ಕ್ಲಿಯೋಪಾತ್ರ್ರಾಳ ಮೂಗು

• ಲೇಖಕರು
• ಇತ್ತೀಚಿನ ಬರಹಗಳು

ಡಾ. ಕೆ ವಿ ತಿರುಮಲೇಶ್

ಕಾಸರಗೋಡು ಜಿಲ್ಲೆಯ ಕಾರಡ್ಕ ದಲ್ಲಿ ಜನಿಸಿದ ಕೆ.ವಿ. ತಿರುಮಲೇಶ್ ಕನ್ನಡದ ಮಹತ್ವದ ಬರಹಗಾರ, ಚಿಂತಕ ,ಭಾಷಾಜ್ಞಾನಿ, ಕವಿ, ಕಥೆಗಾರ, ನಾಟಕಕಾರ, ವಿಮರ್ಶಕ. ಸುಮಾರು ಐದು ದಶಕಗಳ ಕಾಲ ಕವಿತೆ, ಕತೆ, ವಿಮರ್ಶೆ, ಅನುವಾದ ಕ್ಷೇತ್ರಗಳಲ್ಲಿ ಕೆಲಸ ಮಾಡಿಕೊಂಡು ಬಂದಿದ್ದಾರೆ. ‘ಮುಖವಾಡಗಳು’ ಹಾಗೂ ‘ವಠಾರ’ ಇವರ ಎರಡು ಜನಪ್ರಿಯ ಕೃತಿಗಳು. ಇವರ ೪೦ ಪ್ರಕಟಿತ ಕೃತಿಗಳಲ್ಲಿ ಅವಧ, ವಠಾರ, ಮುಖವಾಡಗಳು, ಪಾಪಿಯೂ ಎಂಬುವು ಮುಖ್ಯ ಕವನ ಸಂಕಲನಗಳು. ಆರೋಪ, ಮುಸುಗು ಇವರ ಕೆಲ ಕಾದಂಬರಿಗಳು. ಬೇಂದ್ರೆಯವರ ಕಾವ್ಯಶೈಲಿ, ನಮ್ಮ ಕನ್ನಡ, ಅಸ್ತಿತ್ವವಾದ ಇವು ಇವರ ಮುಖ್ಯ ವಿಮರ್ಶಾ ಕೃತಿಗಳು. ಮಾಲ್ಟ ಲೌರಿಡ್ಜ್ ಬ್ರಿಗ್ಗನ ಟಿಪ್ಪಣಿ ಪುಸ್ತಕ ಇವರ ಅನುವಾದಿತ ಕೃತಿ. ಅಕ್ಷಯ ಕಾವ್ಯ ಕೃತಿಗೆ ಪ್ರತಿಷ್ಠಿತ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಬಂದಿದೆ.

ಇತ್ತೀಚಿನ ಬರಹಗಳು: ಡಾ. ಕೆ ವಿ ತಿರುಮಲೇಶ್ (ಎಲ್ಲವನ್ನು ಓದಿ)

• ಅರ್ಧ ವರ್ಷದಲ್ಲಿ ಶಾಲೆಗೆ ಸೇರಿದ ಹುಡುಗ - ಅಕ್ಟೋಬರ್ 30, 2024
• ಒಂದು ಹಲಸಿನ ಹಣ್ಣಿನ ಹಂಬಲ ಮತ್ತು ಇತರ ಪದ್ಯಗಳು - ಅಕ್ಟೋಬರ್ 22, 2022
• ನೈನವೆ - ಮೇ 26, 2022

ಕ್ಲಿಯೋಪಾತ್ರಾಳ ಮೂಗು ಸ್ವಲ್ಪವೇ ಕಿರಿದಾಗಿರುತ್ತಿದ್ದರೂ
ಚರಿತ್ರೆಯ
ಗತಿಯೆ ಬದಲಾಗುತ್ತಿತ್ತು
ಎನ್ನುತ್ತಾನೆ ಬ್ಲಾಸೆ ಪಾಸ್ಕಾಲ್ ಮ್ಯಾತಮೆಟೀಶಿಯನ್
ಅದು ಅವನ ದೃಷ್ಟಿ..

ಅಷ್ಟೊಂದು ಚಂದವಿದ್ದಳೇ ಕ್ಲಿಯೋಪಾತ್ರ
ಎಂದು ಬೆರಗಾಗುತ್ತೇವೆ
ಅಥವ
ಪಾಸ್ಕಾಲ್ ಮತ್ತು ಶೇಕ್ಸ್‍ಪಿಯರ್ ಸೇರಿ
ಅಸಾಮಾನ್ಯ ಮಾಡಿದರೇ ಅವಳನ್ನ..
ಒಬ್ಬ ಫಿಲಾಸಫರ್, ಇನ್ನೊಬ್ಬ ಕವಿ —
ನಮ್ಮ ಸಿನೆಮಾದ ಎಲಿಙಬೆತ್ ಟೈಲರಳಷ್ಟು?

ನೋಡನೋಡುತ್ತ ಕ್ಯಾಂಪ್‍ಬೆಲ್ ಸೂಪ್ ಕ್ಯಾನುಗಳು
ಕಲಾವಿದನ (ಆ್ಯಂಡಿ ವರ್ಹಾಲ್)
ಕಲಾ
ಕೃತಿಗಳಾಗುತ್ತವೆ ಎಲ್ಲಿದ್ದವು ಅವು ಇಷ್ಟರ ತನಕ
ಮಲ್ಟಿಪ್ಲೆಕ್ಸ್ ಮಾಲ್‍ಗಳಲ್ಲಲ್ಲದೆ?

ಅಥವ ಪಿಕಾಸೋನ ‘ವೀನಸ್ ದು ಗಾಸ’
ಎಲ್ಲಿಯ ಕುಕಿಂಗ್ ಗ್ಯಾಸ್ ಎಲ್ಲಿಯ ವೀನಸ್ ದು ಗಾಸ್
ನಮಗೆ ಗೊತ್ತಿರುವುದೊಬ್ಬಳೇ ಅಪ್ರತಿಮ ವೀನಸ್
ವೀನಸ್ ಅಫ್ ಟಿಶಿಯನ್

ಕಲೆಯೆಂದರೇನೆಂದು ಕವಿತೆಯೇನೆಂದು
ಹಲವು ಬಾರಿ ಕೇಳಿದ್ದೇನೆ ತಿಳಿದವರು ಹೇಳಿದ್ದಾರೆ
ನನಗರ್ಥವಾಗಿಲ್ಲ…. ಎಂಥಾ ದಡ್ಡ ನಾನು ಕ್ಷಿತಿಜವ
ನೋಡಬಯಸುತ್ತೇನೆ.. ಮರೀಚಿಕೆಯ ಕುಡಿಯಬಯಸುತ್ತೇನೆ..
ಕನಸಿನೊಳಗೆ ಕನಸ ಕಾಣಬಯಸುತ್ತೇನೆ
ಆಮೇಲೆ ಇದ್ದಲ್ಲೆ ಮಲಗಿಬಿಡುತ್ತೇನೆ ಮರದ ನೆರಳಲ್ಲಿ
ಅಥವ ಹಾಸು ಪಾರೆಯ ಮೇಲೆ

ಅಲ್ಲಾ ಒಂದು ಮೂಗಿನ ಚೆಲುವಿನ ಮೇಲೆ ಚರಿತ್ರೆ
ನಿಂತಿದೆಯೆಂದರೇನರ್ಥ… ಇದನ್ನು ನಂಬಬೇಕೇ
ಬಿಡಬೇಕೆ ?
ಕವಿತೆಗೆ ಎರಡೂ ಬೇಕು.. ಬಹುಶಃ ಚರಿತ್ರೆಗೂ..