ಅನಿರೀಕ್ಷಿತ

• ಲೇಖಕರು
• ಇತ್ತೀಚಿನ ಬರಹಗಳು

ರಶ್ಮಿ ಶಮಂತ್

ರಶ್ಮಿ ಶಮಂತ್ ಮೂಲತಃ ಶಿವಮೊಗ್ಗದ ಹೊಸನಗರದವರು.. ಹವ್ಯಾಸಗಳು ಓದುವುದು, ಕವನ ಲೇಖನ ಬರೆಯುವುದು ಹಾಗೂ ರಂಗೋಲಿ ಹಾಕುವುದು. ಕವನ ಸಂಕಲನ ಹೊರ ತರುವ ಪ್ರಯತ್ನದಲ್ಲಿದ್ದಾರೆ.

ಇತ್ತೀಚಿನ ಬರಹಗಳು: ರಶ್ಮಿ ಶಮಂತ್ (ಎಲ್ಲವನ್ನು ಓದಿ)

• ಅನಿರೀಕ್ಷಿತ - ಮಾರ್ಚ್ 22, 2026

ನಿರ್ಗಮಿಸುವರು
ಅವಕಾಶವಿಲ್ಲ ವಿದಾಯಕ್ಕೆ
ಕಂಬನಿಗೂ ತಾವಿಲ್ಲದಂತೆ
ಪರಮಾಶ್ಚರ್ಯವದು
ವಾಸ್ತವವನ್ನೂ ಪರೀಕ್ಷಿಸುವಂತೆ

ಬೇಧವಿಲ್ಲವವನಿಗೆ
ಮಕ್ಕಳು ಮರಿಗಳೆಂಬ
ಕರುಣೆಯೂ ಇಲ್ಲದೆ
ಸೆಳೆಯುತಿಹನು ಕಾಲರಾಯ
ಅದೇನು ಅವಸರ ಅವಗೆ
ಬದುಕಿ ಬಾಳುವವರ ಸೆಳೆಯಲು

ಉಳಿದಿರಲು ಮಾತುಗಳು ನೂರಾರು
ಕನಸು ಕಾದಿರಲು ಸಾವಿರಾರು
ಜವಾಬ್ಧಾರಿಯ ಹೊರೆಯಿರಲು
ನಂಬಿರುವ ಜೀವಗಳಿರಲು
ಮುಖ್ಯವಿದೆಯೇ ಹೊರತು‌ ಇದೆಲ್ಲವ

ಆತ್ಮೀಯರ ಆಲಂಗಿಸದೆ
ಅಂತಿಮ ನಮನವ ಸಲ್ಲಿಸದೆ
ಕಂಬನಿಯ ಉರುಳಿಸದೆ
ಕೊನೆಯ ಸಂದೇಶ ಕೊಡಲಾಗದೆ
ಹೋದವರದೆಷ್ಟೋ

ಜೊತೆಗಿರಲು ಸಂಭಾಷಿಸಿ
ಕೊನೆಯ ಭೇಟಿಯೆಂಬಂತೆ
ಬದುಕು ಮನಬಂದಂತೆ
ತೀರಿಸು ಆಸೆ ಕನಸುಗಳ
ತಿಳಿದಿದೆಯೇ
ನಾವೆಷ್ಟನೆಯವರೋ ಈ ನಿಗೂಢ ಸರತಿಯಲಿ