ಪರಿಮಳದ ಹಾದಿ

• ಲೇಖಕರು
• ಇತ್ತೀಚಿನ ಬರಹಗಳು

ಸ್ಮಿತಾ ಅಮೃತರಾಜ್

ಸ್ಮಿತಾಅಮೃತರಾಜ್ ಗೃಹಿಣಿ ಮತ್ತು ಕೃಷಿಕ ಮಹಿಳೆ.ಕೊಡಗಿನ ಸಂಪಾಜೆ ಬಳಿಯ ಚೆಂಬುವಿನಲ್ಲಿ ವಾಸ.ಬರವಣಿಗೆ ಹವ್ಯಾಸ. ಒಂದು ಲಲಿತ ಪ್ರಬಂಧ ,ಕವಿತೆ ಸೇರಿದಂತೆ ಒಟ್ಟು ನಾಕು ಕೃತಿಗಳು ಪ್ರಕಟಗೊಂಡಿವೆ.

ಇತ್ತೀಚಿನ ಬರಹಗಳು: ಸ್ಮಿತಾ ಅಮೃತರಾಜ್ (ಎಲ್ಲವನ್ನು ಓದಿ)

• ಪರಿಮಳದ ಹಾದಿ - ಅಕ್ಟೋಬರ್ 22, 2022
• ಕಲ್ಲಾಗುವುದೆಂದರೆ - ಡಿಸಂಬರ್ 31, 2021
• ದುರಿತಕಾಲದ ದನಿ - ಡಿಸಂಬರ್ 24, 2020

ಬೇಸಗೆಯ ಬಿರುಬಿಸಿಲ ದಿನ
ಮೊದಲ ಹನಿಮಳೆ ಉದುರಿದ್ದಕ್ಕೆ
ಮಣ್ಣ ಕಣ್ಣೊಡೆದು ಘಮ ಅರಳಿಕೊಳ್ಳುವಾಗಲೆಲ್ಲಾ
ಧಾವಿಸಿ ಹೊರಬಾಗಿಲಲ್ಲಿ ನಿಂತು
ಇನ್ನಿಲ್ಲದಂತೆ ಅವಳು ಅದನ್ನು ಒಳಗೆಳೆದುಕೊಳ್ಳುವ
ವಿಸ್ಮಯಕ್ಕೆ ಕುತೂಹಲ ಹೆಚ್ಚಾಗುತ್ತದೆ
ಮಗಳಿಗೆ

ಮಣ್ಣಗಂಧವನ್ನ ಯಾವ ಅತ್ತರಿನ ಡಬ್ಬಿಗೂ
ತುಂಬಲಾಗಲಿಲ್ಲವಲ್ಲ ಈವರೆಗೂ
ಮತ್ತೂ
ಮುಟ್ಟಿದಾಗಲೆಲ್ಲಾ‌ ದೂಳು, ಕೆಸರು
ಪದೇ ಪದೇ ಬಗೆಬಗೆಯ
ಪರಿಮಳದ ಸೋಪು ತಿಕ್ಕಿ ಕೈ ಮೈ ತೊಳೆದುಕೊಳ್ಳುತ್ತೇವಲ್ಲ?

ಮತ್ತೆ ಮತ್ತೆ‌ ಮುಟ್ಟಿದರೆ ಎಲ್ಲವೂ
ಕೊಳೆಯಾಗುತ್ತದೆ,ಕಲೆಯಾಗುತ್ತದೆ
ಪರಿಮಳದ ಸೋಪೂ.. ಅತ್ತರಿನ ಹನಿಯೂ
ದಿನ ಕಳೆದರೆ ಘಮಲು ಕಳೆದುಕೊಳ್ಳುತ್ತದೆ
ಕೆಲವು ನೆತ್ತಿಗೇರಿ ಚಿತ್ತ ಕದಡಿ ಬಿಡುತ್ತದೆ

ಇಹಕ್ಕೂ ಪರಕ್ಕೂ ಲಗ್ಗೆಯಿಡುವ ಹಿತದ
ಕಂಪ‌ ಮೂಲ ಅರಸುವುದು
ತುಸು ಪ್ರಯಾಸವೇ ಸರಿ.

ಮಗೂ..
ಮೈಗಂಟಿದ ಪರಿಮಳವೂ
ಮನಸಾವರಿಸುವ ಪರಿಮಳವೂ
ಈ‌ ಪರಿಯದು ನೋಡು
ಅಂಟುವ ಮತ್ತು ಆವರಿಸುವ ಬೆಡಗ
ಬಿಡಿಸಿ ಹೇಳೆಂದರೆ..
ಸಾಧ್ಯವ ಹೇಳು?!