ಬಿಳಿಯ ಹಾಳೆ

• ಲೇಖಕರು
• ಇತ್ತೀಚಿನ ಬರಹಗಳು

ಕವಿತಾ ಹೆಗಡೆ

ಉತ್ತರ ಕನ್ನಡದ ಕುಮಟಾ ತಾಲೂಕಿನ ಕತಗಾಲದಲ್ಲಿ ಜನನ ಹಾಗೂ ಎಸ್ ಎಸ್ ಎಲ್ ಸಿ ಪ್ರಥಮ ಸ್ಥಾನ.
ಕುಮಟಾದ ಡಾ|| ಎ ವಿ ಬಾಳಿಗಾ ಕಾಲೇಜಲ್ಲಿ ಬಿ ಎ ವ್ಯಾಸಂಗ ಮಾಡಿದ್ದಾರೆ.
ಮೈಸೂರಲ್ಲಿ ಫ್ಯಾಶನ್ ತಂತ್ರಜ್ಞಾನದಲ್ಲಿ ಡಿಪ್ಲೋಮಾ ಮಾಡಿದ್ದಾರೆ.ಎಂ ಎ ಮತ್ತು ಬಿ ಎಡ್ ವ್ಯಾಸಂಗವನ್ನು ಹುಬ್ಬಳ್ಳಿಯಲ್ಲಿ ಮಾಡಿದ್ದಾರೆ.
೧೭ ವರ್ಷಗಳಿಂದ ಹುಬ್ಬಳ್ಳಿಯಲ್ಲಿ ವಾಸವಾಗಿದ್ದು ಪ್ರಸ್ತುತ ಹುಬ್ಬಳ್ಳಿಯ ಮಂಜುನಾಥ ನಗರದ ಕೆ ಎಲ್ ಇ ಆಂಗ್ಲ ಮಾಧ್ಯಮ ಶಾಲೆಯಲ್ಲಿ ಆಂಗ್ಲ ಭಾಷಾ ಶಿಕ್ಷಕಿ.
ಕನ್ನಡ ಹಾಗೂ ಆಂಗ್ಲ ಎರಡೂ ಭಾಷೆಗಳಲ್ಲಿ ಸಾಹಿತ್ಯ ರಚನೆ.
ಪತಿ ಶ್ರೀ ಎಸ್ ಕೆ ಹೆಗಡೆ ಉಚ್ಚ ನ್ಯಾಯಾಲಯದ ನ್ಯಾಯವಾದಿ.
ಮಗಳು ಸಾನಿಕಾ ಹೆಗಡೆ ಕಾಲೇಜು ವಿದ್ಯಾರ್ಥಿನಿ ಮತ್ತು ಕವಯತ್ರಿ. “Abandoned Friend” ಎಂಬ ಆಂಗ್ಲ ಕವನ ಸಂಕಲನದ ಲೇಖಕಿ.
ಕವಿತಾ ಹೆಗಡೆ ಅವರು “The Nested Love” ಪುಸ್ತಕದ ಲೇಖಕಿ.

ಇತ್ತೀಚಿನ ಬರಹಗಳು: ಕವಿತಾ ಹೆಗಡೆ (ಎಲ್ಲವನ್ನು ಓದಿ)

• ಈ ಇವನ ಧಿಮಾಕು - ಅಕ್ಟೋಬರ್ 23, 2022
• ಗ್ರೀಷ್ಮದಲ್ಲೊಂದು ಗಮ್ಮತ್ತಿನ ಪ್ರವಾಸ - ಮೇ 28, 2022
• ಬಿಳಿಯ ಹಾಳೆ - ಮೇ 12, 2021

ಅಚ್ಚ ಬಿಳಿಯ ಹಾಳೆಯೊಂದು ದೊರಕಿತ್ತು
ಗರಿ ಗರಿಯ ಹೊಸ ಹಾಳೆ
ಅಕ್ಕು ಮುಕ್ಕಿಲ್ಲದ ಚೊಕ್ಕ ಹಾಳೆ
ಕಕ್ಕುಲಾತಿಯಲಿ ಎದೆಗೊತ್ತಿಕೊಂಡೆ.

ಕಿವಿಯಲ್ಲಿ ಪಂಚವಾದ್ಯದ ಸಂಭ್ರಮ
ಕೆಂಪು ಗುಲಾಬಿಯ ಹಾಸಿದ ಅನುಭವ
ಪಾಲಿಗೆ ಬಂದ ಹಾಳೆ ಸುಂದರವಿತ್ತು
ಕೈತಾಗಿದರೆ ಮುದುರುವುದೋ ಎಂಬ ಭಯವಿತ್ತು.

ಯಾವುದೇ ಹಾಳೆ ಇಷ್ಟು ಬಿಳಿಯಾಗಿರಬಹುದೆ?
ಒಂದು ಕಲೆಯೂ ಇರದೆ ಶುಭ್ರವಾಗಿರಬಹುದೆ?
ಸಂಶೋಧನೆಯ ಭೂತ ಬಡಿದ ಮನಕೆ
ವಿವೇಚನೆಯ ಸಹನೆಯೇತಕೆ?

ತಿರುಗಿಸಿ ಮುರುಗಿಸಿ ಕಡೆಗೂ
ಕಂಡುಹಿಡಿದೇ ಬಿಟ್ಟೆ..ಹಾ…..
ಅದೋ ಅದೊಂದು ಮೂಲೆಯಲಿ
ಕಂಡೂ ಕಾಣದ ಚುಕ್ಕಿ!

ಹೌದಾ…ಹೇಳಿಲ್ಲವೆ ನಾನು?
ಬೀಗಿ ಕೂಗಿದೆ ನಾನು ಹೆಮ್ಮೆಯಲಿ ಹಿಗ್ಗಿ
ನನ್ನುಸಿರ ಗಾಳಿ ಹೆಚ್ಚಾಯಿತೆ..?
ಹಾರಿ ಹೋಯಿತು ಹಾಳೆ..

ಕೈಜಾರಿ ಹಾರಿ ಹೋದ ಹಾಳೆ
ಕಡಿದುಕೊಂಡಿತು ಸಕಲ ಬಂಧಗಳ
ಅಲಕ್ಷಿಸಿದ್ದರೆ ಪುಟ್ಟ ಚುಕ್ಕಿಯ ನಾನು,
ನನ್ನ ಭಾಗ್ಯಬರಹದಧಿಕಾರಿ ಆಗಬಹುದಿತ್ತು.
ನಾನು ಮತ್ತು ಇನ್ನು ಬರೀ ನಾನು,
ಹೇಳುವುದೇನು? ಎಲ್ಲಿ ಅವನು?