- ಸಮಯ,ಗಡಿಯಾರ ನಿಲ್ಸಿ ಮತ್ತು ಇತರ ಕವಿತೆಗಳು - ಆಗಸ್ಟ್ 21, 2022
- MCMXIV ಸಹಿತ ಚಂಪೋ ಅನುವಾದಿಸಿದ ೪ ಕವಿತೆಗಳು - ಮಾರ್ಚ್ 6, 2022
- ಖಲೀಲ್ ಝೀಬ್ರಾನ್ ಕವಿತೆ! - ಫೆಬ್ರುವರಿ 5, 2022
ನನ್ನೊಳಗೂ ಒಬ್ಬನಿದ್ದಾನೆ
ಸುಮ್ಮನೆ ಎಲ್ಲೋ ಮೂಲೆಯಲ್ಲಿ ಕುಳಿತು
ಮುಗುಳ್ನಗುತ್ತ ನೋಡುವುದೇ ಅವನ ಕೆಲಸ
ನಾ ನಕ್ಕರೂ ಅತ್ತರೂ ಬಿದ್ದರೂ ಎದ್ದರೂ
ಅವನ ಮುಗುಳ್ನಗು ಮಾತ್ರ ಮಾಸದು…
ಮೇಲಿಂದ ಮೇಲೆ ಬೀಳುವ ಪೆಟ್ಟುಗಳಿಗೆ
ಅವನದೇ ಶೈಲಿಯಲ್ಲಿ ವಿಮರ್ಶಿಸಿ ಹೊರದಬ್ಬಿ
ಮತ್ತದೇ ಮುಗುಳ್ನಗೆಯ ಮುಖ! ಅಬ್ಬಾ..!
ಯಾರಿವನು? ಭಾವಗಳ ಹಂಗಿಲ್ಲದವ!
ಯಾವ ವಿಷಯವೇ ಇರಲಿ, ಇವನ ಪ್ರತಿಕ್ರಿಯೆ
ಮುಗುಳ್ನಗೆ ಮಾತ್ರ, ನಿರ್ಲಿಪ್ತತೆ ನಾಚುವಂತೆ
ಒಂದೊಮ್ಮೆ ರಾಗ ಹಿಡಿದರೆ ಸಾಕವನಿಗೆ
ಕಣ್ಣು ಮುಚ್ಚಿ ಎಲ್ಲೆಲ್ಲೊ ತೇಲಾಡಿಬರುವ!
ನಾದವೆಂದರೆ ಅವನಿಗೇನೊ ಒಲವು!
‘ನಾ’ ಎಂದಾಗಲೆಲ್ಲ ನಕ್ಕುಬಿಡುವ, ಅದೇಕೋ?
ಹೊರಗಿನ ಯಾವ ಮಾಸವೂ ಮಣಿಸದವನಿಗೆ
ಬಿಸಿಲು ಮಳೆ ಹಸಿರ ಕಂಡು ಕುಣಿದುಬಿಡುವ!
ಯಾವಾಗಲೋ ಅವನು ಬಾಯಿ ಬಿಚ್ಚಿದಾಗ
ಪ್ರಶ್ನೆಗಳ ಸುರಿಮಳೆ, ಎಲ್ಲಕ್ಕೂ ಸೋಜಿಗ!
ತಾನೇ ಮತ್ತೆ ಉತ್ತರಿಸುವ ಬಲ್ಲವನಂತೆ
ಉತ್ತರಕ್ಕೆ ಕಾಯದೇ ಏನೇನೊ ಬಡಬಡಿಸುವ!
ಅವನಿಗೂ ನನಗೂ ಏನೋ ನಂಟು
ಹೌದು, ನನ್ನ ಚನ್ನಾಗಿ ಅರ್ಥೈಸಿಕೊಂಡಿರುವ
ಆದರೂ ಅದೇಕೋ ಚಡಪಡಿಕೆ ಅವನಿಗೆ
ಒಮ್ಮೊಮ್ಮೆ ಉಸಿರುಗಟ್ಟಿದಂತಾಡುವ!
ಮೊನ್ನೆ ನಡೆದ ವಾದದಲ್ಲಿ ಸೋತುಬಿಟ್ಟ
ಇಂದೇಕೋ ಶಾಂತವಾಗಿದ್ದಾನೆ,
ಬಿರುಗಾಳಿಗೆ ನಾ ತಯಾರಿರಬೇಕಿನ್ನು
ಅದನ್ನೂ ಅವ ನಗುತ್ತಲೇ ಎಬ್ಬಿಸುವ!
- ಚಂಪೋ
ಚಿತ್ರ ಕೃಪೆ : ಪಬ್ಲಿಕ್ ಡೊಮೇನ್ ಸೆನೆಸಿಯೋ ೧೯೨೨ ವರ್ಣ ಚಿತ್ರ digitally enhanced
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ