ರೆಕ್ಕೆ ಇದ್ದರೆ ಚೆನ್ನಾಗಿತ್ತು

• ಲೇಖಕರು
• ಇತ್ತೀಚಿನ ಬರಹಗಳು

ಡಾ.ತನುಶ್ರೀ ಹೆಗಡೆ

ಶಿರಸಿಯಲ್ಲಿ ನೇತ್ರತಜ್ಞೆಯಾಗಿ ಕೆಲಸ ಮಾಡುತ್ತಿರುವ ಡಾ.ತನುಶ್ರೀ ಹೆಗಡೆ ತೀವ್ರವಾದ ಕಾವ್ಯ ವ್ಯಾಮೋಹಿ.
ಸಾಹಿತ್ಯ, ಕಲೆ, ರಂಗಭೂಮಿ, ಅಧ್ಯಾತ್ಮದಲ್ಲಿ ಒಲವು.
ಇತ್ತೀಚೆಗೆ ಶಿರಸಿಯ ರಂಗಾಸಕ್ತರು ಪ್ರಯೋಗಿಸಿದ, ಮಾಸ್ತಿಯವರ ಯಶೋಧರಾ ನಾಟಕದಲ್ಲಿ ಅಭಿನಯಿಸಿ, ಮೆಚ್ಚುಗೆ ಗಳಿಸಿದ್ದಾರೆ.
ಕಾವ್ಯ ಲೋಕದಲ್ಲಿ ಕೃಷಿ ಆರಂಭಿಸಿದ್ದಾರೆ.

ಇತ್ತೀಚಿನ ಬರಹಗಳು: ಡಾ.ತನುಶ್ರೀ ಹೆಗಡೆ (ಎಲ್ಲವನ್ನು ಓದಿ)

• ರೆಕ್ಕೆ ಇದ್ದರೆ ಚೆನ್ನಾಗಿತ್ತು - ಮಾರ್ಚ್ 8, 2024
• ವಾಸ್ತವ - ನವೆಂಬರ್ 1, 2022
• ಗಜ಼ಲ್ - ಸೆಪ್ಟೆಂಬರ್ 11, 2022

ಮೊಣಕಾಲುದ್ದದ ಅಂಗಿಯಲ್ಲಿ
ಅತ್ತಿಂದಿತ್ತ ಪುಟಿದೋಡುತ್ತಿದ್ದ ಪಾದಗಳಿಗೆ
ಮುಂಗಾಲುದ್ದದ ಲಂಗ ಅಡಿಗಡಿಗೂ ಸಿಕ್ಕಿ
ನಡಿಗೆಯನ್ನು ತುಂಡರಿಸಿದಾಗ
ಅನಿಸಿತ್ತು
ಏಳು ಸಾಗರ ಪರ್ವತದಾಚೆಯ ನಾಡಿಗೆ
ಗಮಿಸಿಬಿಡಬೇಕು ವೇಗದಲ್ಲಿ
ರೆಕ್ಕೆ ಇದ್ದರೆ ಚೆನ್ನಾಗಿತ್ತು

ಮನೆಯೆಲ್ಲ ತುಂಬಿ ಅಂಗಳದಲೆಲ್ಲ ಅನುರಣಿಸುತ್ತಿದ್ದ
ಕಾಲ್ಗೆಜ್ಜೆಯ ಕಿಂಕಿಣಿ
ಕಾಲುಂಗುರದ ನಿಗ್ರಹಕ್ಕೆ
ಉಲಿಗುಂದಿ ನಿಶ್ಶಬ್ಧವಾದಾಗ
ಅನಿಸಿತ್ತು
ದಾಟಿ ಬಯಲು ಭೂಮಿ ಬಾನ
ನಾದ ಮೊಳಗಿಸಬೇಕು ಗಟ್ಟಿಯಾಗಿ
ರೆಕ್ಕೆ ಇದ್ದರೆ ಚೆನ್ನಾಗಿತ್ತು

ಚಂಚಲ ಚಿಟ್ಟೆಯಂತೆ ಗಾಳಿಯಲ್ಲಿ ಪಟಪಟಿಸುತ್ತಿದ್ದ
ರಂಗುರಂಗಿನ ದುಪ್ಪಟ್ಟಾ
ಮಾನ ಹೊರುವ ಸೆರಗಾಗಿ
ಗಂಭೀರದಲಿ ಜೋತಾಡಿದಾಗ
ಅನಿಸಿತ್ತು
ತೇಲಿ ಬಿಡಬೇಕು ಸ್ವಚ್ಛಂದದಲಿ
ಹಗುರಾಗಿ ನವಿರಾಗಿ ಜೀವ ಜೀಕಲು
ರೆಕ್ಕೆ ಇದ್ದರೆ ಚೆನ್ನಾಗಿತ್ತು

ನಾಲ್ಕು ಗೋಡೆಯ ಜಗತ್ತಿಗೆ
ಕಿಟಕಿಗಳ ಒಡೆದ ಕಲಿಕೆಯ ಸುತ್ತಿಗೆ
ಪ್ರಪಂಚಕ್ಕೆ ಕದತೆರೆಯುವ ಮುನ್ನ
ಕಟ್ಟಳೆಗಳ ಇಕ್ಕಳಕ್ಕೆ ಸಿಕ್ಕಿ ಹೆಬ್ಬಾಗಿಲೇ ಕುಸಿದಾಗ
ಅನಿಸಿತ್ತು
ಮುಕ್ತವಾದ ಕನಸ ಲೋಕಕೆ
ನಿರಾತಂಕವಾಗಿ ಹಾರಿ ಹೋಗಲು
ರೆಕ್ಕೆ ಇದ್ದರೆ ಚೆನ್ನಾಗಿತ್ತು

ದಾರಿದೀಪಗಳು ಉದ್ದಕ್ಕೂ ಉರಿಯುತ್ತಿದ್ದರೂ
ಹೊಸ್ತಿಲ ದಾಟಲು ಬೆಳಕು ಸಾಲದಾದಾಗ
ಅನಿಸಿತ್ತು
ಹೆಣ್ಣು ಸಂಘರ್ಷವೇ ಹೀಗೆ
ಬಂಧನ ಬೇಕಿಲ್ಲ
ಬಿಡುಗಡೆಯೂ ಸುಖವಿಲ್ಲ
ಆದರೂ..
ಆ ಅಗಾಧದಲಿ ಲೀನವಾಗಲು
ರೆಕ್ಕೆ ಇದ್ದರೆ ಚೆನ್ನಾಗಿತ್ತು