ಮನೆಯೊಳಗೆ ಮನೆಯೊಡೆಯರಿಲ್ಲ

• ಲೇಖಕರು
• ಇತ್ತೀಚಿನ ಬರಹಗಳು

ಚಿಂತಾಮಣಿ ಕೊಡ್ಲೆಕೆರೆ

ಡಾ.ಚಿಂತಾಮಣಿ ಕೊಡ್ಲೆಕೆರೆ ಕವಿ, ಕತೆಗಾರ, ಪ್ರಬಂಧಕಾರ ಮತ್ತು ವಿಮರ್ಶಕರಾಗಿ ಚಿರ ಪರಿಚಿತರು.
ಮೂಲತಃ ಉತ್ತರಕನ್ನಡದವರಾದ ಇವರು ಬೆಂಗಳೂರಿನಲ್ಲಿ ಕೂಡ ಶಿಕ್ಷಣ ಪಡೆದಿದ್ದಾರೆ. "ಕನ್ನಡ ಕಾವ್ಯದ ಪರಿಪ್ರೇಕ್ಷ್ಯದಲ್ಲಿ ಕಾವ್ಯ ಮತ್ತು ತಾತ್ತ್ವಿಕತೆಗಳ ಸಂಬಂಧ" ಕುರಿತು ಡಾ.ಕೆ.ವಿ.ನಾರಾಯಣರ ಮಾರ್ಗದರ್ಶನದಲ್ಲಿ ಸಿದ್ಧಪಡಿಸಿದ ಮಹಾಪ್ರಬಂಧಕ್ಕೆ ಹಂಪಿಯ ಕನ್ನಡ ವಿಶ್ವವಿದ್ಯಾಲಯದಿಂದ ಡಾಕ್ಟರೇಟ್ ದೊರಕಿದೆ.ಟಪಾಲುಬಸ್ಸು ಕೃತಿಗೆ (ಲಲಿತಪ್ರಬಂಧ) ಕರ್ನಾಟಕ ಸಾಹಿತ್ಯ ಅಕಾಡೆಮಿಯ ಪುಸ್ತಕ ಪುರಸ್ಕಾರ ಲಭಿಸಿದೆ. (೨೦೧೨).

ಇತ್ತೀಚಿನ ಬರಹಗಳು: ಚಿಂತಾಮಣಿ ಕೊಡ್ಲೆಕೆರೆ (ಎಲ್ಲವನ್ನು ಓದಿ)

• ಒದ್ದೆ ಹಕ್ಕಿಯ ಹಾಡು ಮತ್ತು ಇತರ ಕವಿತೆಗಳು - ಸೆಪ್ಟೆಂಬರ್ 11, 2025
• ಹುಣ್ಣಿಮೆ ರಾತ್ರಿ ದೇವರಾಡುವನು - ಜನವರಿ 1, 2025
• ಮರಿಹಕ್ಕಿ ಮರಳಿತು ಕಾಡಿಗೆ…  - ಅಕ್ಟೋಬರ್ 29, 2024

ಮನೆಯೊಳಗೆ ಮನೆಯೊಡೆಯರಿಲ್ಲ
ಏನೂ ಹೇಳುವ ಹಾಗೂ ಇಲ್ಲ!

ತೊಟ್ಟಿಯಲಿ ತಟ್ಟೆಗಳು ಬುಟ್ಟಿಯಲಿ ಹಸಿಕಸ
ಬಿಂಜಲು ತಲೆಯ ಸವರುವುದು
ಇಡೀ ವಾರದ ಬಟ್ಟೆ ತೊಳೆಯದೆ ಬಿದ್ದಿದೆ
ವಾಸನೆಯೆ ಎಲ್ಲ ಹೇಳುವುದು

ಗಂಡಹೆಂಡಿರು ಬೇಗ ಎದ್ದು ಹೊರಡುವರು
ಬರುವಾಗ ಸಂಜೆಯಾಗುವುದು
ರಜೆಗಳಲಿ ಸುತ್ತಾಡಿ ಬರುವರಲ್ಲಿಲ್ಲಿ
ವರುಷಗಳು ಕಳೆದುಹೋಗುವವು

ಕಷ್ಟಗಳ ನಡುವೆಯೇ ಇಷ್ಟಾರ್ಥ ಆಗಾಗ
ಫಲಿಸಿತ್ತು ಬಡಬಾಳಿನಲ್ಲಿ
ಮನೆ ಹೊರಗೆ ದುಡಿದದ್ದು ಮನೆ ಕಟ್ಟಲೆಂದು
ಕನಸು ಅರಳಿತು ಕೆಸರಿನಲ್ಲಿ

ಹುಟ್ಟಿ ಬೆಳೆದರು ಮಕ್ಕಳಿಕ್ಕಟ್ಟಿನಲ್ಲೆ
ಇಂದವರು ದೇಶದಲ್ಲಿಲ್ಲ
ಹಿರಿಯ ದಂಪತಿ ನಕ್ಕು ಹೇಳುವರು – ಈಗಲೂ
ಮನೆಯೊಳಗೆ ಮನೆಯೊಡೆಯರಿಲ್ಲ!