ದರ್ಜೆ ಎರಡನೆಯದೇ

• ಲೇಖಕರು
• ಇತ್ತೀಚಿನ ಬರಹಗಳು

ತೇಜಾವತಿ ಹೆಚ್. ಡಿ. (ಖುಷಿ)

ತೇಜಾವತಿ ಹೆಚ್. ಡಿ. (ಖುಷಿ) ಅವರು ಹುಳಿಯಾರು,
ಚಿಕ್ಕನಾಯಕನಹಳ್ಳಿ ತಾಲ್ಲೂಕು, ತುಮಕೂರು ಜಿಲ್ಲೆ ಯವರು. ಸಾಹಿತ್ಯ, ಓದುಗಳಲ್ಲಿ ಅಪಾರ ಆಸಕ್ತಿಯುಳ್ಳ ಇವರು ಕಾವ್ಯ ಕೃಷಿಯಲ್ಲೂ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ.

ಇತ್ತೀಚಿನ ಬರಹಗಳು: ತೇಜಾವತಿ ಹೆಚ್. ಡಿ. (ಖುಷಿ) (ಎಲ್ಲವನ್ನು ಓದಿ)

• ಗಜಲ್ - ಆಗಸ್ಟ್ 15, 2023
• ದರ್ಜೆ ಎರಡನೆಯದೇ - ಅಕ್ಟೋಬರ್ 23, 2022
• ಅಮೋಘಸಿದ್ಧ ಜನಪದ ಮಹಾಕಾವ್ಯ - ಅಕ್ಟೋಬರ್ 18, 2021

ಕಾಳಜಿ ಕನಿಕರ ಒಲುಮೆ ದುಡಿಮೆ ಎಲ್ಲದರಲ್ಲೂ ಮೊದಲು ನೀನೇ
ಆದರೆ
ದರ್ಜೆ ಎರಡನೆಯದೇ

ತ್ಯಾಗ ಬಲಿದಾನದಲ್ಲೂ ಕಡಿಮೆಯೇನಲ್ಲ
ಬಹುಶಃ
ಚರಿತ್ರೆಯ ಪುಟಗಳೂ ಪಕ್ಷಪಾತಿಗಳೇ ಇರಬೇಕು
ಮರೆಮಾಚಿಬಿಟ್ಟಿವೆ
ಒತ್ತಡಕ್ಕೋ ವ್ಯವಸ್ಥೆಗೋ ಅವಸ್ಥೆಗೋ ಮಣಿದು

ಶ್ರಮ ಪಾಲನೆ ಪೋಷಣೆ ಮುಂದಾಲೋಚನೆ ಅವರಿಗಿಂತ ತುಸು ಹೆಚ್ಚೇ
ಆದರೇನಂತೆ
ಅವರೆಲ್ಲಾ ಮೊದಲ ಸಾಲಿನ ಪ್ರತಿನಿಧಿಗಳು
ಅವರ ಕಷ್ಟ ನಷ್ಟ ಪಾಪ ಅವಮಾನ ಎಲ್ಲಕ್ಕೂ ಸರಿಪಾಲು
ಸಾಧನೆ ಲಾಭದಲ್ಲಿ ಶೂನ್ಯ ಬಾಳು
ಏಕೆಂದರೆ ದರ್ಜೆ…

ಇಷ್ಟಕ್ಕೂ ಮಾಪನದ ಮಾನದಂಡವೇನು
ಬದುಕುವ ರೀತಿಯೋ ಸರ್ವಕಾಲಿಕ ನೀತಿಯೋ
ಜೈವಿಕ ವ್ಯತ್ಯಾಸವೋ
ದರ್ಪ ಪ್ರತಿಷ್ಠೆ ಅಧಿಕಾರ ಶ್ರೇಷ್ಠತೆಗಳ ಮೆರವಣಿಗೆಯೋ
ಹೊತ್ತಿದ್ದೇ ಹೊತ್ತಿದ್ದು ಶತಮಾನಗಳ ಉದ್ದಗಲಕ್ಕೂ ಇರುವೆಯಾಗಿ ಆನೆಭಾರವ
ಹೆಗಲುಗಳಿಗಿಲ್ಲಿ ವಿಶ್ರಾಂತಿಯಿಲ್ಲ
ಕಪ್ಪು ಸುಕ್ಕುಗಟ್ಟಿದ ಕಣ್ಣುಗಳಲ್ಲಿ ಕಸುವಿಲ್ಲ
ಅಡ್ಡಗೋಡೆಯ ದೀಪದ ಮಿಣುಕಿನಲ್ಲಿ
ಗೋಚರಿಸುತ್ತಿರುವ ಉರಿಯುವ ತಾರೆಗಳು ಇನ್ನೂ ಅಸ್ಪಷ್ಟ

ಇರಬಹುದು
ನೀನು ಅವರಿಗಿಂತ ಜೋರು
ನಿನ್ನ ಧ್ವನಿಯ ಆಲಿಸಿ ಗುರುತಿಸುವವರು ಯಾರು
ಸದ್ದಡಗಿಸಿಬಿಟ್ಟಿದ್ದಾರೆ
ನಿರ್ವಾತ ಅವಾಸಕ್ಕೆ ದೂಡಿ

ಹಬ್ಬ ಜಾತ್ರೆ ಆಚರಣೆಗೆ ಮೀಸಲು ನಿನ್ನ ಪೂಜ್ಯ ಪಟ್ಟ ದೇವತೆಯ ಅಟ್ಟ
ಗುಡಿಯೊಳಗಿನ ಪೂಜಾರಿ ಮನೆಯೊಳಗೆ ವ್ಯಾಪಾರಿ ಅಳೆದು ತೂಗುತ್ತಿದ್ದಾನೆ ಸಾಮಾಜಿಕ ತಕ್ಕಡಿಯಲ್ಲಿ
ನಾ ಮೇಲೆ ನೀ ಕೆಳಗೆ
ಈ ಒಳ ಹೊರಗಿನ ಸೆರಗು ಬೆರಗು

ಬಿತ್ತಿದ್ದೇ ಉತ್ಕೃಷ್ಟವಾದರೆ
ಕಾಪಿಟ್ಟು ಬೆಳೆದ ಫಸಲು ಕನಿಷ್ಠವೇ
ಮೇಲು ಕೀಳು ಹೆಚ್ಚು ಕಡಿಮೆ ಒಂದು ಎರಡು ಹೀಗೆ ದರ್ಜೆಯಲ್ಲಿ ಯಾವಾಗಲು ಹಿಂದೆಯೇ

ಬದಲಾಗದ ದೃಷ್ಟಿಕೋನ ಬೆಂಬಿಡದ ಸಿದ್ಧಾಂತ
ತಳುಕು ಹಾಕಿಕೊಂಡ ಬದುಕು
ಸಂರಕ್ಷಿತ ದರ್ಜೆಗಳ ಸಹ ಪ್ರಯಾಣದಲ್ಲಿ ನಿನ್ನ ಸ್ಥಿತಿ ಅಸ್ತವ್ಯಸ್ತ.