ವಿಷಯವಾಗುತ್ತೇನೆ ನಾನು

• ಲೇಖಕರು
• ಇತ್ತೀಚಿನ ಬರಹಗಳು

ಕಲ್ಲನಗೌಡ ಪಾಟೀಲ

ಧಾರವಾಡದ ನಿವಾಸಿಯಾದ ಇವರಿಗೆ ಕವಿತೆ ಬರೆಯುವುದು ಒಂದು ಮೆಚ್ಚಿನ ಸಂಗತಿ. ಸಾರ್ವಜನಿಕ ಆರೋಗ್ಯ ಕ್ಷೇತ್ರದಲ್ಲಿ ಆಸಕ್ತರಾಗಿದ್ದು ಅದರ ಕುರಿತಾಗಿ ಹೊಸ ಹೊಸ ವಿಷಯಗಳನ್ನು ತಿಳಿದುಕೊಳ್ಳುವುದು ಇವರ ಇಷ್ಟದ ಸಂಗತಿಗಳಲ್ಲಿ ಒಂದು. ರೇಡಿಯೋ ಕೇಳುವುದು, ತನಗೆ ಗೊತ್ತಿರುವ ವಿಷಯಗಳ ಬಗ್ಗೆ ಮಕ್ಕಳಿಗೆ ಕಲಿಸುವುದು ಇವರ ಇತರ ಹವ್ಯಾಸಗಳು.

ಇತ್ತೀಚಿನ ಬರಹಗಳು: ಕಲ್ಲನಗೌಡ ಪಾಟೀಲ (ಎಲ್ಲವನ್ನು ಓದಿ)

• ವಿಷಯವಾಗುತ್ತೇನೆ ನಾನು - ಡಿಸಂಬರ್ 27, 2020

ವಿಷಯವಾಗುತ್ತೇನೆ ನಾನು
ಬಸಿಯುವ ಬೆವರಿನಲ್ಲಿ
ಹೊಸೆದ ಹಗ್ಗದ ತಾಯಿ
ಸೆಣಬಿನ ಬೀಜವಾಗಿ!

ಮೊಳಕೆಯಾಗುತ್ತಿರಲಿಲ್ಲ……
ಹುಗಿಯದಿದ್ದರೆ ನನ್ನ  
ಮತ್ತೆ
ಬೀಳದಿದ್ದರೆ ಮೇಲೆ 
ಮಳೆಯ ಸುರಗಿ!

ವಿಷಯವಾಗುತ್ತೇನೆ ನಾನು
ಹೂವಿನ ರಸವ
ದುಂಬಿ ಕುಡಿದಾಗ
ಹಸಿರುಂಡ ಪಶುಪಕ್ಷಿ
ಹಾಡಿ ಕುಣಿದಾಗ
ಕರು ಕೂಗಿಗೆ ಹಸು ಕೆಚ್ಚಲು 
ಹಾಲುಣಿಸಿದಾಗ
ಪ್ರಾಸ ತ್ರಾಸಲಿ ಪದಗಳ 
ಜೊತೆ ಹಾಡಿದಾಗ!!

ವಿಷಯವಾಗುತ್ತೇನೆ ನಾನು
ಕಳೆಬರದ ನಾರು 
ಮಡಿ ಮೈಲಿಗೆಯಾದಾಗ
ಗಜಗೂಳಿಯ ಮೂಗಿಗೆ 
ದಾರವಾದಾಗ
ಹರಿದ ಹಚ್ಚಡ ಹೊಲಿಗೆ 
ಮಾನ 
ಮುಚ್ಚದಿರುವಾಗ!
ಸುಟ್ಟುಕೊಂಡರೂ ಬತ್ತಿ 
ಬೆಳಕು ನೀಡುವಾಗ​

ವಿಷಯವಾಗುತ್ತೇನೆ ನಾನು 
ಉರುವಲಾದಾಗ
ಹಸಿವಿನರಮನೆಯಲ್ಲಿ ನಗುವ 
ಗಾಳಿ ಸುಳಿದಾಗ
ಇರುವ ಗೊಡವೆಯ ಮರೆತು
ಇಲ್ಲವಾದಾಗ
ಕೊಳ್ಳಿದೆವ್ವದ ಹಾಗೆ 
ಉರಿದು ಹೋದಾಗ….

ವಿಷಯವಾಗುತ್ತೇನೆ ನಾನು
ಕಾವ್ಯಕ್ಕೆ ಕಥನಕ್ಕೆ 
ಥಕಥೈಯ ಕುಣಿತಕ್ಕೆ
ಉಪಕಥೆಗಳ ಪತಿ ನಾನು
ಪುರಾಣಗಳ ಸತಿ
ಭೂತದಾ ಸಾಕ್ಷಿ 
ಭವಿಷ್ಯತ್ತಿನ​ ಅಕ್ಷಿ
ವರ್ತಮಾನದ ಗಡಿಬಿಡಿ
ಮುಕ್ತಿ ಮಹಲಿನ ಕೈಪಿಡಿ!!!

ವಿಷಯವಾಗುತ್ತಿದ್ದೇನೆ ನಾನು…….