೆರೆತ ಶರಧಿಯಂತೆ
ಆಳ ಅಗಲಗಳ ಅರಿತವ ನಿಜದಿ ಜ್ಞಾನಿಯಂತೆ
ಎಲ್ಲವೂ ಒಂದೇ ಬಳ್ಳಿಯ ಹಲವು ಸುಮಗಳಂತೆ
ಸೇರುವ ನೆಲೆಯೊಂದೇ ದೇವನ ಪಾದದಡಿಯಂತೆ

ಅರಿತು ಬಾಳಿದರೆ ಸಕಲ ಧರ್ಮಗಳ ಸಾರ
ದ್ವೇಷ ಅಳಿದು ಬದುಕು ಬಲು ಸಸಾರ
ರಾಮ-ರಹೀಮ, ಕನಕ-ಕಬೀರರೆಲ್ಲ ನಮ್ಮವರೆ
ಸತ್ಯದರ್ಶನವ ಸಂಧಿಸಿ ತಾರೆಗಳಾಗಿ ಮೆರೆದವರೆ