ಸಾಲು ಹಣತೆಗಳ ಬೇಡಿಕೆ

• ಲೇಖಕರು
• ಇತ್ತೀಚಿನ ಬರಹಗಳು

ಕು| ನಿವೇದಿತಾ ಮಂಗಳೂರು

ಎಂ.ಕಾಂ, ಬಿ.ಎಡ್ ಓದಿರುವ ಇವರು, ಪ್ರಾಥಮಿಕ ಶಾಲಾ ಶಿಕ್ಷಕಿಯರಾಗಿ ಕೆಲಸ ಮಾಡುತ್ತಿದ್ದಾರೆ. ಕತೆ, ಕವನ, ನಾಟಕ, ಇತರ ಸಾಹಿತ್ಯ ಪ್ರಕಾರಗಳನ್ನು ಓದುವುದು, ಹಾಡುವುದು ಇವರ ಹವ್ಯಾಸಗಳು. ತುಳು ಇವರ ಆಡು ಭಾಷೆಯಾದರೂ ಬರೆಯುವುದೆಲ್ಲವೂ ನಾಡಭಾಷೆ ಕನ್ನಡದಲ್ಲೇ..

ಹೈಕುಗಳು, ರುಬಾಯಿ, ಹನಿಗವನ, ಭಾವಗೀತೆ, ಶಿಶುಗೀತೆ, ಲೇಖನ, ಕಿರುಗತೆ, ನ್ಯಾನೋ ಕತೆ, ಪುಸ್ತಕ ವಿಮರ್ಶೆ ಈ ಎಲ್ಲಾ ಪ್ರಕಾರಗಳಲ್ಲೂ ಇವರು ಬರೆದಿದ್ದಾರೆ. ಗದ್ಯಕ್ಕಿಂತ, ಬೆರಳುಗಳಿಗೆ ಕವಿತೆಗಳನ್ನು ಗೀಚುವುದೇ ಹೆಚ್ಚು ಆಪ್ತ. ಹೊಸದನ್ನು ಕಲಿಯಲು ಬಹಳ ಉತ್ಸಾಹ. ಹಲವು ಕವಿತೆ, ಕತೆ, ಲೇಖನಗಳಿಗೆ ಪ್ರಶಸ್ತಿಗಳನ್ನು ಪಡೆದಿದ್ದಾರೆ.

ಇತ್ತೀಚಿನ ಬರಹಗಳು: ಕು| ನಿವೇದಿತಾ ಮಂಗಳೂರು (ಎಲ್ಲವನ್ನು ಓದಿ)

• ಸಾಲು ಹಣತೆಗಳ ಬೇಡಿಕೆ - ನವೆಂಬರ್ 3, 2021

ಅದೇ ಹಳೆಯ ನೀಲ ಲಂಗದಾವಣಿ;
ಉಟ್ಟು ತರಾತುರಿಯಲ್ಲಿ ಓಡಾಡುತ್ತಿಹಳು ರಮಣಿ,
ಮೊಗದಲ್ಲಿ ಉದಿಸಿದೆ ಮಂದಹಾಸದ ಗಣಿ,
ಉಲಿಯುತ್ತಿಹುದು ಅವಳ ಭಾವಗಳ ಗಿಣಿ!

ಕ್ಷಣ ಎಣಿಸುತ್ತಿಹಳು, ಜಾರಲೆಂದು ರವಿ;
ಇರುಳಿನಲಿ ಕಣ್ತುಂಬಿಕೊಳಲು ಮಾಧವನ ಛವಿ!
ದೀಪವುರಿಸಿ ಅಲಂಕರಿಸುತ್ತಿದ್ದಾಳೆ ಬೃಂದಾವನದ ಬುವಿ;
ದೂರದ ವೇಣುಗಾನಕೆ ನವಿಲಾದ ಮಾಧವಿ!

ಹಾಡಿ ಕೂಗಿದಳು ದುಂಡು ಚಂದ್ರಮನ,
ಉಯ್ಯಾಲೆ ತೂಗುವಳು ಕಂಡಂತೆ ಮೋಹನನ,
ಹೆರಳ ಸೋಕುತಿದೆ ನಯವಾಗಿ ಪವನ,
ಪುಳಕಗೊಂಡ ದೀಪದ ಹೂವಿಗೂ ನರ್ತನ!

ಹೊತ್ತು ಉರುಳುತಿದೆ, ಇರುಳು ಕರಗುತಿದೆ,
ತೈಲವಿಂಗುವ ಭೀತಿಯಲಿ ದೀಪಗಳೆಲ್ಲವೂ ಬಳಲುತಿದೆ!
ಶಾಂತ ಯಮುನೆಯೊಳು ಉಬ್ಬರವು ಏರುತಿದೆ,
ಕ್ರೋಧದಲಿ ಗಾಳಿಯೂ ಅಬ್ಬರವನು ಎಬ್ಬಿಸಿದೆ!

ಆದರೂ ಧೃತಿಗೆಡಲಿಲ್ಲ ವೃಜದ ರಾಧಿಕೆ;
ಕಾದಳು, ಶ್ಯಾಮನಲ್ಲಿಟ್ಟು ಅಗಾಧ ನಂಬಿಕೆ..
ಕಾರ್ತಿಕವೂ ಚೆಲ್ಲಿದ್ದು, ಭ್ರಮೆಯ ಬೆಳಕೆ?
ಉತ್ತರಕ್ಕಾಗಿ ಸಾಲು ಹಣತೆಗಳಿಟ್ಟಿವೆ, ಬೇಡಿಕೆ!!