ಷೋರೂಂ ಬೈಕಿನ ಸ್ವಗತಗಳು

• ಲೇಖಕರು
• ಇತ್ತೀಚಿನ ಬರಹಗಳು

ಅನಂತ ಕುಣಿಗಲ್

ಮೂಲತಃ ತುಮಕೂರು ಜಿಲ್ಲೆಯ ಕುಣಿಗಲ್ ತಾಲ್ಲೂಕಿನ ಕೆಂಚನಹಳ್ಳಿ ಗ್ರಾಮದವರಾದ ಅನಂತ ಅವರು ಬಿ.ಎಸ್ಸಿ ಪದವೀಧರರು, ಡ್ರಾಮಾ ಡಿಪ್ಲೋಮಾ ಪದವೀಧರರೂ ಹಾಗೂ ರಂಗಕರ್ಮಿಗಳೂ ಹೌದು.ಹಲವಾರು ಕಿರುನಾಟಕ ಮತ್ತು ಕಿರು ಚಿತ್ರಗಳಿಗೆ ಕಥೆ-ಚಿತ್ರಕಥೆ ಹಾಗೂ ನಿರ್ದೇಶನ ಮಾಡಿದ್ದು, ಸಧ್ಯ ಬರಹಗಾರ ಹಾಗೂ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡುತ್ತಿದ್ದಾರೆ.ಕೃತಿಗಳು: ಋಣಭಾರ (ಕಥಾ ಸಂಕಲನ), ಮೂರನೆಯವಳು (ಕವನ ಸಂಕಲನ)

ಇತ್ತೀಚಿನ ಬರಹಗಳು: ಅನಂತ ಕುಣಿಗಲ್ (ಎಲ್ಲವನ್ನು ಓದಿ)

• ಷೋರೂಂ ಬೈಕಿನ ಸ್ವಗತಗಳು - ಜುಲೈ 10, 2023
• ಕಾವ್ಯವೆಂದರೆ ಅದೇನದು? - ಫೆಬ್ರುವರಿ 5, 2022
• ಗರುಡ ಗಮನ ; ವೃಷಭ ವಾಹನ - ನವೆಂಬರ್ 28, 2021

ಉಸಿರುಗಟ್ಟಿ
ಧೂಳು ಹಿಡಿದು ನಿಂತಿದ್ದೆ
ದಾರಿಯಲ್ಲಿ ಅತ್ತಿಂದಿತ್ತ ಚಲಿಸುವ
ಮನುಷ್ಯರಂತೆ ಕಾಣುವ
ರೋಬೋಟುಗಳನ್ನು ನೋಡುತ್ತ
ಅಸಹನೆಯನ್ನು ಅದುಮಿಟ್ಟುಕೊಂಡಿದ್ದೆ

ವರ್ಷಕ್ಕೊಮ್ಮೆ ಪೂಜೆ
ಆಗ ಸಿಂಗಾರ ಶೃಂಗಾರ ಎಲ್ಲವೂ
ಮುಡಿಸಿದ ಹೂವು ಕೂಡ
ಒಂದು ದಿನಕ್ಕೆ ಮಾತ್ರವೇ

ಗೆಳೆಯರೆಲ್ಲ ಒಬ್ಬೊಬ್ಬರೇ ಖಾಲಿ
ನಾನು ನನ್ನೊಳಗೆ ಖಾಲಿ
ಓಲ್ಡ್ ಮಾಡೆಲ್ ಆಗಿ ನಿಂತಿದ್ದೆ
ಬಹುಶಃ ನಾನೇ ಕೊನೆಯ ಪೀಸು
ನನ್ನ ನೋಡುವವರಾರಿಲ್ಲ ಈ ಜಗದಲ್ಲಿ

ಗಂಟೆಗೆ ಎಂಬತ್ತರ ವೇಗ ದಾಟುವುದಿಲ್ಲ
ಹಳ್ಳ ದಿಣ್ಣೆಗಳಿಗೆ ಜಗ್ಗುವುದಿಲ್ಲ
ಬಿದ್ದರೂ ಹೆಚ್ಚು ಘಾಸಿಯಾಗುವುದಿಲ್ಲ
ಇಲ್ಲಿ ನಾನು ಒರಿಜಿನಲ್ ಎಂದು
ಒತ್ತಿ ಹೇಳಬೇಕಿಲ್ಲ

ಒಬ್ಬ ಬಂದ
ಮುಟ್ಟಿ ನೋಡಿದ
ಸ್ಟಾರ್ಟ್ ಮಾಡಿದ
ನಾನು ಒಂದೇ ಬಾರಿಗೆ ಸ್ಪಂದಿಸಲಿಲ್ಲ
ಬೇಸರ ಮಾಡಿಕೊಂಡು ಹೋದ

ನನ್ನ ಬಳಿ ಸೆಲ್ಫ್ ಇಲ್ಲ
ಕಿಕ್ಕರ್ ಹೊಡೆಯಲು ಶಕ್ತರಿಲ್ಲ
ತುಂಬಾ ಸ್ಮಾರ್ಟ್ ಆಗಿದ್ದಾರೆ ಜನ
ನಾನು ಓಲ್ಡ್ ಆದರೂ
ಇವರನ್ನು ಅರ್ಥಮಾಡಿಕೊಳ್ಳಬಲ್ಲೆ

ಇನ್ನೊಬ್ಬ ಬಂದ
ದೂರದಿಂದಲೆ ಮೊಬೈಲ್ ಹಿಡಿದು
ದಾಳಿ ಮಾಡುವವನಂತೆ ಸುತ್ತುವರೆದ
ನನ್ನನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿದ
ಅವನಂದುಕೊಂಡಹಾಗೆ ನಾನಿರಲಿಲ್ಲವೇನೋ..
ಬಂದವನು ಹಾಗೇ ಹೋದ

ದಿನಗಳು ಕಳೆದವು
ಮತ್ತೆ ಮೂವರು ಬಂದರು
ನನ್ನ ನೋಡಿ ಖುಷಿಪಟ್ಟರು
ಬೆನ್ನಿಗೆ ಟಪ್ ಟಪ್ ಎಂದು ಬಡಿದರು
ಮುಖವನ್ನು ಸವರಿದರು
ನಾನೇ ಬೇಕು ಎಂದು ಹಠ ಹಿಡಿದರು

ನಾನು ನಿಂತಿದ್ದ ಪಕ್ಕದ ಗೋಡೆ ಕಡೆ
ಅವರ ಗಮನ ಹೋಗಲಿಲ್ಲ
ಅಲ್ಲೊಂದು ಸೂಚನಾ ಫಲಕವಿತ್ತು
ಹೆಚ್ಚು ಹೊಗೆ ಬಿಡುವ ನನ್ನನ್ನು
ಬ್ಯಾನ್ ಮಾಡಲಾಗಿದೆ ಎಂದು ಬರೆದಿತ್ತು!

*****

ಬೆನ್ನಿಗೆ – ಸೀಟು
ಮುಖವನ್ನು – ಡೂಮ್